Read Kilivila AISEA 9 Bible Online

AISEA 9 - Kilivila bible

AISEA 9

¹E gala wala kabosakaula metoya tuta mwau makwaina. E ka, mokwita goli omitibogwa mina Sebuloni deli mina Napitalai bogwa eibodaisi mmosila, mitaga tuta omatadasi mapilasina valu bibanaisi kasi taimamila, bivitouula Bolita Kwaiveka opilibomatu e biyayosaga bilʹo piliyuwela Waya Yoridani, e deli goli bila wala Galili, ambaisa mina mitawasi eisisuaisi.

²Tomota matausina omitibogwa ililoulasi odudubila bogwa leigisaisi lumalama sainela. Matausina isikailisi oviluwela dudubila sainela, mitaga tuta baisa lumalama bogwa eivisigili matausina.

³Guyau, yoku lokusaiki matausina si mwasawa kwaiveka. Matausina imwamwasila ninasi paila uula yoku. Matausina imwasawasi paila avaka lokuvagi baisa matausina, makawala goli tomota bimwasawasi otayoyuwa, kaina bivilaisi avai guguwa eilebwaisi.

⁴Paila yoku Guyau bogwa lokukouwoli kaitakewa makaina leiyomwau deli lewa manona eiwawaiya kaiyasi. Yoku lokutomgwaga odubasi boda mabudona eilamidadaisi deli eikaiyoulisi m tomota, makawala goli omitibogwa lokutomgwaga odubasi mina Midiani si tokwabilia.[20]

⁵E tokabilia mabudona kapolela kaikesi deli komwaidona kasi kakapula yabubuyavi bogwa bivakakovi wa kova.

⁶Ka, taitala gwadi eikaloubusi baisa yakidasi! Taitala latudasi eikaloubusi! E matauna goli biguyoiyaidasi. Matauna tadokaisi kala kavilevi “Tokatayuvisa Mokwita”, “Yaubada Topeuligaga,” “Tamadasi Tosivagasi,” “Guyoula Vakota.”

⁷E matauna la guyau bisetuwoli kala kwaiveka, e tuta komwaidona vakota bisisu ola kabokwaraiwaga. Matauna biguyau kaimapula guyau Debida, e la karaiwaga bivitau metoya mitukwaibwaila deli karaiwaga duwosisia, metoya tuta baisa e bila goli tuta okala vigimkovila. Ka, Guyau Topeuligaga bogwa eivitobu nanola kidamwa bivagi makawala.

⁸E Guyau bogwa eikagai kasi mipuki mina Isireli, mabudona goli Yekobe odalela.

⁹Komwaidona mina Isireli deli availa availa tosisula oviluwela Sameria binikolaisi Guyau bogwa leivagi makawala. Baisa tuta matausina mina kamnomwana deli ninasi walakaiwa. E ikaibigasi kawasi,

¹⁰“Bwala makwaisina eikaliaiisi metoya mlomwaluva kwegubugabu bogwa eitakubilasi, mitaga bitakaliaivauwaisi makwaisina metoya dakuna kwetatai. E kaituwolaisi makaisina riga bogwa eikitulaisi, mitaga bitakatulovaisi makaisina bitasailasiga kweisila.”

¹¹E Guyau bogwa eiulisali kasi tilaula bivabodaisi biyosisi matausina.

¹²Mina Siria bivabodaisi opilibomatu, e mina Pilisitia opilikwaibwaga, e bileilaisi wala bileipatusi bikapatu Isireli. Ilagoli Guyau la gibuluwa gala wala ikalituli, yamala iuvitukoli wala paila bimipuki mina Isireli.

¹³Ka, mina Isireli gala wala ninikelala uwosi paila bininavilasi; ilagoli Guyau Topeuligaga bogwa leimipuki matausina, matausina gala wala ikaimilavausi baisa matauna.

¹⁴E kala yamtala wala Guyau bimipuki Isireli tokugwala deli tomotala; matauna bibobuwalai matausina bimwaim pwanetasi bimwaim kaikesi.

¹⁵Pwaneta - kabutuvitusila matausina tovakaveka deli tommoya e kaikila - kabutuvitusila mina vitoubobuta matausina si vituloki sopawokuva wala!

¹⁶Matausina availa eikugwaiyaisi mabudona tomota bogwa eisuninaisi matausina, e bogwa wala eivapinigwaisi ninasi.

¹⁷Mapaila Guyau gala itagwala avai totubovau bikwala, e gala binokapisi kwabuya deli magudisina weilova, paila uula komwaidona tomota ilumwelavaisi Yaubada deli mina mitugaga, e komwaidona avaka avaka ilivalaisi gagawokuva wala livalela. Ilagoli Guyau la gibuluwa gala wala ikalituli, mitaga yamala biuvitukoli wala paila bimipuki mina Isireli.

¹⁸Ka, si mitugaga tomota makawala kovatala kova eilululu e leigigabu kaibisibasi deli kaigunigwaini. Eilululu makawala kovatala kovasupa deli mseula eititokowoi leila walakaiwa.

¹⁹Paila Guyau Topeuligaga eigibuluwa, mapaila la mipuki ilululu makawala kovatala kova leisubeilulu ovalu viloumwaidona e leivakadoum tomotala. E ka, ibodi taitala natana binevikoli ammakawala bikwala.

²⁰Ambaisa ambaisa olopola valu makwaina tomota bilebumakavasi wala bikamkwamsi avai kaula wala pikekita bibanaisi, mitaga gala avai tuta bikoumatasi. Mapaila ka! Matausina ikomasi litusia titoulesi!

²¹Tomotala Manasa isuvisi ikabiliasi deli tomotala Epereim, e oluvi budoyu wala ikatukwaitalasi isuvisi Yuda ikabiliasi. Mitaga Guyau la gibuluwa gala wala ikalituli. Yamala biuvitukoli wala paila bimipuki mina Isireli.