Read Kilivila AISEA 52 Bible Online

AISEA 52 - Kilivila bible

AISEA 52

¹Mina Yerusalem, kupapeulasi e kukwaigalaisi mi valu! Ibodi Yaubada la valu viloubumaboma bukukwatububulaisi kala gigisa bibwaina. Matausina gala inikolaisi Yaubada gala wala avai tuta bisuvisi okalapisilela mi valu tuvaila.

²Mina Yerusalem, ibodi bukukosovalisi! Kutokaiasi metoya opwaipwaia e kusilaisi omi takaikaia! Tomotala Saiyoni yokomi eikatupipaimi, kutalikwaisi miyasina tanumnumta eiyuwolaimi.

³Guyau iluki la tomota kawala, “Avai tuta yokomi eivigakaimi ula, gala wala igimlokaimi wa mani oluviga bilauwaimi. E makawala goli yeigu gala wala avaka bamapu matausina paila batanekwaimi.

⁴Omitibogwa lokulosi Itipita e kusisuaisi makawala mina gilagala, e baisa yokomi wala titoulemi mi tagwala lokulosi. Mitaga mina Asiria imaisi deli si peula iyosaimi e ilauwaimi e gala wala avaka igimlokaimi oluviga bilauwaimi.

⁵E baisa tuta e vavagi makwaina makala wala eikaloubusi baisa yokomi mapilana Babilonia. Yokomi eikatupipaimi e ilauwaimi e gala wala avaka igimlokaimi. E matausina availa eiguyoiyaimi ikamnomwanasi deli ninasi walakaiwa e tuta komwaidona ikaluwouwaigusi wala.

⁶Mitaga ka, igau tuta bima yokomi bukusimokwitasi yeigu wala Yaubada deli avaka bogwa lalukibogwaimi.”

⁷O ina bwaina kidamwa bitagisi taitala touwata eimaima olilina koya, matauna eimmai bulogala bwaina, bulogala paila vakota! Matauna bikamituli kalisewa deli biluki mina Saiyoni, kawala, “Mi Yaubada matauwena Guyau!”

⁸Matausina eiyuuyausasi[53] valu eigougovasi. Ka, komwaidosi eigougovasi deli si mwasawa! Matausina bogwa eigisaki mitasi paila Guyau bogwa eikaimilavau leima Saiyoni.

⁹Yokomi lokusivagasisi Yerusalem avai tuta eikodidaimisi, kugovasi deli mi mwasawa! Paila Guyau bogwa bikoli la valu, deli bivisimoli la tomota.

¹⁰Guyau bikatumovi la tomota metoya ola peula kwebumaboma, e mina watanawa komwaidona bigisaisi goli.

¹¹Yokomi kala tokeula guguwala Bwala Kwebumaboma,[54] ibodi bukusilavaisi Babiloni. Kukwabomaimi bibwaina avai tuta bukusilavaisi, e gala avai vavagi kaboyogwala bukukwabikonaisi.

¹²E baisa tuta gala biyowa lupomi mwada bukukwalubaigogunasi avai tuta bukusilavaisi mapilana, kaina bukusakaulasi metoya kami tilaula. Paila Guyau matauna bivakadaimi, e da Yaubadasi mina Isireli matauna bivakwabwaimi.

¹³E Guyau eilivala kawala, “Ka, ulo touwata[55] bogwa wala bipeula ola wotetila, e matauna kala taimamila saina walakaiwa sainela.

¹⁴Bidubadu tomota saina itutu uwosi avai tuta leigisaisi matauna, e matauna wowola nebanebawokuva wala, e gala ibodi bitavitusi mwada matauna tomotatoula.

¹⁵Mitaga tuta baisa avai boda avai boda bitulaulasi baisa matauna, e gweguya bogwa wala bitutuvakau ninasi e gala wala kabolivala. Matausina bogwa bigisaisi e bikatetasi, vavagi makwaisina gala avai tuta inikolaisi.”