Read Kilivila AISEA 51 Bible Online

AISEA 51 - Kilivila bible

AISEA 51

¹E Guyau ikaibiga kawala, “Kunakaigalaigusi availa yokomi magimi bakatumovaimi, yokomi goli lokumakaiagusi paila pilasi. Biyelu ninami bukuninamsaisi pwaipwaia makwaina yokomi lokutoyasi lokumaisi baisa goli tubumyou makwaina lokusunapulasi.

²Biyelu ninami bukuninamsaisi tubumi Eberaam, deli minana Sera, dalem leitetila leima metoya matausina. Tuta matutona Eberaam gala litula, yeigu adaubogwi wala matauna; yeigu amitukwaii matauna e asaiki litula. E avigaki dalela saina bidugaga sainela.

³“Yeigu banokapisi Yerusalem, deli komwaidona tomotala isisuaisi olumoulela mavilouna viloudadaimi. Ilagoli pwaipwaiala bogwa eiviloupakala mitaga yeigu bavigaki wala bimila bagula makawala bagula makwaina lakaibiguli mapilana Ideni. Mwasawa deli lagisa basaili baisa e tomota biusiwosisi deli si yakaula deli binokagutokisi baisa yeigu.

⁴“Ulo tomota, kunakaigalaigusi, kunakaigalaisi avaka balivali. Yeigu avituloki boda ituwoli ituwoli, e ulo karaiwaga bivigaki si lumalama.

⁵Yeigu bogwa bananakwa bama paila bakatumovi matausina, tutala ulo tomgaga bogwa leivakatitaikina. Yeigu wala titoulegu baguyoi boda komwaidona. Availa availa isisuaisi omiloutala itutulaigusi paila bawa, matausina itulotulasi deli si pikwaku paila bakatumovi matausina.

⁶Kukounakailasi labuma, kukululukwaisi valu watanawa! Labuma bitamwau makawala mseu e valu watanawa bidadaimi makawala karekwa yadidadaimi, e tomotala komwaidona bikaligasi makawala nigunagu. Mitaga ulo katumova bamai makwaina kwekanuvagasi tuta gala biwokuva e ulo tomgaga baisa vavagi kala vigimkovila.

⁷“Kunakaigalaigusi, availa yokomi kunikolaisi avaka duwosisia. E yokomi goli kuyosikikitaisi ulo vituloki metoya oninami. Taga kukokolasi avai tuta tomota bikapokaimi deli bibigigagaimi.

⁸Matausina bitamwausi makawala karekwa liwoliusa bitadidaimisi! Mitaga ulo katumova bikanuvagasi, ulo tomgwaga bikanigaga goli tuta gala wala biwokuva.”

⁹Mwa Guyau, kumamata, e kupilasaimasi! Kukolaimasi metoya om peula kuvigaki makawala lokuuvagi tuta omitibogwa. Yoku wala matoulem lokutagigai minana dokanikani obolita yagala Reyabi.

¹⁰Tuvaila yoku wala lokuvigaki bolita leimada e lokukivi keda eisuwalai sopi, e matausina lokukoli gagabila biluvapelasi.

¹¹Matausina availa lokukoli biviloubusisi Yerusalem deli si mwasawa, iusiwosisi deli govasi paila si mwasawa. Matausina biluva uwosi metoya ninamwau deli valam, e si mwasawa bikanuvagasi tuta gala biwokuva, e gala avai tuta bibodasi ninamwau deli valam.

¹²E Guyau ilivala kawala, “Yeigu goli lakatupewolaimi. Avaka paila bukukukolaisi tomota? Ka, matausina gala bisivagasisi makawala mnumonu wala!

¹³Ki, kaina bogwa lokulumwelavaisi Guyau matauna kami tobubuli, matauna leikatuvakai labuma e ivitau valu watanawa tumilela? Avaka paila tuta komwaidona bukusisuaisi deli wala kami kokola metoya okasi leiya matausina eilamidadaimi, deli matausina eikatubaiasasi mwada bikatumataimi. Matausina kasi leiya gala goli gagabila bikabikonaimi.

¹⁴Tuta pikekita availa availa matausina mina katupipi bibanaisi taneku, matausina bisisuaisi tuta kaduwonaku e bibanaisi komwaidona kaula bibudoki matausina.

¹⁵“Yeigu Guyau mi Yaubada, e yeigu bakatuluwi bolita e bavigaki kaisai bikawoula. Yeigu yagagu Guyau Topeuligaga!

¹⁶Lakatuvakai labuma kala beiyaya e lavitau valu watanawa tumilela. Aluki mina Yerusalem kawagu, ‘Yokomi ulo tomota! Bogwa lasakaimi ulo vituloki e oyamagu bogwa lakolaimi.’”

¹⁷Yerusalem, kumamata! Kusimalaula e kutokaia! Yoku bogwa lokumom ovigala mipuki baisa Guyau ola gibuluwa bogwa leivimomwaim, yoku lokumom lokukwatukovi makwelana leivigakaim kusilibeibeu.

¹⁸Gala wala taitala isisu paila bikugwaiyaim, e gala taitala oluwalaisi m tomota biyosaim oyamam bivakadaim.

¹⁹Ka, kabomwau kwaiyu bogwa lokubodasi. Mi pwaipwaia bogwa leiyogagaisi metoya okabilia, e mi tomota kasi molu wala. Gala wala availa ibodi binokapisaimi.

²⁰Okatugulugelu keda kadatala kadatala mi tomota immaki uwosi ikikapusisi, matausina makawala ugiwagi dia biwaisi okasi sikula toweiga. Matausina bogwa leilumkolaisi lutula Yaubada la gibuluwa.

²¹Yokomi mina Yerusalem lokubodasi mmayuyu, yokomi goli lokusilubeibeusi makawala lokumommatasi.

²²Guyau mi Yaubada matauna ikolaimi eilivala kawala, “Ka, bogwa bakau baligaim viga makwelana lasakaimi metoya ogu gibuluwa. E gala tuvaila bukumomwaisi kami waini makwaina tuta komwaidona leivigakaimi lokusilubeibeusi.

²³Yeigu bakau makwelana basaiki availa matausina leilamidadaimi, deli basaiki availa matausina leivigakaimi lokukwanukwenusi olopola valu e iuvakikilaimi makawala tubumyou.”