Read Kilivila AISEA 54 Bible Online

AISEA 54 - Kilivila bible

AISEA 54

¹Mina Yerusalem yokomi omitibogwa mi valu makawala natana vivila nakʹaliga. Mitaga baisa tuta kuwosisi deli kugovasi deli mi mwasawa. Paila baisa tuta bukubanaisi bidubadu litumia kasi bawa bikalisau litula minana isigagasi deli la mwala.

²Kuvigivauwaisi makwaisina buliyoyova lokusisikaisi bikwaivakavekasi; Kulamasaisi yuwoyoulesi biyauwonakusi deli kudagaisi kokolasi!

³Eitavina eitapatu, e yokomi bukukobibilaisi bikaduwonaku kami kaligei, e yokomi igau bukukwaimalaisi mi pwaipwaia metoya boda ituwoli ituwoli baisa tuta eiyosisi. E vilouvakaveka baisa tuta eisilavaisi vilouukuwokuva wala bogwa wala bikasewoki tomota.

⁴Mapaila gala bukukokolasi - yokomi gala wala tuvaila biyomsilaimi deli gala bukummosilasi, yokomi bukulumwelavaisi ammakawala okusilavaisi Yaubada, makawala natana navavaigila ivakikili[56] la mwala, deli bukulumwelavaisi mi ninamwau paila mi sigumalawa[57] makala wala natana kwabuya.

⁵Kami tobubuli bivagi makawala mi mwala - matauna yagala Guyau Topeuligaga. Matauna mina Isireli mi Yaubada Tobumaboma bikolaimi e matauna goli guyoula valu watanawa komwaidona.

⁶Mina Isireli, yokomi makawala natana navaivau, la mwala ivaipaki minana e saina iyomwau nanola. Mitaga baisa tuta Guyau eidouwaimi bukukwaimilavausi bukumakaiasi e ilukwaimi kawala,

⁷“Ka, tuta pikekita wala yeigu aligaimwaimi, mitaga kala siligaga ulo yebwaili yeigu bakaimilivauwaimi.

⁸E yeigu atotubulokaimi deli ulo gibuluwa mitaga tuta wala pikekita, mitaga baisa tuta bavitulokaimi ulo yebwaili tuta gala biwokuva.” Baisa makawala Guyau kami tokwatumova ililivala.

⁹“Ka, ola tuta Nowa yeigu akatotila gala wala avai tuta tuvaila bavagi dadoya bisuluwi valu watanawa. E baisa tuta yeigu lakatotila gala wala bagibuluwaimi tuvaila, yeigu gala bakatilakaiyaimi kaina bamipukwaimi.

¹⁰Kaina goli koya deli dubakaila ibodi bisiyayeilasi, mitaga ulo yebwaili baisa yokomi gala wala bikalituli; yeigu bavigaki bikanuvagasi ulo biga katotila paila vakota.”[58] Ka! Baisa makawala Guyau kami toyebwaili ililivala.

¹¹Guyau ikaibiga kawala, “O Yerusalem, yoku viloudadaimi deli gala wala isim m peula, e gala wala availa gagabila bivisimolaim. Ka! yeigu bakaliivau tumilem metoya dakuna kwevivivila.

¹²Yeigu bakaliaii buliyamata metoya makwaina dakuna kwevivivila yagala rubi, e kalapisilem metoya dakuna makwaisina ivivivilasi makawala kova, e kalim eitavina eitapatu bakaliaii metoya dakuna saina mapusi mwau migawelu migawelu.

¹³“Ka! yeigu wala titoulegu bavituloki m tomota, e basaiki kala kabinai si pwaipwaia deli vakota.

¹⁴Deli basakaim karaiwaga duwosisia deli kamokwita e metoya baisa bavigaki bikatupewolaimi. Yoku biluva wowom metoya giyougaga la lamadada deli la yokokola.

¹⁵Kidamwa availa bikabilia deli yoku, kabilia makwaina gala metoya ulo tagwala. E availa bikabilia deli yoku matauna bikapusi wala.

¹⁶“Ka! yeigu abubuli toyoudila tanumnumta, e matausina ivakataisi kova e igabwaisi tanumnumta e ikamdokaisi guguwala kabilia. Tuvaila yeigu abubuli tokwabilia, e matausina ivigakaisi guguwa makwaisina paila bikatumatasi.

¹⁷Mitaga gala avai vavagi biyogagaimi. Yokomi bogwa bukumapwaisi si tabinona availa availa eitabinakaimi. Yeigu bakoli ulo towotetila deli bavigaki bitomgwagasi.” Ka! Matauna Guyau bogwa ilivala.