Read Kilivila KAVINAVINA 3 Bible Online

KAVINAVINA 3 - Kilivila bible

KAVINAVINA 3

¹Ka, yeigu taitala matausina anikoli kala mmayuyu Yaubada la mipuki.

²Matauna ibokavilaigu ilauwaigu ambaisa saina dubilikitakita.

³Matauna inokuyuwi agu lewa gala deli la nokapisi.

⁴Agu lewa ikikapogegasi wala deli buyavila, tuvaila totuwanegu bogwa eikatuwoli.

⁵Matauna bogwa eiyokikilaigu okabommayuyu sainela wa bwala katupipi.

⁶Matauna bogwa eikatuvisuyaigu asisu odudubalela kaliga.

⁷Matauna iyuwolaigu metoya yuwoyoula tanumnumta. Bogwa eikatupipaigu, e gala gagabila basakaula, ulo pikwaku bogwa leiwokuva.

⁸Deli kaigagu walakaiwa adou paila pilasi, mitaga Yaubada ipaiki gala wala magila binakaigali ulo dou.

⁹Tutala baliloula deli wala ulo silubeibeu; e ambaisa ambaisa batovila dakwa wala ititobodi matagu.

¹⁰Matauna itutulaigu makawala natana beya, e iyuwaitaula imakaiagu makawala natana laiyoni.

¹¹Ibokavilaigu asilavi keda e ikalipoiyailagu olawodila, itagigaiyaigu wala iligaimwaigu.

¹²Matauna ikatuvakavi la kaiyala e ivigakaigu la kopwesiga.

¹³Matauna ilavi la kaiyala ima itokamtuya owowogu.

¹⁴E yam komwaidona tomota igigilaigusi wala; e ivigakaigusi si kaboyousokana.

¹⁵Matauna ikipwagi wodogu e iligabu sopi yayana ila okaiyogu, e ivakomataigu metoya kaula yayana deli sopi yayana.

¹⁶Matauna isaikikili migigu opwaipwaia deli ikatuuwoli kudugu odakuna.

¹⁷E bogwa wala lalumwelavi avaka woula kala katumigileu, vakota, deli goli mwasawa kasi bwaina.

¹⁸E ulo momova bogwa eikukupi, deli ulo pikwaku baisa Guyau bogwa leiwokuva.

¹⁹E ninamsela agu mmayuyu, deli ulo sigumalawa, kala yayana makawala tuva.

²⁰Aninamsi vavagi makwaisina saina peula e ulo baloma imama.

²¹Mitaga aluluwai kwaitala wala vavagi e ulo pikwaku ikaimilavau wala.

²²Ka, Guyau la yebwaili deli la nokapisi gala bikalituli bisetuwoli wala.

²³Kaukwau kwaitala kwaitala bitabubanaisi wala makawala goli kalasia biiyuwoula wala.

²⁴E Guyau matauna agu kwaimwaidona, mapaila ulo pikwaku asaili baisa matauna.

²⁵E Guyau ikabwaili availa availa matausina idubumaisi matauna.

²⁶Mapaila bwainigaga sainela ibodi bitatulotulasi deli da peulokaisi bitatutulaisi matauna paila bikatumovaidasi.

²⁷Tuvaila bwainigaga sainela kidamwa peuloki bikabitutukwaidasi igau otubovaudasi.

²⁸Avai tuta bitaboda mmayuyu, ibodi wala bitalamam deli da peuloki.

²⁹Ibodi bitakatilavaida tomwaidoda, e kaina bitabinivau da pikwaku.

³⁰Kaina goli biwaidasi kaina bibigigagaidasi, mitaga ibodi wala bitapeuloki.

³¹Paila Guyau matauna tonokapisi e gala bipakaitulaidasi.

³²Kaina goli biyomwau ninadaisi, mitaga la yebwaili baisa yakidasi kwekanigaga deli kwaipeula.

³³Matauna gala sitana imwasawa kidamwa biyomwau ninadaisi kaina biyomiyuyaidasi.

³⁴Guyau bogwa leinikoli ninadaisi saina bimwau avai tuta bitasisuaisi okatupipi.

³⁵Matauna inikoli avai tuta bikaluwouwaisi da wotetilasi eisakaidasi.

³⁶E avai tuta bikididogaisi karaiwaga duwosisia otutala yakala, matauna bogwa wala einikoli.

³⁷E tuta komwaidona Guyau nanola wala bitavadidalaisi olopola valu.

³⁸Baisa makawala vavagi bwaina deli vavagi gaga bisevalekusi wala.

³⁹Avai tuta bimipukwaidasi paila da mitugagasi, ki, avaka uula bitatakulukulusi?

⁴⁰Ibodi bitawakolaisi da kedakedasi komwaidona e bitaninavilasi baisa Guyau.

⁴¹Ibodi bitaulaimwaisi ninadaisi baisa Guyau wa labuma e bitanigadasi kawadasi,

⁴²“Mwa Guyau, bogwa lakamitugagasi deli lakakoulovaimsi, e yoku gala wala kuligaiwa ma mitugagasi.

⁴³“Yoku kubokavilaimasi e lokukwatumataimasi; m gibuluwa wala ikatupwani m nokapisi,

⁴⁴m gibuluwa makawala lowalowa saina pilakukubadu gala gagabila ma nigadasi bikopwali biwokaiam.

⁴⁵Yoku lokuvigaki mina watanawa eivakaluwouwaimasi.

⁴⁶“E komwaidona kama tilaulasi ibigigagaimasi deli iyosokanaimasi.

⁴⁷Yakamaisi bogwa lakabudobodasi kabommayuyu deli kabosilagi, e ma sisuaisi mwau deli kokola.

⁴⁸Mitilagigu ititayelu makawala sopi wa waya paila ulo tomota bogwa eidaminasi.

⁴⁹“Mitilagigu ititayelu makawala sakala gala kala kalitutila

⁵⁰tatoula wala Guyau bikululukwaidasi metoya wa labuma e bigisaidasi.

⁵¹Nanogu saina kala mmayuyu paila lagigisi avaka leikikaloubusi baisa nunumoyela valu.

⁵²“Tilaula iyosaigusi makawala natana mauna eiwai wa sikula e matausina goli gala togia uwosi biyokaimaigusi.

⁵³Tomomova wala yeigu matausina ilavaigusi omlopu, e ikatubodaisi wodola mlopu metoya odakuna.

⁵⁴Sopi bogwa bikatukuwosaigu, e adoki wala bogwa makateki bakaliga.

⁵⁵“Metoya omlopu, adou baisa yoku ulo Guyau,

⁵⁶e avai tuta lakayubabai baisa yoku paila bukulagi ulo dou, yoku bogwa lokunakaigali.

⁵⁷E bogwa lokumapu ulo dou e lokulukwaigu taga bakokola.

⁵⁸“Guyau, lokuma paila bukukwatusunupuloiyaigu e bogwa lokukoli ulo momova.

⁵⁹Yoku kunikoli sula makwaisina leiuvagaisi baisa yeigu. Anigada bukupilasaigu otutala yakala.

⁶⁰Yoku kunikoli ammakawala agu tilaula eiyogagaigusi deli agu kweiwala eikikeiwalaigusi.

⁶¹“Mwa Guyau yoku bogwa lokunakaigali matausina eibigigagaigusi; deli bogwa lokunikoli komwaidona si nanamsa eikikeiwalaigusi.

⁶²Yam komwaidona matausina bililivalaigusi wala deli bikikeiwalaigusi.

⁶³Kaukwau biyosokanaigusi, biyayosasi goli bibugiki.

⁶⁴“Mwa Guyau kumipuki matausina paila avaka bogwa leivagaisi.

⁶⁵Kubuloti matausina deli kuvigaki si pikwaku biwokuva.

⁶⁶Kwatumati matausina e kukwatudoum wala bitamwausi metoya ovalu watanawa!”