Read Kilivila KAVINAVINA 4 Bible Online

KAVINAVINA 4 - Kilivila bible

KAVINAVINA 4

¹Ka, ma goulasi kwevivivila, kasi gigisa bogwa eibwau; e youdulela Bwala Kwebumaboma eikodidaimisi imiliaki wala wa keda.

²Tubovau tolesi Saiyoni kavigakaisi ma veiguwatoulasi makawala goula, mitaga tuta baisa bogwa eivigakaisi makawala avai guguwa gala dimlela.

³E minana ugiwagi navivila ibodi wala bivinunu litula, mitaga ulo tomota leivigakaisi makawala kasuwari, minasina bititabasaisi wala litusia.

⁴Litusia eikikaligasi wala paila kasi molu deli kasi daka; e gugwadi eininigadasi wala kaula mitaga gala wala availa bisaiki.

⁵Omitibogwa ulo tomota ikamsi, kalamatabwaila wala, mitaga lagaila molusaula wala eikikimati olopola valu. Omitibogwa matausina si kaisisu saina bwainigaga, mitaga tuta baisa ulo tomota inainevisi avaka bikamsi metoya wowala valu.

⁶Ka, ulo tomota bogwa eibodasi kasi mipuki saina mwau, ikalisau mina Sodom kasi mipuki, makwaina goli leikapusi saina nanakwa metoya oyamala Yaubada.

⁷Omitibogwa ma gweguyasi dalesi tomatabwaila deli giyoububwaila, utuutu uwosi, mina papeula e itubuguyausi.

⁸Mitaga tuta baisa katakainauwaisi availa matausina ikanukwenusi wa keda; migisi bwauwokuva wala, paila makateki goli leikaligasi. Uwosi saina kasai makawala kai, kanuvinesi eikapituki ototuwanesi.

⁹E availa availa matausina eikaligasi okawakali iyubwailasi, matausinaga makateki eikikaligasi ilumkolaisi mwau, molusaula wala ikimati matausina paila wala gala kʹasi bikamovi matausina.

¹⁰Mmayuyu makwaina eikaloubusi baisa ulo tomota ivigaki kabomwau sainela; inisia wala kasi tounai isulusi litusia tatousi ikomasi.

¹¹E Guyau saina igibuluvagasi; mapaila matauna ivakati kova olopola Saiyoni e ivakamtumtu wala viloumwaidona ikenu.

¹²Gala wala availa ambaisa, kaina avai tokaraiwaga metoya avai boda togilagala, idubumi paila avai tokabilia gagabila bisuvi okalapisilela Yerusalem.

¹³Mitaga bogwa eileiki makawala paila uula si tovitoubobuta imitugagasi deli si tolula kasi pakula iyomitulaisi kasi kaliga matausina tobubwaila.

¹⁴Tokaraiwogala iuvabakwalisi wala olopola valu makawala matausina tokwau, uwosi buyaviwokuva wala gala availa bitagwala bikabikoni matausina.

¹⁵E tomota ikawotasi kawasi, “Kulosi ambaisa! Bogwa lokuyogwalaimi! Taga bukukwabikonaigu!” Mapaila matausina iwowausi wala ilokaiasi boda ituwoli ituwoli, mitaga gala wala availa magila bibodi matausina.

¹⁶E Guyau gala tuvaila ikaiki wowola paila matausina; e matoulela wala ibutugigai matausina. Paila uula matauna gala ikabwaili ma tolulasi deli kama tokugwasi.

¹⁷E kanainevisi pilasi tatoula wala itotilaki ninamaisi, mitaga pilasi gala wala bima. Kapipikwakusi paila pilasi metoya kwaitala boda ituwoli, mitaga katulukoyasi wala.

¹⁸E ka tilaula imitukolabusi wala igigisaimasi; e yakamaisi gala wala kaboloula. Bogwa eikubu ma nanamsasi e ma tutasi kala vigimkovila bogwa eikaloubusi.

¹⁹Matausina saina beigoguna mitasi eibokavilaimasi, ikalisauwaisi mluveka leiyokakaila. Ikilileuwaimasi wa koya; ikikanapwalasi oviloupakala e ivapulosaimasi wala iyosaimasi.

²⁰Bogwa leikatupipaisi uulela ma momovasi, matauna guyau Yaubada leinagi, matauwena goli lakadubumaisi bikolaimasi metoya avai tilaula avai tilaula.

²¹E tomotala Edom deli Usa; kugigigilasi wala, e kummwasawasi wala, omi tuta bwaina. Ka makateki wala yokomi deli bukubodasi mmayuyu; e bukummosilasi paila bukusilubeibeusi wala mina mdumwadu yokomi.

²²Saiyoni bogwa leimapu la mitugaga; mapaila Guyau gala tuvaila biyokikilaimasi metoya okatupipi. Mitaga yokomi mina Edom, Guyau bogwa bimipukwaimi; matauna biyomitali mi mitugaga.