Read Kilivila YEREMAIA 5 Bible Online

YEREMAIA 5 - Kilivila bible

YEREMAIA 5

¹Tomotala Yerusalem, kusakaulasi olumoulela mi valu! E kugisaisi bibwaina titoulemi! Kusavalaisi makatuposina kabogimwala! Ki, ibodi bukubanaisi taitala tomitukwaibwaila e eivigikoni bikimadagi baisa Guyau? Kidamwa bukubanaisi taitala, Guyau biligaiwa si sula mina Yerusalem.

²Ilagoli kukwamitulaimi mwada bukutaimamilasi baisa Guyau, gala kukwamokwitasi avaka kulivalaisi.

³Mokwita goli Guyau inainevi matausina tokimadagi. Leiwaimi goli mitaga gala kulilagaisi. Ikatumkumkwaimi taga kupakaisi takutu, kutaigatulisi gala kutotubulokaisi mi mitugaga.

⁴Mapaila laninamsi kawagu, “Ka, matausina tonamakava, deli tobubeikam, toninagowa matausina, gala inikolaisi avaka Yaubada inainevi, avaka Guyau magila matausina bivagaisi.

⁵Balokaia kaidadala valu e deli bakabigatonasi. Mokwita wala binikolaisi avaka Guyau inainevi, e avaka Guyau magila matausina bivagaisi.” Mitaga komwaidosi matausina ikowolovaisi Guyau la karaiwaga e ipakaisi bikabikuwolaisi matauna.

⁶Baisa uula laiyoni metoya oulaka bigadi matausina. Kaukwa nagigasisi metoya ovilouwokuva bikamtumtaisi wala bisailisi, deli lepodi bikalileu bilau osi valu. Kidamwa matausina tomota bisunapulasi, bolodila bikamtumtaisi paila uula si mitugaga saina vakaigaga e tuta tuta eitotubulokaisi Yaubada.

⁷Guyau ikatupoi kawala, “Avaka uula baligaiwa si mitugaga ulo tomota? Eikoulovaigusi deli itaimamilasi baisa tokolu minasina gala yaubadatoula. Avakoma ulo tomota e ikomatasi, mitaga ikikailasisi wala e si tuta iyomadaisi deli minasina nakalimwala.

⁸Matausina si bubunela makawala wosa nammwala nakakaitubwa saina ikalimwalasi e imwamwana uwosi mwada bimisiaisi sesia si kukova.

⁹Ibodi bamipuki matausina paila vavagi makwaisina e bakau mapula si mitugaga metoya boda mabudona kadai?

¹⁰Bawitali tilaula bitakaiwaisi ulo tomota si bagula bigulela waini mitaga baluki gala biyogagaisi biwokuva. Baluki matausina bikapitunaisi sisila, paila sisi masisisina gala yeigu ulo sisi.

¹¹Isireli tomotala deli Yuda iyakalaigusi wala iwokuva. Yeigu Guyau bogwa lalivala.”

¹²Guyau la tomota iyakalaisi matauna, e ikaibigasi, kawasi, “Gala avaka mokwita bivagi. Gala bitabodasi tuta mwau, gala bitabodasi kabilia kaina molu.”

¹³Ikaibigasi, kawasi, “Tovitoubobuta gala isim dimlesi, si biga bigawokuva wala, si biga gala metoya baisa Guyau.?? Guyau Yaubada Topeuligaga ilukwaigu kawala, “Mwa, Yeremaia - tomfota matausina ilivalasi makawala vavagi makwaisina, mauula ulo biga bavigaki makawala kova owodom, e tomota makawala kai, e kova bigabu bigibumkulovi matausina.”

¹⁵E tomotala Isireli, Guyau bimai tomota metoya kaduwonaku bikabiliaimi, mina papeula, deli tosibogwa, e bonasi gala kunikolaisi.

¹⁶Kasi tolova kaiyala mina papeula, biwaisi gala deli nokapisi.

¹⁷Bikamkulovaisi kʹami deli goli kami kawailuwa, bikatumataisi litumia tauwau deli vivila, bikapitunaisi kaiyosi mi yawa, deli biyogagaisi matamsina mi waini deli makaisina mi seuseu. E mi valu kalisi kwepapeula paila mi kabokwala bikodidaimisi.

¹⁸Guyau ikaibiga, kawala, “E yam makwaisina gala bakatumtuwoli matausina ulo tomota.

¹⁹Mwa, Yeremaia, avai tuta bikatupoisi avaka uula vavagi makwaisina lavagi, kuluki bogwa leitotubulokaigusi, e iwotetilasi baisa togilagala si yaubada osi pwaipwaia titoulesi, e makawala goli biwotitalaisi tomitawasi olumoulela valu makwaina baisa gala si valu titoulesi.”

²⁰Guyau ikaibiga, kawala, “Kuluki dalela Yekobe, kuluki tomotala Yuda, kawam.

²¹Kulegasi yokomi toninagowa, tobonebona, isim mitami, mitaga gala igagabila bukugisasi, e isim taigami mitaga gala igagabila bukulegasi.

²²Yeigu Guyau, avaka paila gala kukukolaigusi? Avaka paila gala kutatuvasi baisa omatagu? Lasaili kanakenuva baisa kalitutilela bolita, kalitutila makaina gala igagabila bitaluvipeili, e bolita goli bikaipolu mitaga gala igagabila bilokaia mapilana ewaiwa, kaisai bikawoula, mitaga gala igagabila biyogagi, e bisuvi.

²³Mitaga yokomi tomota totuli deli todubakasala, kutovilasi e kusilavaigusi.

²⁴Gala kami vituloki, paila bukukwamiabaigusi. Kaina goli bawitali kweluvala kuna, bisigoli mi bagula deli goli kweluvala mi tayoyuwa taitu kwaitala kwaitala.

²⁵Kaimapula mi mitugaga eisilibodaisi makwaisina vavagi bwaina metoya baisa yokomi.

²⁶“Tovagisi sula matausina isisuaisi oluwalaisi ulo tomota, itulotulasi makawala matausina availa bilavaisi wota bikolasi mauna nayoyowa, mitaga matausina eileiyasi kasi sikula mwada biwaisi tomota.

²⁷Baisa makawala tosunini mauna biyosi bidubadu e tabudotala bivakasau metoya minasina, e matausina bivakasauwaisi si bwala avaka avaka eiyosisi. Baisa uula matausina mina papeula deli si guguwa bidubadu.

²⁸Baisa goli uula mina kakaitubwa paila kʹasi kalamatabwaila. Gala isim kalitutilela paila sula ninamsela. Gala isakaisi avaka ibodi baisa weilova, gala iyomitalaisi karaiwaga duwosisia baisa matausina ilamidadaisi.

²⁹“Mitaga yeigu Guyau bamipuki matausina paila vavagi makwaisina e bakau lugwa paila tomota matausina.

³⁰E kwaitala kaboyogagi deli kabosineiyou bogwa isusunapula mapilana valu.

³¹Tovitoubobuta ibigatonasi sopawokuva wala, tolula ikikaraiwagasi makawala tovitoubobuta si karaiwaga, e ulo tomota gala wala ikosomapusi. Mitaga avaka matausina bivagaisi otutala kala vigimkovila?”