Read Kilivila YEREMAIA 51 Bible Online

YEREMAIA 51 - Kilivila bible

YEREMAIA 51

¹E Guyau ilivala kawala, “Yeigu bavigaki kwaitala yagila bikoulusa baisa Babilonia deli tomotala.

²Yeigu bawitali togilagala bimaisi bikodidaimisi Babilonia makawala yagila biyuvisau yogilumwamwaisa bilau. Avai tuta yamla kodadaimi biviloubusi tilaula bivaulaisi valu bivapataisi bikodidaimisi mavilouna e biligaimwaisi wala viloudidadaimi bitotu.

³Bukuligilagilasi wala lewa gala bukutagwalasi mina Babilonia si tokabilia bilovasi si kaiyala kaina bisikamsi tabodala uwosi. Gala bukukilavaisi taitala totubovau, taga bilau biga. Kukwatudoumwaisi wala komwaidona tokabilia!

⁴Matausina lokukwalibogaisi ikikaligasi wala olilagela valu.

⁵Yeigu Guyau Yaubada Topeuligaga matauna Isireli la Yaubada Tobumaboma gala basilavi mina Isireli deli Yuda, ilagoli matausina bogwa eimitugagasi baisa yeigu.

⁶Ka, kusakaulasi metoya Babilonia! Kusakaulasi bukukolaisi mi momova! Taga bikatumataimi paila Babilonia la mitugaga. Yeigu baisa tuta bakokeula agu lugwa e ammipuki mavilouna makawala bibodi bilumkoli.

⁷Ka omitibogwa Babilonia makawala kwelatala viga eibubulokaisi goula oyamagu laiyosi, ivigaki komwaidona valu watanawa ivimommati. E boda ituwoli ituwoli eimomwaisi Babilonia wainila, e ninasi itamwau, gala inikolaisi avaka eiuvagaisi.

⁸Babilonia saina nanakwa eikapusi deli ikodidaimisi! Kuvilamwaisi mavilouna! Kukwatubiasaisi kaituva paila kala kailabwaga e kaina ibodi bipilasi.

⁹Togilagala kala tosisu baisa si bigatona kawasi, ‘Leitavigikonaisi bitapilasaisi Babilonia, mitaga bogwa tayobalisi. Desi wala, ibodi bitasilavaisi mavilouna baisa tuta bitakaimilavausi oda valusi. Yaubada bogwa eimipuki Babilonia metoya ola peuligaga komwaidona e ikatudidaimi wala imoi iligaim.’”

¹⁰E Guyau ilivala kawala, “Ulo tomota bukukaigivakavekasi kawami, ‘Guyau bogwa eikabwailidasi yakidasi bogwa tavagaisi duwosisia. Bwaina, bitalosi bitalukwaisi tomota olumoulela Yerusalem avaka Guyau da Yaubadasi bogwa leivagi.’”

¹¹E Guyau bogwa eiulisali gweguyala Midia, paila uula nanola makawala bikatudidaimi Babilonia. Baisa makawala bivagi paila bikeula lugwala paila la Bwala Kwebumaboma leikatudidaimisi. Tokabilia si kumatoula ikaraiwagasi kawasi, “Kusimataisi mi kaiyala! E mi vayoula kukwatubiasaisi!

¹²Doya bilaguva kabotuvitusila paila Babilonia kalila kala kodadaimi. Kukwatupewolaisi toyausa! E kuleiyasi tokabilia kabasi. E tokabilia bikanabogwasi olawodila!” E Guyau bogwa leivagi avaka eilivala bivagi baisa mina Babilonia.

¹³Valu mapilana saina bidubadu waya deli veiguwa, mitaga kala tuta bogwa leibodi, la momova kala kaduwonaku bogwa leitotina.

¹⁴E Guyau Topeuligaga bogwa eilivala biga katotila onanola titoulela paila igau bimai tomota bidubadu kasi bawa makawala nipawa e bikabiliaisi Babilonia, e matausina bigovasi govala tomgwaga paila bogwa leitomgwagasi.

¹⁵Guyau ibubuli watanawa metoya ola peula; metoya ola kabitam ibubuli valu watanawa deli ikatuvakai labuma.

¹⁶Metoya ola karaiwaga matauna ikaraiwogi bolita walakaiwa odabala labuma bikaipolu. Matauna isunupulovi lowalowa metoya obusibusila valu. Matauna ivigaki kavikavila bikavila olumoulela kuna e ikatusunupulovi yagila metoya ola bwaima.

¹⁷Metoya okasi gigisa vavagi makwaisina tomota ivigaki ninasi itaboda gala wala inikolaisi avaka. Matausina availa ibububulasi tokolu bogwa bimmosilasi. Paila uula yaubada minasina leiyoudulaisi yaubada sasopa deli gala isim si momova.

¹⁸Minasina gala dimlesi e ibodi wala bitapaiki. Avai tuta Guyau bima bibodi minasina, e bogwa goli bidadaimisi.

¹⁹Matauna Yekobe la Yaubada la bubunela gala makawala minasina yaubada. Matauna goli matoulela wala eibubuli vavagi komwaidona deli einagi Isireli paila la tomota tatoula. E matauna yagala Guyau Topeuligaga.

²⁰Guyau ikaibiga kawala, “Babilonia, ka, yoku ulo lewa, yoku ulo guguwa paila bakabilia. Avigakaim bukukwatupileku boda deli kabokaraiwaga bidubadu,

²¹kwatumsumsoli minasina wosa deli kala tosisila, kwatumkumku waga kaibibiu deli kala topwalova,

²²bukukwatumati tauwau deli vivila, bukukwatumati tommoya deli tubovau, bukukwatumati gugwadi tauwau deli vivila,

²³bukutapupoi toyamata sipi deli si yawa, bukutapupoi tobigubagula deli si wosa, bukumtuli tokwaraiwaga deli kaidadala valu.”

²⁴Guyau ilivala kawala, “Ka bukugisaigusi bamapu yamala Babilonia deli tomotala paila komwaidona mitugaga bogwa leivagaisi baisa Yerusalem.

²⁵Ka Babilonia yoku makawala kwaitala koya ikikodidaimi komwaidona valu watanawa. Mitaga yeigu Guyau goli kam tilaula. Ka yeigu bayosaim basakailikaim pwaipwaia bukumila tubumyou wala.

²⁶Gala kwaitala dikunem makwaisina bikauwaisi bivigakaisi avai kaliai tuvaila. Yoku bukuvagi makawala viloupakala bukutovagasi wala okam gigisa. Yeigu Guyau bogwa lalivala.

²⁷“Bilaguva doyala kabilia! Bitigilulu tauya e binakaigalaisi boda ituwoli ituwoli! Kukwatubaiasasi mabudosina paila bukusugigaiyaisi Babilonia! Kulukwaisi si kabokaraiwaga mapilasina Ararata, Mini, deli Asikenasi madeilisi wala bikabiliasi. Bukunagaisi taitala kumatoula paila bikugwai kabilia. Bimaiyaisi wosa bidubadu makawala yuwotala nipawa kasi bidubadu.

²⁸Kukwatubiasaisi boda komwaidona paila bukukwabiliasi deli mina Babilonia. Kuwitalaisi biga baisa gweguyala Midia, si tokaraiwaga, si kumatoula, deli goli si tokabilia komwaidosi valu mavilousina leikikaraiwogaisi.

²⁹Valu watanawa itatatuva e iyega paila uula Guyau iuvagi nanola paila bivigaki Babilonia bimila viloupakala, e gala availa bisiki mavilouna.

³⁰Mina Babilonia si tokabilia bogwa eikimatasi kabilia e isisuaisi wala olumoulela kasi kali. Matausina si tuvaluwa iwokuva e imamasi makawala wala vivila. Si valu kalapisilesi bogwa leikapusisi, e si bwala komwaidona wala kova ivakaiyouli.

³¹Tosikwawa bidubadu isakaulasi bilukwaisi guyoula Babilonia paila la vilouveka bogwa leikatudidaimisi leisuvisi metoya valu mavilousina leitaina leitapatu.

³²Tilaula bogwa eiyoulisi waya makaduyosina kaboluvapela e ivakataisi kova igabu valu kalila kwepapeula. Mina Babilonia si tokabilia bogwa eibulukukoli.

³³Tuta pikekita tilaula bimtulaisi matausina bikapusisi e bivapupoiyaisi matausina makawala witi bitavapupoi. Yeigu Guyau Topeuligaga Isireli la Yaubada bogwa lalivala.”

³⁴E guyoula Babilonia itagigai Yerusalem e ikoma. Matauna ikatusou vilouveka makawala kala katusewa kwelatala bolu, makawala natana dokanikani matauna ilupoli mavilouna. Matauna ikau avaka wala magila e kesala komwaidona ilavi.

³⁵E mina Saiyoni ikaibigasi kawasi, “Ibodi bitadoki Babilonia isim kala pakula paila makwaisina vavagi mwau ivigakaidasi!” E mina Yerusalem ikaibigasi kawasi, “Ibodi bitadoki Babilonia isim kala pakula paila mwau makwaisina leitalumkolaisi!”

³⁶Mapaila Guyau iluki mina Yerusalem kawala, “Yeigu bakau kami lugwa e bavigaki kami tilaula bimapusi baisa yokomi paila avaka bogwa leivigakaimi. Yeigu bavigaki mina Babilonia kasi sopi kununesi bipakalasi e wayala komwaidona bimadasi.

³⁷Valu viloumwaidona bivigaki kabolovala wawa e mauna nabubolodila bivigakaisi si valu. Metoya okala gigisa bivigaki kabokakayuwa, e gala wala availa ibodi bisiki baisa; e availa availa bigisaisi bibulukukoli.

³⁸Mina Babilonia bigougwausi makawala laiyoni deli biguuvavilasi makawala si guuvavila laiyoni litusia.

³⁹Avaka kasi molusaula kaina? Ka, yeigu bakatubiasi kwaitala paka paila matausina, e bavigaki bimommatasi deli wala si mwasawa. Matausina bikatumisisi wala e gala avai tuta bimamatasi.

⁴⁰Yeigu bakau matausina balau bikatumataisi makawala lam, gota, kaina sipi nammwala. Yeigu Guyau bogwa lalivala.”

⁴¹Guyau ilivala paila Babilonia kawala. “Valu makwaina komwaidona valu watanawa eiyakawolaisi bogwa eiyoulisi! Ka, boda ituwoli ituwoli eivigakaisi kabokakayuwa metoya Babilonia okala gigisa!

⁴²Bolita bogwa eikatutuwoli Babilonia kaisai ola kaiwoula bogwa eikuboli mavilouna.

⁴³Mavilousina viluwela bogwa eivigaki kabokokola deli makawala viloupakala gala bitabani sopi, gala availa ibodi bisiki kaina biloki mapilana.

⁴⁴Yeigu bamipuki Beli, minana Babilonia la yaubada e bavigaki minana bipaiki nanola veilau ituwoli tomota si guguwa, e boda ituwoli ituwoli gala tuvaila bitemmalaisi. “Babiloni kalila bogwa eikapusi.

⁴⁵Mina Isireli kusakaulasi kusilavaisi baisa! Kusakawolaisi mi momova metoya ogu gibuluwa tigininila.

⁴⁶Gala bukumamasi kaina bukukokolasi paila avaka bulogala valu bogwa lokulagaisi. Taitu kwaitala kwaitala bulogala ituwoli ituwoli bikikaloubusi - bulogala paila kabilia deli taitala guyau bikabilii giyousola.

⁴⁷Mapaila tuta bogwa leimaima yeigu bagibikoli Babilonia tokolula minasina. Valu mapilana pilamwaidona biyomsilaisi, e tomotala komwaidona bikatumataisi.

⁴⁸Bubuli komwaidona watanawa deli wa labuma bigovasi deli si mwasawa avai tuta Babiloni bikapusi bila oyumasi tomota mabudona leimaisi metoya opiliyavata paila bikatudidaimisi mavilouna.

⁴⁹Babilonia iyomituli kasi kaliga tomota ambaisa ambaisa ovalu watanawa komwaidona, e baisa tuta Babilonia bikapusi paila uula iyomituli bidubadu mina Isireli si kaliga. Yeigu Guyau bogwa lalivala.”

⁵⁰E Guyau iluki la tomota mapilana Babilonia kawala, “Ka, yokomi bogwa lokusakauligilaisi kaliga! Baisa tuta kulosi! Gala bukutulotulasi! Ilagoli yokomi kusikaduwonakusi metoya omi valu, e mitaga kululuwaigusi yeigu mi Guyau, deli kululuwaisi Yerusalem.

⁵¹Kawami, ‘Yakamaisi bogwa eiyomsilaimasi eivigaki kama mmosilasi, paila togilagala bogwa eivakulotaisi matabudona bomikikila olumoulela Bwala Kwebumaboma.’

⁵²Mauula yeigu kawagu tuta matutona igau bima yeigu bagibikoli Babilonia si tokolu minasina, deli matausina kasi kailabwaga bikayagigilasi wala olopola valu.

⁵³Ilagoli kidamwa Babilonia bimwena bila ogawata bipali kwaitala kala kali baisʹe, mitaga yeigu ibodi wala baulisali tomota ituwoli bilosi bikodidaimisi makwaina. Yeigu wala Guyau bogwa lalivala.”

⁵⁴E Guyau ilivala kawala, “Kunakaigalaisi valam eiyoyu mapilana Babilonia, vilamla paila valu mapilana kala kodadaimi.

⁵⁵Yeigu bakatudidaimi Babiloni e bavigaki katupatula udosi. E tokabilia isuvaisi kulusi makawala kaisai ikikawoula e isugigaiyaisi mavilouna deli govasi minimani.

⁵⁶Bogwa leimaisi bikodidaimisi mapilana Babilonia. La tokabilia bogwa eiyosisi deli si kaiyala bogwa eitawoulasi. Yeigu goli Yaubada, mitugaga kala tomipuki yeigu, e bavigaki Babilonia bilumkoli makawala avaka ibudoki si mitugaga.

⁵⁷Yeigu bavigaki si tokaraiwaga, si tokabitam, kasi tokugwa, deli si tokabilia bimommatasi. Matausina bikatumisisi e gala avai tuta bimamatasi. Yeigu Guyau bogwa lalivala, yeigu goli Guyau Topeuligaga.

⁵⁸Babilonia kalila kwepapeula bogwa bivakubalaisi bila watanawa, e kalapisilesi kweuwonaku kova bogwa eivakakubali. Boda ituwoli ituwoli si wotetila gala kala yeiwau si pwaitukula komwaidona ivakakovi. Yeigu Guyau Topeuligaga bogwa lalivala.”

⁵⁹Guyau Sedekaia la touwata tombwailila yagala Seraia, matauna Neria latula, e Maseya tabula. Olopola kwaivasila kala taitu Sedekaia eiguguyau olopola Yuda, Seraia tuta matutona madeilila biwokaia Sedekaia bilosi Babilonia, e yeigu akatululuti mimilisi vavagi bivagi.

⁶⁰Agini ila pilatala buki komwaidona vavagi avaka avaka bikaloubusisi paila kala katudoum Babilonia, deli goli ituwoli livalela Babilonia.

⁶¹Yeigu aluki Seraia kawagu, “Avai tuta bukuviloubusi Babiloni, kuyamataim kaigam kaigaveka bukukwalau baisa tomota komwaidona kala ginigini buki mapilana.

⁶²Oluvi bukunigada baisa Guyau, kawam, ‘Mwa, Guyau, yoku bogwa lokulivala valu mavilouna bukukwatudidaimi, e gala avai bubuli kwemomova bisisu olumoulela, gala tomota kaina mauna, bivigaki makawala wala viloupakala bitovagasi.’

⁶³Mwa, Seraia avai tuta bukuvenoku kakalawa buki mapilana baisa tomota, oluvi kukwau kwaitala dakuna kusipugoli deli buki mapilana e kulavi bila wa Waya Yupereiti,

⁶⁴e bukulivala kawam, ‘Ka baisa makawala avaka bikaloubusi baisa Babilonia - mavilouna bisalili e gala avai tuta bikounapula tuvaila metoya katudoum makwaina Guyau bimai baisa mavilouna.’” Ka, baisa meitobu Yeremaia la bigatona.