Read Kilivila YEREMAIA 46 Bible Online

YEREMAIA 46 - Kilivila bible

YEREMAIA 46

¹Guyau ilukwaigu paila bulogasi boda ituwoli ituwoli,

²ivitouula Itipita. Baisa makawala avaka eilivala paila Neko guyoula Itipita la tokabilia matauna goli Nebukadinesa guyoula Babilonia eikalisau mapilana Kakemisi katitaikinela Waya Yupereiti olopola kwevasila kala taitu Yeoyakim eiguguyau Yuda.

³“Mina Itipita si kumatoula ikawotasi kawasi, ‘Kukwauwaisi mi vayaula e kukwatuwakedasi bukulousi kukwabiliasi!

⁴Kukwatubiasaisi mi wosa e kusilasi e kusikomasi kami kulupewa e kukwatudelisi! Kusimataisi mi kaiyala! Kusikomasi tabodala uwomi!’”

⁵Mitaga Guyau ikaibiga kawala, “Avaka lagigisi? Matausina deli wala kasi kokola eiuvayumilasi. Si tokabilia bogwa eikau kaikesi; kokola wala ikatumati, isakaulasi saina gigibula, gala ibodi bivakulokolasi.

⁶Matausina mina gigibula gala ibodi bisakauligilaisi tilaula; tokabilia komwaidona gala ibodi bikwalasi. E opiliyavata wa Waya Yupereiti, matausina isilubeibeusi ikapusisi.

⁷Ka, avai boda mabudona eikovaiguwasi leimaisi makawala Waya Naili bititayelu, kaina makawala kadatala waya eisuluwi papala komwaidona?

⁸Mavilouna goli Itipita eikovaiguwa leima makawala Waya Naili bititayelu, kaina makawala kadatala waya eisuluwi papala komwaidona. E Itipita ikaibiga kawala, ‘Bogwa bakoveiguwa bama e bakuboli valu watanawa; yeigu bakatudidaimi valu komwaidona deli tomotala.

⁹Kukwaraiwogaisi wosa bivaloulasi e waga kaibibiu bisakaulasi! Kuwitalaisi tokabilia metoya Sudani deli Libia matausina tokwabisi vayoula deli mina Lidia kasi tovagi luvalova kaiyala bilosi.’”

¹⁰Yam makwaina Guyau Giyouveka Topeuligaga la yam. yam lagaila bikeula kaimapu deli bimipuki kala tilaula. Matauna la puluta bikoma kala tilaula tatoula wala bilatali, e buyavisi bimomom wala tatoula bilakoli kaiyola. Yam lagaila mapilana opiliyavata opapala Waya Yupereiti matauna Topeuligaga bivigaki kala tilaula makawala lula kala gabu.

¹¹Mina Itipita, kulosi Giliadi kunevisi kaituva! Komwaidona mi kaituva gala dimlesi; gala wala ibodi bikatumovaimi.

¹²Boda komwaidona bogwa einakaigalaisi kami mmosila; tomota komwaidona bogwa eilagaisi mi valam. E taitala tokabilia bisilibeibeu bilokaia sola ikanuvateta, e kasitaiyu wala bikapusisi bilosi ikanawaisi opwaipwaia.

¹³Avai tuta Nebukadinesa guyoula Babilonia leima bikabilii mapilana Itipita e Guyau ilukwaigu kawala,

¹⁴“Baisa bukukwamituli mapilasina viluwela Itipita, mapilasina Migidoli, Mempisi deli Tapanesi. Kawam, ‘Kukwatubaiasasi paila kabilia. Mi vavagi komwaidona bogwa bidadaimi metoya baisa.

¹⁵Avaka uula Apisi matauna mi yaubada topeuligaga eikapusi? Ka, Guyau bogwa leiwaiya ikapusi ila opwaipwaia!’

¹⁶Mi tokabilia eisilibeibeusi ikapusisi. Taitala taitala iluluki sola kawala, ‘Nani, nani! Bitakaimilavausi bitalokaiasi da tomotasi, e bitakwalasi metoya osi kema tilaula!’

¹⁷“Matauna guyoula Itipita ibodi bitadoki igavau goli. Ka, bitadoki ‘Tokamnomwana Minimani Ikitumou La Tuta’.

¹⁸Yeigu goli Guyau Topeuligaga, mayeigula guyau. Yeigu Yaubada Tomomova. Koya Teibo dabala ikalisau koya komwaidona, e deli Koya Kamela itotubuloki walakaiwa odabala bolita. E makawala goli matauna igau bikabiliaimi la peula bikalisauwaimi.

¹⁹Yokomi mina Itipita, kukwatubaiasasi paila bogwa bilauwaimi okatupipi! Mempisi bimila viloupakala, bidadaimi e gala availa bisiki mavilouna.

²⁰Itipita makawala natana bulumakau saina naminabwaita, mitaga natana mdukovivia metoya opiliyavata leima biyokavati minana.

²¹Makawala vavila isakaula, tokabilia imaisi mitaga matausina makawala bulumakau nagugwadi gala si peula; matausina gala ivakulokolasi paila bikabiliasi, komwaidosi itovilasi isakaulasi. Yamla kasi katudoum bogwa eiviloubusi, matutona goli tutala kasi kodadaimi.

²²Itipita bisakaula, makawala natana keiyuna bisuyagila bila, avai tuta tilaula biuvalapulasi. Matausina ikatumataisi mavilouna metoya wa kema, makawala tauwau ilukubalaisi kai ikikapusisi

²³e ipwailisi kwaitala ulaka. Si tokabilia saina bidugaga gala gagabila bitakalau, matausina ikalisauwaisi nipawa kasi bawa.

²⁴Bogwa eiyomsilaisi tomotela Itipita, tomotela opiliyavata bogwa eitomgwagasi odabasi mina Itipita. Yeigu goli Guyau bogwa lalivala.”

²⁵Guyau Topeuligaga matauna mina Isireli si Yaubada ikaibiga, kawala, “Yeigu igau makateki bamipuki Amona minana si yaubada mina Tebesi, deli goli mapilana Itipita toyo minasina la yaubada deli gweguyala. Bogwa bayosi guyoula Itipita deli komwaidosi availa availa idubumaisi matauna,

²⁶e batugwali matausina bilosi oyumasi matausina availa availa magisi bikatumataisi, matausina goli guyau Nebukadinesa deli la tokabilia. Mitaga igau oluvi tomota bisikaisi mapilana Itipita, makawala eisisuaisi omitibogwa. Yeigu Guyau bogwa lalivala.

²⁷“Ulo tomota, ka, gala bukukokolasi. Yokomi mina Isireli gala wala bukukukoluvagasi. Yeigu bakolaimi metoya mapilana valu saina kaduwonaku, mapilawena goli tokatupipi wala kusisuaisi. Bukukwaimilavausi bukumaisi omi valu tatoumi e biluva uwomi bukusisuaisi. Yokomi bukusibwabwailasi e gala wala availa biyokukolaimi.

²⁸Yeigu bamakaiami e bakolaimi. Bogwa bakodidaimi komwaidona boda ambaisa lakalibutaimi lokulosi. Mitaga gala wala bakatudoumwaimi. Ka, gala goli baligaiwa kami mipuki, mitaga avai tuta bamipukwaimi kami mipuki duwosisia wala. Yeigu Guyau bogwa lalivala.”