Read Kilivila YEREMAIA 18 Bible Online

YEREMAIA 18 - Kilivila bible

YEREMAIA 18

¹E Guyau ilukwaigu, kawala,

²“Mwa! Bukula ola bwala towai kulia, e metoya baisa yeigu balukwaim ulo biga.”

³Mapaila yeigu alokaia ola bwala towai kulia e agigisi matauna eiwawai kulia.

⁴E avai tuta kwelatala kulia makwelasina leiwawaiya bigisi gala ibudoki nanola, matauna bikimkumku e mlomwaluva bivigaki ituwoli vavagi.

⁵E Guyau ilukwaigu kawala,

⁶“Ka, ikwanaigu goli bavigakaimi mina Isireli makawala matauna towai kulia eivigaki la mlomwaluva kadai? Ka, yokomi lokusisuaisi oyamagula, makawala goli mlomwaluva isisu oyamala towai kulia.

⁷E kidamwa avai tuta balivala mwada yeigu bogwa basabu, bavakubali kaina bakodidaimi avai boda kaina avai kabokwaraiwaga,

⁸mitaga oluvi boda makwaina bininavilasi metoya osi mitugaga, yeigu galaga bavagi avaka lalivala mwada bavagi.

⁹E tuvailaga, kidamwa balivala mwada yeigu bogwa bavali kaina bakaliai kwaitala boda kaina kabokwaraiwaga,

¹⁰mitaga oluvi boda makwaina bikoulovaigusi deli bimitugagasi, yeigu galaga bavagi avaka lalivala mwada bavagi.

¹¹Mapaila kuluki mina Yuda deli Yerusalem yeigu bogwa laninamsi kasi gaga, deli lakatubaiasa paila bamipuki matausina. Kuluki matausina bikilavaisi kidikedala mitugaga makadasina leiyosisi. Ibodi bivigivauwaisi si kedakeda deli vavagi makwaisina leiuvagaisi.

¹²E matausina bivitakaulasi kawasi, ‘Gala wala avaka uula bakasivilasi kadai? Ka, komwaidomasi wala bitaboduvagasi ninamaisi deli bakauvagaisi wala avai mitugaga wala magimasi.’”

¹³E Guyau ilivala kawala, “Ka, mina Isireli bogwa eivagaisi kwaitala vavagi saina gaga! Mapaila takatupoi mina watanawa, ki, avai vavagi makawala baisa ikaloubusi avai tuta ke?

¹⁴Ki, avai tuta sitana Lebanoni raibwagela odabala gala isim numlela, deli sopi eititayelu saina tula metoya wa koya avai tuta sitana imada ke?

¹⁵Mitaga ulo tomota bogwa goli leilumwelavaigusi, e leigubugabusi lula maiina simasimina baisa minasina tokolu. Matausina bogwa eiulilavaisi keda makadana ibodi bilokaiasi, e gala tuvaila ibokulaisi kaduwala. E iuwovilasi ilosi osi kaduvapwala titoulesi.

¹⁶E matausina bogwa eivigakaisi valu makwaina makawala kwaitala vavagi saina kabokakayuwa, e kidamwa bipakaitulaisi goli. E availa availa bisukwaiwaisi valu makwaina, bogwa bimmakiusasi paila avaka bigisaisi, e bikatugougeunasi wala paila bogwa bitutuvakau ninasi.

¹⁷E makawala yagila bomatu biuu bima biyuvisau tubumyou, e makawala goli yeigu babutugigai ulo tomota bilosi omitasi kasi tilaula. Yeigu batotubuloki matausina. E avai tuta kabosilagi bima, yeigu gala bapilasi matausina.”

¹⁸Oluvi, tomota ikaibigasi kawasi, “Tauwau, kumaisi takeiwalaisi Yeremaia! Ka, tolula eisilabasi wala paila bikamitububulasi avaka avaka baisa yakidasi, e tokabitam eisilabasi paila bikiduwosisiaidasi, deli goli tovitoubobuta paila bikamitulaisi Yaubada la biga. Tauwau, kumaisi tatabinakaisi avai vavagi wala, e gala tuvaila bitalagaisi avaka bilivala.”

¹⁹Mapaila yeigu anigada kawagu, “Guyau, kulagi avaka alilivala deli kunakaigali avaka agu tilaula eikikeiwalaisi paila yeigu.

²⁰Ki, mapula vavagi bwaina mitugaga wala kaina? Ka, matausina eileiyasi agu sowa mwada biyogagaigusi. Mwa Guyau! Kululuwai oliloutala lamakaiam e lakayubabai baisa yoku, mwada gala bukuyogagi matausina metoya om gibuluwa.

²¹Mitaga Guyau, tuta baisa ibodi molusaula bikimati litusia, deli bikaligasi okabilia. E nunumoya binakakausi deli binamakapusi, e lelia bikimati tommoya, deli tubovau tauwau bikaligasi okabilia.

²²E kuwitali budotala boda bimaisi e bivapulosaisi matausina e bikodidaimisi si valu. E bukuvigaki matausina bivalamsi deli kasi kokola. Ka, matausina bogwa eileiyasi agu sowa mwada biyogagaigusi, deli eileiyasi agu sikula mwada biyosigusi.

²³Mitaga Guyau yoku bogwa kunikoli komwaidona avaka eikikeiwalaisi paila ulo kaliga. Mapaila taga kuligaiwa si mitugaga kaina bukulumwelavi si sula. E kuvigaki bimamasi goli omatam, deli igau wala deli m gibuluwa kuvagi avaka nanom baisa matausina.”