Read Kilivila YEREMAIA 2 Bible Online

YEREMAIA 2 - Kilivila bible

YEREMAIA 2

¹E Guyau ilukwaigu

²bakamituli la biga baisa komwaidosi mina Yerusalem, kawala, “Ka, igau otubovaumi yeigu[9] aluluwaimi yokomi saina kukwamiabaigusi, deli mi yebwaili baisa yeigu gala bitakaibiga, makawala natana vivila biveyawasi sola la mwala. Lokubokulaigusi oviloupakala, mapilana valu gala kwaitala tuta availa ibiguli.

³Mina Isireli, yokomi ulo tomota tatougu. Yokomi goli ulo veiguwatoula mokwita. Availa availa iyogagaimi, yeigu awitali kabommayuyu deli kabosilagi baisa matausina. Ka, yeigu Guyau bogwa lalivala.”

⁴Tubula Yekobe, yokomi dalela Isireli, kunakaigalaisi Guyau la biga.

⁵Ka! Guyau eikaibiga, kawala, “Avai sula lavagi e tubumia eitabinakaigusi? Kaina avaka avigaki matausina e eitotubulokaigusi? Ka! matausina ititaimamilasi wala baisa tokolu gala dimlesi, e metoya osi taimamila ivigakaisi titoulesi gala wala dimlesi.

⁶Mitaga matausina ivigakaigusi yeigu gala wala avaka, ilagoli yeigu lakoli matausina metoya Itipita, e lavakadi lamai oluwalela vilouwokuva wala mapilana oviloupakala deli koyala kanakenuvawokuva wala, saina lubulabu deli kabosilagi, e gala tomotala, deli gala availa ibodi bilokaia mapilana.

⁷Yeigu amai matausina e asaiki si pwaipwaia makubilana saina kubilumalala, paila bimwasawasi metoya kala kabinai deli goli avai vavagi bwaina isisu. Mitaga kaimapula matausina ikevilugwaisi wala ulo pwaipwaia deli iyogwalaisi wala valu makwaina yeigu bogwa lasaiki.

⁸Tolula gala sitana ikatupoisi, ‘Ambaisa Guyau?’[10] Matausina goli ulo tolula tatougu mitaga gala wala inikolaigusi. Tokaraiwaga ikosomapwaigusi, e tovitoubobuta ivitoubobutasi oyagala Beali,[11] deli itemmalaisi tokolu gala dimlesi.”

⁹Mapaila Guyau ikaibiga kawala, “Ka! yeigu bakamituli kasi pakula ulo tomota. Yeigu tuta oluvi basaili litusia oyakala.

¹⁰Ka! kusuwa opilikwaibwaga, e bukula osimlela Saipirosi, e kuwitali taitala bisum opilibomatu, e bila oviluwela Kedara. E bukugisi kidamwa gala wala avai vavagi avai tuta ikaloubusi makawala.

¹¹Ka, gala avai boda avai tuta ikatumapwaisi si yaubada, ilagoli minasina gala yaubadatoula. Mitaga ulo tomota bogwa eikoulovaigusi, e eiyosisiga yaubada minasina gala ibodi bivagaisi avai vavagi paila matausina, ilagoli yeigula Yaubada mokwita lavigaki bitemmalaisi matausina tomota ituwoli ituwoli.

¹²Mapaila yokomi mina labuma, ibodi bisinudunudu uwomi paila baisa, e bivigaki biyowa lupomi deli bikiuta ninami,

¹³paila ulo tomota bogwa eiyomitulaisi kwaiyu mitugaga. Matausina bogwa eitotubulokaigusi, yeigu kasi sopi yeluyelu tuta tuta, e ikelisiga kasi utuwotu titoulesi makwaisina gala avai tuta sitana sopi bilodu.

¹⁴“Yokomi mina Isireli gala ula, e gala lokukwaloubusisi metoya okatupipi, kadai! Mitaga avaka uula kami tilaula eiuwaigimi ke?

¹⁵Kami tilaula eiguuvavilasi baisa yokomi makawala laiyoni; matausina iyogagaisi mi pwaipwaia, e makawala goli viloupakala wala, deli mi valu dadaimiwokuva wala, e gala ibodi bukusikailisi.

¹⁶Mokwitala, matausina tolesi Mempisi deli tolesi Tapanesi[12] leimaisi e leikatuvaisi pwanetasi ulo tomota.

¹⁷Mina Isireli, titoulemi wala lokumiakaimi vavagi makwaisina kadai! Ka, mwada yeigula Guyau mi Yaubada e lauvakadaimi okedatoula, mitaga yokomi kupakaitulaigusi mokwita.

¹⁸Ka, lokulolosi Itipita, avaka kudokaisi bukubanaisi kala bwaina, e bukumomomsi sopila Waya Naili ke? Deli lokulolosi Asiria, avaka kudokaisi bukubanaisi kala bwaina, e bukumomomsi sopila Waya Yupereiti ke?

¹⁹Ka, mi mitugaga titoulemi bimipukwaimi, e mi totuboulola baisa yeigu bogwa bikamogaimi. E yokomi bukunikolaisi ammakawala kala yayana deli kala gaga kidamwa bukusilavaigusi yeigu Guyau mi Yaubada, e mwada gala tuvaila bukukwabikuwolaigusi. Ka, yeigu goli Guyau Giyouveka Topeuligaga bogwa lalivala.”

²⁰E Guyau Yaubada eilivala kawala, “Mina Isireli, omitibogwa yokomi kukoulovaisi ulo karaiwaga, yokomi kupakaisi bukukwabikuwolaigusi deli bukutemmalaigusi. E kulosiga wa koya makwaisina kwevakaveka deli osikowasi kai makaisina eitumkikitasi e baisa kutitaimamilasi baisa yaubada nagowa.

²¹Tauwau, yokomi lavalaimi makawala tamtala tamkwatukila waini metoya matamna dilimoya, kadai! Mitaga igau kugisaimi titoulemi! Yokomi makawala matamsina diligaga, gala dimlesi.

²²Kaina goli bukukwakaiasi deli youloʹula mitaga yeigu bagigisi wala pikolela uwomi.

²³Ki, ammakawalaga lokulivalasi mwada yokomi gala wala kuyogwalaimi, e mwada gala avai tuta kutemmalaisi Beali ke? Ka, kugisaisi ammakawala mi bubunela gaga oitayatila, e kugisaisi avaka lokuuvagaisi. Yokomi kuvigakaimi makawala natana kaukwa navivila ola tuta katumwakula, e minana bititavina wala,

²⁴e minana bogwa eikabitutuki bititowa wala bititoma. Avai tuta minana la tuta katumwakula, availaga ibodi bisilibodi minana ke? E namwala gala wala bibodi binevi minana, paila minana navivila bogwa wala eititobogwa.

²⁵Mina Isireli, taga iwaiya kaikemi, kaina bikipakali kaiyomi mwada bukunainevisi minasina ituwoli yaubada. Mitaga ka, mi biga kawami, ‘Gala! galaga bakatovilasi. Bogwa lakayebwailisi nammitawasi yaubada e bakabokulaisi wala minasina.’”

²⁶E Guyau ikaibiga kawala, “Mina Isireli, komwaidomi wala biulikaimi mmosila, mi gweguya, kaidadala valu, tolula, deli tovitoubobuta, makawala toveilau bilumkoli kala mmosila avai tuta biyosisi.

²⁷Ka! yokomila kai kudokaisi tumami e dakuna kudokaisi inami[13] — komwaidomi wala biulikaimi mmosila. Baisa bikaloubusi uula gala kutovilakaigusi mitaga kaimapula kutotubulokaigusi. E avai tutaga kubudobodasi mwau kunigadaigusi mwada bama bakatumovaimi.

²⁸“Woo! Taga amminasina yaubada lokububulokaisi yumami? Ka! Kidamwa ibodi bikolaimi avai tuta kubudobodasi mwau, bwaina kudouwaisi bimaisi bikolaimi, kadai! Mina Yuda, yokomi saina bidubadu mi yaubada makawala mi valu kala bidubadu.

²⁹Tauwau! Avaka uula kutakulukulusi baisa yeigu? Deli, avaka uula kukosomapwaigusi?

³⁰Ka! yeigu amipukwaimi, mitaga gala wala kulumkolaisi avaka kala bwaina mipuki, deli gala kutagwalasi yeigu bakiduwosisiaimi. Yokomi makawala laiyoni nagigasisi e kukwatumataisi mi tovitoubobuta.

³¹Ka! mina Isireli kunakaigalaisi avaka yeigu lalilivali. Avaka uula kulilivalasi, mwada desi wala avaka ninami titoulemi bukuuvagaisi, e gala avai tuta bukukwaimilavausi bukumakaiagusi? Ki! kaina yeigu towokuva wala gala avai pilasi apilasaimi, e kami lumkola makawala kuwowausi odudubila mapilana saina kabosilagi bidubadu kaina?

³²Ki! kudokaisi natana natubovau ibodi bilumwelavi kala katubaiasa, kaina navaivau ibodi bilumwelavi kala katubaiasa ola tuta veivai? Mitaga yokomi ulo tomota bogwa wala kulumwelavaigusi saina bidubadu yam gala gagabila bitakalau.

³³Paila yokomi bogwa wala kunikolaisi kidikedala ulatila, e avai tuta minasina saina nakalimwala bigisaimi bogwa wala bitakutaisi mi kidakeda.

³⁴Ka! kami kwama buyaviwokuva wala eiyatunutunu, buyavisi tonamakava deli tobubwaila, e galaga buyavisi touveilau. “E gala uwolela kami mmosila,

³⁵yokomi lokulivalasi kawami, ‘Yakamaisi tomitukwaibwaila wala, e Guyau gala tuvaila bigibuluwaimasi!’ Mitaga ka! yeigu wala, yeigu goli Guyau bamipukwaimi paila kuyakalaimi titoulemi mwada gala wala kumitugagasi.

³⁶Ka, bogwa wala lokuvabwaimi titoulemi avai tuta kutemmalaisi si yaubada boda ituwoli ituwoli. Ka! igau mina Itipita biyogibuluwaimi makawala mina Asiria leivigakaimi.

³⁷E yokomi bukusilumwagudusi deli kami mmosila e bukusilavaisi Itipita. Paila yeigu bogwa lakoulovi matausina lokudubumaisi, e gala wala avai pilasi bukubanaisi metoya baisa matausina.”