Read Kilivila ISIKELI 31 Bible Online

ISIKELI 31 - Kilivila bible

ISIKELI 31

¹Taitu kweluwotala kwaitalela tubukona natolula oyamla kwematala lakasisuaisi okatupipi, Guyau ilukwaigu kawala,

²“Mwa yoku tau, kubigatona baisa guyoula Itipita deli komwaidona la tomota kawam. Saina mina papeula yokomi! Avai vavagi ibodi bavisakaimi?

³Yokomi makawala kaitala kweisila olopola Lebanoni, sisila saina kuyowala deli saina bwaina kaikonigula, makaina saina kaiwonaku ila isakaila lowalowa.

⁴Sopi saina bidubadu paila bivigaki bikaitubwa, deli sopitilawa paila bivitubwi makaina iyopwatutaisi makatupona ambaisa makaina eititoki. E sopi itayelu ilokaia komwaidona kaila udila.

⁵Paila saina bwaina eivinumlaisi, makaina ikaiwonaku ikalisau komwaidona kai. Sisila saina sisivakaveka deli sisiwonaku.

⁶Mauna migawelu migawelu iyoulasi kasi nigwa osisila. Mauna nasigisagina minasina nabubolodila iuvalulusi osikowala. Boda komwaidona ovalu watanawa ivigakaisi si kabovaiwasi osikowala.

⁷Saina kemanabwaita makaina - saina kaiwonaku, e sisila saina wala sisiwonaku. Kavilawalila ila wala isakaila waya osikowala pwaipwaia.

⁸Komwaidona kweisila olopola Yaubada la bagula gala wala ibodi bitavisaiki deli makaina. Sisila kala vakaila ikalisau wala sisisi kaga. E gala wala kaitala kaitawola sisila makawala makaina gala wala avai kai olopola Yaubada la bagula tatoula kala kemanabwaita bikalisau makaina.

⁹Yeigu lavigaki makaina saina kemanabwaita deli sisila saina kuyowala. E olopola Ideni makwaina Yaubada la bagula makaina itubokesa wala oluwalaisi kai komwaidona.

¹⁰“E ka, yeigu wala Guyau Yaubada, balukwaimi avaka bikaloubusi metoya kai makaina avai tuta eikikaiveka bila isakaila lowalowa. Ka, meliloki wala kala kaiveka eikikaiveka e meliloki nanola kala kaiveka.

¹¹E mapaila baisa yeigu lakoulovi kai makaina e batugwali taitala guyau togilagala bikaraiwogi makaina. Matauna bisaiki kai makaina avaka ibodi la mitugaga.

¹²E matausina gilagala mina gigasisi bilukubalaisi e biluvaimwaisi bikanukwenu. Sisila sisikikekita deli sisivakaveka masisisina eisilakavi bikapusisi bilosi ikanawaisi odubasi komwaidona koya deli itayatila ovalu mapilana. E komwaidona tomota eisisuaisi okaikonigulela bibutusi bilosi.

¹³Mauna nayoyowa bivigakaisi kabasi kai makaina kaikapusi, deli mauna nasigisagina minasina nabubolodila bililoulasi odubasi masisisina.

¹⁴Mapaila tuta baisa e bila tuta oluvi gala wala avai kai ibodi bikaiwonaku makawala makaina. Kaina goli saina bwaina bivinumlaisi mitaga gala wala bipati kala kaiwonaku makaina, kaina bikalipwali lowalowa e bila iguugoula. Komwaidona makaisina bidoumsi makawala tomota bikaligasi, bidoumsi paila bilokaiasi okasi boda matausina bogwa leilosi oviluwela kaliga.”

¹⁵Baisa makawala Guyau Yaubada ililivala, kawala, “Wa yam makwaina makaina kai bibusi bilokaia si valu tomata, yeigu bavigaki sopi metoya osikowala pwaipwaia bikuboli makaina paila kabotuvitusila kavinavina. Bogwa basilibodi waya makaduyosina e waya kaduyokekita gala bitayelusi. Paila uula kai makaina bogwa ikaliga, okoyala Lebanoni bavigaki saina dubilikitakita e komwaidona kai oulaka bimatasi.

¹⁶Avai tuta bawitali makaina bibusi bilokaia si valu tomata, la kapusi butula biyagi boda komwaidona. Komwaidona kaila Ideni deli komwaidona kaila Lebanoni, makaisina saina bwaina eivinumlaisi e eibusisi ilosi mapilana osikowala pwaipwaia, komwaidona makaisina goli bimwasawasi paila kala kapusi makaina.

¹⁷Makaisina bidelisi bilosi Tuma bisegolaisi wala komwaidosi availa availa bogwa eikapusibogwasi. E availa availa matausina omitibogwa eisisuaisi okaikonigulela makaina bibutusi wala bilosi oluwalaisi boda ituwoli ituwoli.

¹⁸“E kai makaina baisa guyoula Itipita deli tomotala komwaidona. E makaisina kaila Ideni saina kaiwonaku, mitaga makaina ikalisau saina kaiwonaku sainela deli kala kaimanabwaita ikalisau goli. Mitaga tuta baisa makaina bibusi bilokaia Tuma makawala goli kaila Ideni, makaina bibusi bila osi valu tomata e bisaigogula wala deli matausina gala inikolaisi Yaubada, deli matausina eikatumataisi okabilia. Yeigu Guyau Yaubada bogwa lalivala.”