Read Kilivila YEREMAIA 4 Bible Online

YEREMAIA 4 - Kilivila bible

YEREMAIA 4

¹Guyau ikaibiga, kawala, “Mina Isireli, kidamwa magimi bukusivilasi, kwaimilavausi baisa yeigu. Kidamwa bukukimadagisi baisa yeigu, e kuligaimwaisi minasina tokolu yeigu nakukologu.

²Ibodaimi wala bukukwatotilasi oyagagu. E oluvi boda komwaidona binigadasi mwada bamitukwaii matausina e biyakawolaigusi goli.”

³Guyau iluki tomotala Yuda deli Yerusalem, kawala, “Kupulaisi mi bagula, e gala bukusapwaisi kami yagogu oluwalaisi kaigunigwaini.

⁴Kuyamataisi mi kabutu deli yeigu, mi Guyau, e yokomi mina Yuda deli Yerusalem kwabomaimi titoulemi baisa yeigu. Kidamwa gala bukuvagaisi makawala, ulo gibuluwa bikata makawala kova, paila wala kumitugagasi, mapaila bilepa e gala taitala ibodi bikimati.”

⁵Kuyuvaisi tauya biliku valu. Kuwakulasi kaigaveka, deli kukwamlilaisi biga. Kulukwaisi tomotala Yuda deli Yerusalem, bisakaulasi bilosi oviluwela kalisi kwepapeula.

⁶Kukwavitusaisi kedala Saiyoni! Kusakaulasi paila bukukwalasi. Gala bukuyobilikaisi. Guyau bimai kabomwau deli katudoum metoya opiliyavata.

⁷Makawala laiyoni bima metoya okala lagi, taitala kala tokodadaimi boda bogwa eisilavi bima. Matauna bima bikodidaimi Yuda, e biligaim wala kwedidadaimi e gala availa bisiki mavilousina.

⁸Mi saigala kusikomasi kuvalamsi kwavinavinasi paila Guyau la gibuluwa saina tiganini gala wala bisilavi Yuda.

⁹Guyau ikaibiga, kawala, “Yam makwaina gweguya, la tosikwawa, si tuvaluwa bikitumouwaisi, tolula bitutu ninasi, e tovitoubobuta biyowa luposi.”

¹⁰Mapaila akaibiga, kawagu, “Guyau Towalakaiwa, ka - yoku mokwita lokusepuloki Yerusalem tomotala. Lokulivala mwada vakota, mitaga kema okaiyasi wala.”

¹¹Tuta bima, tomotala Yerusalem bilagaisi biga kidamwa yagila kweyuviyavi biuu bima metoya oviloupakala bimakaia matausina. Yagila makwaina gala biuu manum makawala yagila ibodi biyuvisau wawa wala.

¹²Yagila makwaina bima baisa Guyau la karaiwaga saina minimanigaga. Baisa Guyau wala titoulela ikikamituli kasi kamwaga la tomota.

¹³Kugisi, tilaula leimeimaisi makawala lowalowa. Si waga kaibibiu makawala tigiviviluwa, si wosa saina nagigigibula ikalisauwaisi mluveka. Yakidasi totamwau! Bitadoumlabasi!

¹⁴Yerusalem, kwatumigileu sula metoya olumoulem, e bukukolaim. Ammakawala kala kaduwonaku bukuninamsi mitugaga ninamsela?

¹⁵Touwata metoya mapilana Dani e metoya mapilana Koya Epereim ikamitulaisi bulogala gaga.

¹⁶Bimaisi bikamitilakaisi boda ituwoli ituwoli e bilukwaisi Yerusalem kidamwa tilaula bimaisi metoya valu saina kaduwonaku. Tilaula matausina bikawotaisi bikavilakaisi viluwela Yuda.

¹⁷E bivaulaisi bivapataisi Yerusalem makawala bagula kala toyamata, paila uula tomotela ikosomapwaisi Guyau. Guyau bogwa leilivala.

¹⁸Yuda, yoku titoulem wala lokuyomituli kam mwau metoya m bubunela gaga deli paila vavagi makwaisina lokuvagi. M mitugaga iyomituli mmayuyu makwaisina isisu olumoulem. Ka, bogwa leibasaim lokuboda saina mwaugaga olopom.

¹⁹Mmayuyu! Gala ibodi balumkoli mmayuyu makawala! Olumoulegu ilutulutu sainela, gala igagabila bakikwatu, balagi tauya e govala kabilia.

²⁰Kabomwau kwaitala bima bim oluvi kwaitala e valu viloumwaidona iviloudadaimi wala itotu. Da buliyoyovasi ikodidaimisi, e tabodala bwala itakisisi.

²¹Ammakawala kala kaduwonaku kabilia bagigisi wala bititokaia, e balagi tauya bitagilulu?

²²Guyau ikaibiga, kawala, “Ulo tomota mina ninagowa gala inikolaigusi. Matausina makawala gugwadi mina ninagowa gala wala inikolaisi avaka. Matausina kasi tovagi wala uvagila mitugaga biuvagaisi mitaga inanotasi wala uvagila bwaina.”

²³Agisi valu watanawa viloupakala wala, e wa labuma gala lumalama.

²⁴Agisi koya kwaivakaveka itatatuvasi, deli koya kwekikekita iigayegasi.

²⁵Tomota gala wala sitana agisi, e mauna nayoyowa makawala wala bogwa goli eibutusi ilosi.

²⁶Kwabila kubilumalala ivigaki imila viloupakala e valu vilouvakavekala bogwa idadaimisi, paila uula Guyau la gibuluwa.

²⁷(Guyau ikaibiga, kawala, “Valu watanawa komwaidona biviloupakala, mitaga gala paila bikatudidaimisi biwokuva.”)

²⁸Watanawa bivalam, labuma bidudubila, Guyau bogwa leilivala, e nanola gala bikatumapu, matauna bogwa ivitobu nanola makawala, e gala bivigivau.

²⁹Komwaidosi bisakaulasi bilosi avai tuta bilagaisi luluwasi tosisila wosa deli tokwabisi kaiyala. Mimilisi bisakaulasi bilosi oulaka, mimilisi bimwenasi oraibwaga, valu bisilavaisi vilouukuwokuva wala e gala availa bisikaili mavilousina tuvaila.

³⁰Yerusalem kapisim! Bogwa bukudoum. Avaka paila m sikam kwama bweyani? Avaka paila m sikam kuwa kwaikavikavila, deli kukuma matam? Kukwatububula wala gala dimlela, matausina lokuyebwaili bogwa eipakaimsi, magisi wala bikatumataimsi.

³¹Alagi valam makawala natana vivila eigigadi bitapoi yamala, e wakula makawala wala natana vivila kala vigavau eitapoi yamala. Baisa kaigala Yerusalem, iuwaki mota, iyosali yamala eikaibiga, “Bogwa badoum, bimaisi bikatumataigusi!”