Read Kilivila ISIKELI 19 Bible Online

ISIKELI 19 - Kilivila bible

ISIKELI 19

¹E Guyau ilukwaigu bawosi mapilana wosi kasi kavinavina taiyu litula guyoula Isireli.

²Ka, inami makawala laiyoni navivila! Minana ividali litula oluwalaisi laiyoni nammwala nagigasisi.

³E ividali natana minasina ivituloki paila biwaiga; e minana bivigaki tokamlatau.

⁴E boda ituwoli ituwoli inakaigalaisi bulogala matauna e ileiyasi kala sikula isonu onobwala. Ikauwaisi kailasaga itaginoulisi matauna ibititanaisi ilauwaisi Itipita.

⁵Inala itulotula itulukoya la pikwaku komwaidona bogwa wala leiwokuva. Oluvi minana ividali natana tuvaila, e minana bogwa einaveka ivagi saina nagigasisi laiyoni.

⁶Avai tuta minana saina einaveka e minana deli wala ituwoli laiyoni ititavinasi. Minana tuvaila wala imweli paila biwaiga deli bivigaki minana tokamlatau.

⁷Minana bivapilaku kalila valu e bivadidaimi valu. E tuta komwaidona minana biguguvavila tomota bibulukukoli.

⁸Mabudosina ikatukwaitalasi paila bikabiliasi deli minana. Tomota leimaisi metoya ambaisa ambaisa. Matausina ileiyasi sikula metoya ilavaisi wota e ikolaisi minana.

⁹Matausina ilikwaisi minana e ikauwaisi iuyokaisi guyoula Babilonia. Matausina iyausaisi wala minana, mwada okoyala Isireli gala wala tuvaila bitalagi kaigala minana biguguvavila.

¹⁰Ka, inami makawala tamtala waini eivalaisi opapala kaduyotala waya. Paila sopi saina bidubadu, waini matamna kuyowala deli kaiuwala ikalisau sainela.

¹¹Sisila saina sisipapeula. Ibwainaki bitayouduloki gweguya si kaitukwa. Waini matamna saina tamwonaku eisusina ibodi wala bila isakaila lowalowa. Tomota igisaisi saina tamwonaku deli kuyowala ikalisau sainela.

¹²Mitaga mina gibuluwa iyosisi ibisabwaisi matamna e ilavaisi ila opwaipwaia. Yagila bomatu iyuvisi wala kaiuwala imatutilasi e sisila isiliuwoli wala iwokuva. Masisina imatutilasi e kova igabu.

¹³Baisa tuta bogwa leivalaisi matamna oviloupakala ovalu mapilana saina lubulabu gala sopi.

¹⁴E tonenala matamna kova igabu. Kova ivakakovi wala sisila deli kaiuwala, gala ibodi biyoudulokaisi tuvaila gweguya si kaitukwa. Wosi mapilana wosila kavinavina. Sivavila goli biuwosaisi wala.