Read Kilivila TOLULA 11 Bible Online

TOLULA 11 - Kilivila bible

TOLULA 11

¹E Guyau iluki Mosese sola Eroni karaiwaga makwaisina

²paila kasi karaiwaga mina Isireli. Ka, yokomi ibodi bukukomasi avai mauna wala nasigisagina

³minasina kwebakwaisi kweyalilalai deli kʹasi bikasuyumalaisi e bikamvauwaisi.

⁴Mitaga gala bukukomasi kameli, ugiwagi, kaina kwakwau. Paila minasina napupagatu; minasina kʹasi ikasuyumalaisi ikamvauwaisi, mitaga kwebakwaisi gala kweyalilalai.

⁷Deli gala bukukomasi bunukwa. Paila minasina napupagatu; minasina kweyalilalai kwaibakwaisi, mitaga gala ikasuyumalaisi kʹasi e ikamvauwaisi.

⁸Gala bukukomasi minasina mauna kaina bukukwabikonaisi uwosi tutala bogwa eikaligasi; paila minasina napupagatu.

⁹Yokomi ibodi bukukomasi avai yena wala isim siyola deli isim silisilila,

¹⁰mitaga avai mauna olumoulela bolita gala isim siyola kaina gala silisilila gala bukukomasi,

¹¹bubuli makawala minasina napupagatu. Gala bukukomasi minasina kaina bukukwabikonaisi avai tuta bogwa leikaligasi.

¹²Yokomi gala wala ibodi bukukomasi avai vavagi obolita gala isim siyola kaina gala silisilila.

¹³Yokomi gala ibodi bukukomasi mauna minasina yagasi makawala, mluveka, kuru, kilakila, kaleya, bulibwali, kwailou, kawokawo, kasuwari, maikela, boituva, boi, binama, monilouluwa, sawila deli magiyaweda.

²⁰Komwaidona minumauna isim pinupanesi napupagatu,

²¹mesinaku wala minasina napeipela.

²²Ibodi bukukomasi nipawa, vegu, sigweilela.

²³Mitaga komwaidona minasina isim pinupanesi mitaga nasigisagina, minasina napupagatu.

²⁴Kidamwa availa bikabikoni uwosi minasina mauna nakakaliga, matauna bogwa eiyogwali titoulela bisisu wala topupagatu kaukwau bila ibugiki. Komwaidona minasina isim kwaibakwaisi. Kidamwa kwaibakwaisi kweyalilalai deli kʹasi ikasuyumalaisi oluvi ikomvauwaisi, deli komwaidona minasina kukweyavasi kaikesi e isim misikwaikwesi. E availa bikau mauna minasina bogwa leikaligasi, matauna ibodi biwini kala kwama miyasina eisisikoma, mitaga matauna bogwa wala eiyogwali titoulela e bisisu wala topupagatu kaukwau bila bibugiki.

²⁹Kwakwau, kikoni navakaveka deli nakikekita, ketata, kainavasia, minasina napupagatu.

³¹Kidamwa availa bikabikoni minasina igau nammomova kaina bogwa eikaligasi, matauna bogwa eiyogwali titoulela, e bisisu wala topupagatu kaukwau bila bibugiki.

³²Deli kidamwa bogwa eikaligasi e uwosi bikanakaila avai vavagi, vavagi makwaina bogwa eiyopigigatu. Vavagi makwaisina makawala, kai, karekwa, guguwa eiyodulokaisi metoya mauna kanuvinesi, kaina avai karekwa wala, avai paisewa wala ibudoki paila guguwa makwaisina bivigakaisi. E vavagi makwaina ibodi wala bitavidagwaisi wa sopi bigigadi, mitaga bisisu wala kwepupagatu bila bibugiki.

³³Deli kidamwa uwosi bikapusisi bila olumoulela kwelatala kulimoya, avai vavagi olumoulela makwelana bogwa eiyopigigatu, e kulia makwelana ibodi wala bikatumimisaisi.

³⁴E avai kaula ibudoki paila kamkwam mitaga kidamwa sopi metoya kulia makwelana bukuligabwaisi kaula makwaina, bogwa lokuyogwalaisi kaula, deli avai sopi kami sopi olumoulela kulia makwelana, baisa bogwa wala lokuyogwalaisi.

³⁵Avai vavagi wala mauna minasina uwosi bikabikonaisi bogwa eiyopigigatu kailagila kaina kumkumla, e ibodi bukukwatumimisaisi kailagila makwaisina deli bukukwalidubolaisi kumkumla makumlona.

³⁶Ilagoli vavagi komwaidona bikabikoni uwosi mauna minasina nakakaliga bogwa eiyopigigatu, mitaga utuwotu kaina avai vavagi ketaikotela sopi migileu wala bisisu.

³⁷Kidamwa avai mauna nakaliga e wowola bikogiaki yagogu makwaina bisapwaisi, e yagogu makwaina kwemigileu wala.

³⁸Mitaga kidamwa yagogu makwaina wa sopi bigigadi e natana minasina bogwa eikaliga wowola bikapusi bikogiaki yagogu makwaina bogwa wala eiyopigigatu.

³⁹Kidamwa availa bikabikoni avai mauna minana ibudoki kamkwam bogwa eikaliga, matauna bogwa eiyogwali titoulela, e bisisu wala topupagatu kaukwau bila bibugiki.

⁴⁰E availa bikoma avai kakasili wala metoya mauna minana, matauna ibodi biwini kala kwama, mitaga bisisu wala topupagatu kaukwau bila bibugiki. E availa bikau uwosi minasina nakakaliga ibodi biwini kala kwama, mitaga bisisu wala topupagatu kaukwau bila bibugiki.

⁴¹Yokomi gala ibodi bukukomasi natana mauna minasina nakikekita maunela pwaipwaia,

⁴²kaina minasina nasigisagina, kaina minasina naliloula, kaina minasina nateteta.

⁴³Gala bukuyogwalaisi titoulemi metoya bukukomasi minasina mauna.

⁴⁴Yeigu Guyau mi Yaubada, ibodi bukukwabomaimi titoulemi, paila yeigu Tobumaboma.

⁴⁵Yeigu wala Guyau mayeigu goli lavisunupuloiyaimi mapilana Itipita, e yeigu wala mi Yaubada. Mapaila ibodi bukukwabomaimi, paila yeigu Tobumaboma.

⁴⁶Ka, baisa kasi karaiwaga mauna komwaidona naliloula deli nayoyowa deli goli komwaidona maunela bolita, e komwaidona maunela pwaipwaia.

⁴⁷Yokomi ibodi bukumitakavataisi bibwaina metoya avaka migileu deli avaka pupagatu, deli metoya avai mauna minasina ibudoki kamkwam e avai mauna minasina gala ibudoki kamkwam.