Read Kilivila YEREMAIA 12 Bible Online

YEREMAIA 12 - Kilivila bible

YEREMAIA 12

¹“Mwa Guyau, kidamwa bakominimani deli yoku paila kwaitala ulo sula, yoku bogwa bukunagi vavagi kala duwosisia. Mitaga ibodi wala bakatupoiyaim paila karaiwaga duwosisia. Avaka paila mina mitugaga saina ikobaluluwa si kaisisu? Avaka paila mina sisasopa iiyubwailasi?

²Yoku kuvali matausina e italolasi, ikaitubwasi e iuwasi. Matausina tuta komwaidona kasi udokaiwa bililivalaimsi, mitaga gala ikaiki uwosi paila yoku.

³Mitaga yoku Guyau bogwa kunikolaigu; e kugigisi avaka lauvagi, deli ammakawala ayebwailim. Kubititani matausina kulau makawala sipi makateki biyalaisi; e kuiyamati wala matausina tatoula bibudoki si tuta paila bikatumataisi.

⁴Ammakawala kala kaduwonaku meilili bikau oma valusi, deli mnumonu wa bagula bimmwailelasi wala? Mauna nasigisagina deli nayoyowa eikikaligasi wala, paila uula ma tomotasi si mitugaga, matausina goli ikaibigasi kawasi, ‘Yaubada gala igigisi avaka leitauvagaisi.’”

⁵E Guyau ilivala kawala, “Yeremaia, kidamwa tomota bikalisauwaimi sakaula, ammakawalaga bukuvigaki bukukwalisau wosa osi sakaula? Kidamwa gala ibodi bukutuvaluwa olumoulela valu vilouwokuva, ammakawalaga bukuvigaki bukutuvaluwa oudilela Waya Yoridani?

⁶Ilagoli tuwamwa budamwa, matausina goli dalem tatoum bogwa eikoulovaimsi; matausina ikatukwaitalasi bikabiliasi deli yoku. Gala bukudubumi matausina, ilagoli matausina ililivalasi bigabwaila.”

⁷E Guyau ilivala kawala, “Ka yeigu bogwa lasilavi Isireli; matausina goli ulo boda tatougu lanagi bogwa lakoulovi. Yeigu bogwa lakasali matausina ulo tomota ayebwaili oyumasi kasi tilaula.

⁸E ulo tomota tatougu bogwa eikosomapwaigusi; makawala natana laiyoni olawodila matausina eikagotaigusi e mapaila yeigu avigaki matausina mina kukologu.

⁹Ka ulo tomota tatougu matausina makawala natana mauna nayoyowa, e mluveka bivaulaisi bivapataisi. Kudouwaisi mauna nagigasisi bimaisi wa paka takamsi!

¹⁰Bidubadu tokaraiwaga mitawasi bogwa eikodidaimisi ulo bagula bigulela waini; matausina eivatutaisi wala ulo bagula eimoiyaisi iligaimwaisi; ulo kwabila bilukumalala ivigakaisi eimila viloupakala.

¹¹Matausina eivigakaisi mapilana eimila bidapakala wala; e vilouwokuva wala lagigisi eitotu. Valu pilamwaidona bogwa eimila viloupakala, e gala wala availa ikaiki wowola avaka bivagi.

¹²Okoyala viloupakala pilamwaidona tomotala leimaisi paila bilebwaisi valu. Yeigu labubuli kabilia paila bikodidaimisi valu pilamwaidona; gala availa ibodi bisisu bwaina.

¹³Ulo tomota isapwaisi kasi yagogu, e kabinaila itaiyauwaisi mnumonuwokuva wala; saina tokwaibagula, mitaga si kaibagula gala wala dimlela. Metoya ogu gibuluwa mmayuyula avigaki komwaidona kasi yagogu tamkwayayogwa wala. Si bagula gala wala kabinaila.”

¹⁴Guyau eilivala kawala, “Ka, balivala paila mavilousina valu otalila Isireli, matausina goli leikodidaimisi mapilana valu lasaiki ulo tomota mina Isireli. Yeigu basabu matausina mina mitugaga metoya osi valu makawala kai leikosabwaisi, e bakoliga mina Yuda metoya baisa matausina.

¹⁵Mitaga avai tuta bogwa babutugigai matausina, igau tuvaila banokapisi matausina. E yeigu bakaimilivau boda makwaisina kwaitala kwaitala balau osi pwaipwaia deli osi valu tatousi.

¹⁶E kidamwa bogwa leikatotusi metoya oninasi komwaidona e bidubumaisi si tapwaroru ulo tomota deli bilivalasi biga katotila mwau kawasi, ‘Mokwita goli Guyau Tosivagasi’ - makawala matausina okwaitala eivakadaisi ulo tomota bilivalasi biga katotila mwau oyagala Beali - oluvi yeigu bakommoli matausina e bavigaki ulo tomota tatougu e bisibwabwailasi.

¹⁷Mitaga kidamwa avai boda mabudosina gala bikabikaulasi, yeigu basabu matausina e bakatumtuwoli wala. Ka, yeigu Guyau bogwa lalivala.”