Read Kilivila TOLULA 18 Bible Online

TOLULA 18 - Kilivila bible

TOLULA 18

¹E Guyau iluki Mosese

²biluki mina Isireli kawala, “Yeigu goli Guyau mi Yaubada.

³Gala bukukwavisakaisi si bubunela mina Itipita, mapilana goli okwaitala lokusisuaisi okatupipi, kaina bukukwavisakaisi si bubunela mina Kenani, ambaisa balauwaimi tuta baisa.

⁴Ibodi bukukwabikuwolaisi ulo karaiwaga deli kuvagaisi avaka bakaraiwogaimi. Yeigu goli Guyau mi Yaubada,

⁵mapaila kukwavisakaisi avaka lalukwaimi deli kuvagaisi avaka ulo karaiwaga lakaraiwogaimi; paila kidamwa bukuvagaisi makawala bukumovasi. Yeigu goli Guyau.”

⁶E Guyau iluki karaiwaga makwaisina. Gala bukumokaia dalem titoulem.

⁷Gala goli bukuyomsili tamam metoya bukumokaia inam tatoum. Gala goli bukuyomsili inam tatoum.

⁸Kidamwa tamam la kukova bidubadu, gala bukumokaia minasina.

⁹Gala bukumokaia lumta tatoum kaina lumta minana inala ituwoli e tumamiga taitala, kaina omi kaukweda tumami eiuni kaina ituwoli kaukweda.

¹⁰Gala bukumokaia tabum vivila, minawena latum latula, paila baisa bukuyomsilaim wala titoulem.

¹¹Deli kidamwa tamam bivaivau e biuni latula vivila, gala bukumokaia minana, paila minana lumta goli.

¹²Gala bukumokaia tamam luleta kaina inam tuwala deli bodala.

¹⁴Gala bukumokaia kadam la kwava paila minana bukudoki inam goli.

¹⁵Gala bukumokaia latum la kwava

¹⁶kaina tuwam kainaga bodam la kwava.

¹⁷Gala bukumokaia latula kaina tabula vivila minana bogwa lokumokaiabogwi; paila minasina buyavim, paila baisa bivigaki bogwa lokukwavi kam kwaboma titoulem.

¹⁸Kidamwa m kwava igau namomova isisu gala bukubuluvavaia bodala kaina tuwala.

¹⁹Gala bukumokaia vivila minana igau wala buyavila eititalagila paila minana saina wala napupagatu.

²⁰Gala bukukwailasi som la kwava paila baisa bukuyogwalaim wala titoulem.

²¹Gala bukutugwali taitala latum bigubukwaisi lula baisa yaubada tokolu yagala Moleki, paila baisa bivigaki saina kabommosila oyagala Guyau Yaubada.

²²Gala ibodi tau bimisii sola tau, paila Yaubada ikamogi nanamsa makawala.

²³Gala tau kaina vivila ibodi bikatumwakula deli mauna, paila nanamsa makwaina saina doudoga biyopigigataim titoulem.

²⁴Gala bukuyogwalaimi titoulemi metoya kwaitala nanamsa makwaisina, paila baisa makawala matausina gala inikolaisi Yaubada leiyogwalaisi titoulesi, matausina goli leisibogwasi ovalu mapilana, e Guyau igau bibokavili bibutusi igagabilaga yokomi bukusuvisi.

²⁵Si kedakeda gaga ivigaki iyopigigataisi valu mapilana, mapaila Guyau imipuki valu mapilana, e tomotala eisisuaisi ivabutu ibutusi, kidamwa goli yokomi bukusuvisi mapilana.

²⁶Matausina eivagaisi vavagi komwaidona makwaisina saina kabokakayuwa e ivigaki iyopigigataisi valu mapilana, mitaga yokomi gala wala ibodaimi bukuvagaisi vavagi makwaisina. Komwaidomi wala kaina yokomi mina Isireli kaina togilagala matausina eisilomlasi deli yokomi, ibodi bukukwabikuwolaisi Guyau la karaiwaga avaka leikaraiwogaimi,

²⁸e valu mapilana gala bipakaimi makawala leipaiki matausina tosibogwa gala inikolaisi Yaubada.

²⁹Bogwa kunikolaisi kidamwa availa bivagi kwaitala vavagi makwaisina saina kabokakayuwa, matauna gala tuvaila bidokaisi taitala Yaubada la tomota.

³⁰E Guyau ikaibiga kawala, “Kukwabikuwolaisi karaiwaga makwaisina lasakaimi, e taga bukubokulaisi si kedakeda tomota matausina eisibogwasi valu mapilana, deli taga bukuyogwalaimi titoulemi metoya bukukwavisakaisi kwaitala vavagi makwaisina. Yeigu wala Guyau mi Yaubada.”