Read Kilivila KAVINAVINA 1 Bible Online

KAVINAVINA 1 - Kilivila bible

KAVINAVINA 1

¹O kapisila Yerusalem, itutu nanogu eivilouwokuva, omitibogwa saina viloukabalaki! Isim kala kamaiaba e lagailaga makawala natana nakakau eisigumalawa. Mavilouna vilouguyau, mitaga baisa tuta tomotala komwaidona bogwa eikatupipaisi.

²Bogi komwaidona iuvalam wala, e mitilagila tadoki avaka kaisabwibwi. Mavilousina lubailabogwa saina bidugaga, mitaga gala viloutala itovilaki paila bivisimoli Yerusalem. E mavilousina la kaiyala mitaga bogwa eitotubulokaisi mavilouna e eivigakaisi tilaulela.

³Tomotala Yuda ikatupipaisi gala availa bipilasi, e isilavaisi si valu. Matausina isipwalasi valu ituwoli, mapaila gala ambaisa ibanaisi si kabosisu bwaina - kasi tilaula ivaulaisi ivapataisi, mapaila gala kabosakaula.

⁴E baisa tuta gala wala availa imaima ititapwaroru wa Bwala Kwebumaboma wa yam makwaisina kwebumaboma. Kapugopugula minasina eiusiwosisi baisa ilumkolaisi mmayuyu, e tolula gagabila bikikayagigilasi wala. Makaduyosina kalapisilela valu kaduyoukuwokuva wala eitotusi, e Saiyoni kala lumkola saina mmayuyugaga sainela.

⁵Yerusalem kala tilaula bogwa eitomgwagasi; matausina bogwa leiyoulisi mavilouna e leikaraiwogaisi. Guyau bogwa leivigaki Yerusalem eiboda kala mmayuyu paila tomotala si mitugaga. E viloumgwala bogwa eiyosisi eilauwaisi okatupipi.

⁶Yerusalem valu kwaimitabwaila kala gigisa bogwa eitamwau. E tokaraiwogala komwaidona makawala diya minasina eimmaki uwosi molu. E si peula makateki biwokuva tutala bisakaulasi metoya matausina toweiga.

⁷E baisa tuta Yerusalem viloudidadaimi wala eitogumalawa, eikikayoyu avaka kala kwaimitabwaila omitibogwa. Avai tuta tilaula eiyoulisi mavilouna, gala wala availa isisu bipilasi. E kala tilaula iyosokanaisi mavilouna paila la kapusi.

⁸Kala kamaiaba bogwa leiwokuva; ivigakaisi makawala viloububagewa, e mapaila ivakaluwouwaisi wala. Yerusalem eikikayagigila wala deli la pulummosila. Yerusalem bogwa leiyogwali titoulela metoya mitugaga makwaisina saina gaga.

⁹Mavilouna la mitugaga omilakatila wala tagigisi, mitaga gala wala ikaiki wowola paila kala mmayuyu mwau. Kala kapusi saina wala gaga; e gala availa ibodi bivisimoli. Kala titaula bogwa eitomgwagasi, mapaila idou baisa Guyau kidamwa binokapisi.

¹⁰Kala tilaula ilebwaisi veiguwala valu viloumwaidona. E tomotala isisuaisi igigisaisiga eikwaikwaiasi wa Bwala Kwebumaboma, makwaina Guyau eikabomi gala bisuvisi matausina gala mina Yudia.

¹¹E tomotala binainevisi kʹasi deli wala si kayagigila; si veiguwa igimlokaisi kʹasi paila bisisuaisi tomwamova. Mapaila Yerusalem ivalam; kawala, “Mwa Guyau, kugisaigu, kuvitusi ulo ninamwau.”

¹²E la valam baisa availa availa bililoulasi okadaula, kawala, “Kugisaigusʹe! Mmayuyu makwaina lalumkoli gala wala availa ilumkoli avai tuta goli. Mmayuyu makwaina lalumkoli metoya baisa Yaubada avai tuta bigibuluwa.

¹³“Iwitali kova metoya walakaiwa leima, e kova makovana igigabu olumoulegu. Ileiya agu sikula e ilavaigu ala akanawa opwaipwaia. Oluvi isilavaigu deli wala agu mmayuyu aiyokwai e ilaga.

¹⁴“E komwaidona ulo mitugaga iselavi ila gulitinidesi; e isaila okaiyogu, e mokaila wala itomataigu. E Guyau ikasalaigu baisa agu tilaula e gala wala ibodaigu bapeula.

¹⁵“E Guyau iyosokani wala komwaidosi ulo tokwabilia topapeula; iwitali budotala tokwabilia paila bikatudoumwaisi agu viloumgwa tubovau. Ivapupoi ulo tomota makawala waini kaiuwala okabopola bivapupoiyaisi.

¹⁶“Baisa uula mitilagigu tadoki avaka kaisabwibwi. E gala availa gagabila bivisimolaigu; gala availa gagabila bikatuviluwi wowogu. Tilaula bogwa eiyouligusi, e ulo tomota si guguwa gala wala avaka ikesa.

¹⁷“Ka, avitukoli yamagu, mitaga gala wala availa bipilasaigu. Guyau bogwa eimai agu tilaula e itoulaigusi itopataigusi; matausina eivigakaigusi makawala mavilousina viloububagewa.

¹⁸“Mitaga Guyau matauna toduwosisia, paila yeigu gala akabikuwoli matauna. E tomota ambaisa ambaisa, kunakaigalaigusi; kugisaigusi deli agu mmayuyu. Ka, ulo tomota tubovau tauwau deli vivila bogwa leikatupipaisi leilauwaisi okatupipi.

¹⁹“Ka, adou mavilousina ulo kaiyala mitaga ipakaisi, gala magisi bipilasaigusi. Ulo tolula deli ulo tokaraiwaga eikikaligasi wala olopola valu, tutala matausina inainevisi kʹasi paila bisisuaisi tomomova.

²⁰“O ulo Guyau, kugisi agu mmayuyu, deli nanogu kala mmayuyu sainela! Paila wala ulo mitugaga ninamwau bogwa leiyomwauwaigu. Katumata leikaligiaki olopola valu; makawala goli olopola bwala kwaitala kwaitala eikikaligasi.

²¹“Kulagi ulo kayagigila, gala availa isisu paila bivisimolaigu. Agu tilaula imwasawasi paila lokukwatudoumwaigu. Nani kuyomitali m yam makwaina lokukwatotila; kuvigaki agu tilaula bibodasi mmayuyu makawala yeigu lalumkoli tuta baisa.

²²“Kukwamogi matausina paila komwaidona si mitugaga makwaisina leiuvagaisi; kumipuki matausina makawala lokumipukwaigu paila ulo mitugaga. Yeigu deli wala agu mmayuyu lakakayagigila, e eivigaki eibulokatuwolaigu wala.”