Read Kilivila AISEA 53 Bible Online

AISEA 53 - Kilivila bible

AISEA 53

¹E tomota imapwaisi kawasi, “Ki, availaga bidubumi da kamatulasi? E availa bivitusi Guyau nanola metoya baisa?

²Ka, baisa Guyau wala nanola paila la touwata ibodi bikaitubwa makawala kaitala kai eisususina obidapakala. Matauna gala kala migalela karaiwaga kaina itubuguyau, e igagabila bitatovilakaisi matauna. E gala wala avaka bikau ninadaisi metoya baisa matauna, e mwada bikivili ninadaisi bitalokaiasi.

³Yakidasi tapakaisi deli takoulovaisi wala matauna. E matauna ikau kala mwau deli kala mmayuyu. E gala availa bitagwala bigisi matauna - tavigakaisi matauna makawala gala wala avaka.

⁴“Mitaga matauna kaimapudasi ikau kala mwau deli kala mmayuyu makwaisina ibodi yakidasi bitakauwaisi. E ka, da nanamsasi mwada kala mwau matauna baisa kala mipuki Yaubada leisaiki.

⁵Mitaga gala! Paila wala da mitugagasi matauna ikatubuyavaisi wowola, e iwaiyasi matauna paila wala da lamadadasi. E metoya kala mwau mipuki makwaina, matauna bogwa eikau ivigaki kada katumovasi, e tabanaisi kada bwainasi metoya supalela kala lewa.

⁶Ka, yakidasi komwaidodasi makawala sipi minasina bogwa eitamwausi, e taitala taitala iloula ola keda ituwoli ituwoli. Mitaga ka, Guyau bogwa eivigaki matauna bikau mipuki makwaina, mipuki makwaina mwada yakidasila ibodi bitakauwaisi.

⁷“Ikatugisisaisi matauna, mitaga matauna imanum wala, e matauna gala ilivala avai biga. Matauna makawala goli natana lam tuta pikekita wala e bikatumataisi, kaina makawala goli natana sipi eiyosisi e tuta pikekita wala bikapitunaisi unuunula, e matauna gala ilivala avai biga.

⁸E iyosisi matauna, e iyakalaisi deli ilauwaisi paila bikaliga, mitaga gala taitala imwelaki wowola paila baisa. Paila wala da mitugagasi, ikatumataisi matauna.

⁹E isailisi matauna wa laka deli mina mitugaga, e ibakwaisi matauna deli toliguguwa bidubadu, ilagoli matauna gala avai tuta ikoulovi avai karaiwaga kaina avai tuta isasopa.”

¹⁰E Guyau eilivala kawala, “Ka, baisa nanogu makawala paila matauna ibodi biboda mwau; e la kaliga matauna ivigaki lula, paila mitugaga kala ligaiwa. E mapaila matauna bogwa wala bigisi tubula; e la momova bikatududuli bikaduwonaku, deli metoya baisa matauna, nanogu bogwa bavigimkulovi.

¹¹E ka, avai tuta kala mwau komwaidona bogwa biwokuva, matauna bimwasawavau tuvaila; e bogwa binikoli mwada kala mwau makwaisina eikikau gala ikoumakavi wala. Ulo touwata tatougu matauna saina iyomwasalaigu, bogwa wala bikabwaili bidubadu e yeigu bogwa baligaiwa si mitugaga, paila uula matauna.

¹²E mapaila yeigu basaiki matauna kabala deli kala taimamila oluwalaisi tauwau tovakaveka deli tokwaraiwaga. Matauna itugwali la momova e ikaliga makawala tomitugaga ibodi bikaligasi. Matauna ikaimapu bidubadu mina mitugaga deli inigada kidamwa biligaiwa si mitugaga.”