Read Kilivila YEREMAIA 15 Bible Online

YEREMAIA 15 - Kilivila bible

YEREMAIA 15

¹E Guyau ilukwaigu kawala, “Kaina goli Mosese sola Samwela bitotusi otaligu e bikayubabaisi baisa yeigu, mitaga gala wala sitana banokapisi matausina. Mapaila kuvabutu bilosi ambaisa. Kuvabutu bibutusi metoya omatagu.

²E kidamwa bikatupoiyaimsi ambaisa bilosi, kuluki avaka yeigu bogwa lalivala, kawagu. Availa availa ibodi bikaligasi metoya wa lelia, e bogwa bikaligasi makawala. Availa availa ibodi bikaligasi metoya okabilia, e bogwa bikaligasi makawala. Availa availa ibodi bikaligasi metoya molusaula, e bogwa bikaligasi makawala. E availa availa ibodi bikatupipaisi bilauwaisi, e bogwa wala bivigakaisi makawala!

³Ka! Yeigu Guyau bogwa lavitobu nanogu baisa makawala. Kwaivasi kwemigigaga pakula bikaloubusi baisa matausina. Matausina bikaligasi metoya okabilia; e kaukwa bikatitaiwaisi uwosi bilauwaisi; mauna nayoyowa bimaisi bikomasi uwosi; e avaka kesala, mauna nabubolodila bimaisi bikamkulovaisi.

⁴Yeigu bavigaki mina watanawa komwaidona bimmakiusasi baisa matausina, paila avaka Esekaia latula Manasa eiuvagi[26] metoya Yerusalem, matutona eiguguyau mapilana Yuda.”

⁵E Guyau ikaibiga kawala, “Mina Yerusalem, availa kudokaisi binokapisaimi, e availa bivilamwaimi? Kaina availa kudokaisi sitana bitokailimi e bikatupoiyaimi kawala, ‘Tauwau, ammakawami?’

⁶Ka! Yokomi bogwa wala kupakaigusi, e bogwa wala kutotubulokaigusi. Mapaila lavitukoli yamagu e lakatudoumwaimi, paila bogwa lasomata yayosa agu leiya.

⁷Metoya valu kwaitala kwaitala omi valu yeigu akatusouwaimi alavaimi makawala wawa. Yeigu akatumataimi, yokomi ulo tomota, e akatumati litumia, paila uula yokomi gala wala kuligaimwaisi mi kedakeda gaga.

⁸Kwabuya omi valu saina bidubadu, ikalisauwaisi kala bidubadu kanakenuva olumata. Yeigu akatumati tauwau avai tuta wala eiyuwoulasi, e avigaki inisia saina ivilumgwagasi. Saina wala nanakwa amiaki minasina si ninamwau deli kasi kokola.

⁹E vivila minana litula tailima taiyu eikaligasi, bogwa eiwaki mota deli eimata wowola. Minana nanola bogwa wala eitaboduvagasi, kala mmosila deli nanola kala mwau ibulokatuwoli wala minana. Ka, availa availa yokomi kesala tommomova, yeigu batugwali kami tilaula bikatumataimi. Ka, yeigu Guyau bogwa lalivala.”

¹⁰O gugwesila wowogʹei! Avaka paila inagu eiunaigu? E baisa tuta bwaina wala bauvatai deli bakominimani deli tomota komwaidona. Yeigu gala wala awasi kaina anigadi si mani tomota, mitaga komwaidosi wala ikavilakaigusi biga mwau.

¹¹Mwa! Guyau, ka - mokwita goli yeigu lavigibau wotetila baisa yoku, kadai! E avai tuta agu tilaula eibodasi mwau deli mmayuyu, yeigu bogwa lanigadi kasi pilasi metoya baisa yoku. Ka, kidamwa gala makawala, ibodi si biga mwau bivigakaigu makawala ninasi!

¹²(Ka, gala availa ibodi bikouwoli tanumnumta aiyani, e isiligaga goli tanumnumtela opiliyavata,[27] makaina eikatugulikaisi deli barasi, e makaina kala kowoula saina mwaugaga.)

¹³E Guyau ilukwaigu kawala, “Ka, yeigu bogwa bawitali tilaula bilosi e bilebwaisi bilauwaisi komwaidona si guguwa deli si veiguwa ulo tomota, e baisa bikibuboti kasi mipuki paila uula mitugaga makwaina bogwa eiyomitulaisi olopola valu.

¹⁴Yeigu bavigaki matausina biwotitalaisi kasi tilaula metoya valu mapilana gala avai tuta inikolaisi, paila ulo gidaleiya makawala kovatala kova bikakata wala gala avai tuta bimata.”

¹⁵E yeigu akaibiga kawagu, “Guyau, bogwa kukwateta paila baisa. Mapaila kululuwaigu deli kupilasaigu. Ibodi wala bakau lugwagu baisa matausina eiwawaigusi. Mwa! Taga kuminumki matausina, kuvagi kuwonana sitana, mitaga kidamwa gala, bogwa wala bikatumataigusi. Guyau kululuwai, matausina eikagagaigusi paila goli yoku.

¹⁶Guyau, yoku Yaubada Topeuligaga, yeigu goli m touwata, yoku kulilivala baisa yeigu e komwaidona m biga alilagi wala iwokuva. Mapaila m biga bogwa eiyomwasali nanogu deli ulo kabomwasawa.

¹⁷Ka, yeigu gala wala ayomadi ulo tuta deli tomota ituwoli kagigigilasi deli kayousokanasi wala. Mitaga yeigu akabikuwoli m biga, yeigu asisu wala agumwaleta deli agu leiya.

¹⁸Mwa! Avaka paila bwaina wala balumkoli mmayuyu makawala? Avaka paila agu pwasa gala nani bibwainasi? Avaka paila gala bukutuvi? Ki, kaina nanom mwada bukuyomwauwaigu, makawala waya bimada otutala waigigi ke?”

¹⁹E mapaila Guyau ivitakaula, kawala, “Ka! Kidamwa bukuninavila, yeigu bakaimilivauwaim e bavigakaim ulo touwata tuvaila, deli kidamwa bukusim bigatonamakava e kaimapulaga bukukwamituli ulo biga, e yeigu bavigakaim ulo tovitoubobuta tuvaila. E yoku bukusisu wala gala bikaiki wowom paila bukulokaia matausina. Mitaga matausina wala bimakaiamsi.

²⁰Yeigu bavigakaim makawala pilatala taboda mapilana barasiwokuva wala saina pilakasai. Matausina bikabiliasi deli yoku mitaga gala wala bitomgwagasi odabam. E yeigu basikailim paila bakolaim deli bayamataim.

²¹Yeigu bakolaim metoya osi peula tomitugaga deli togigasisi. Ka, yeigu Guyau bogwa lalivala.”