Read Kilivila OSIA 11 Bible Online

OSIA 11 - Kilivila bible

OSIA 11

¹Guyau ikaibiga, “Otutala Isireli igau gwadi, layebwaili matauna e ladoki latugu, e ladou matauna bisilavi Itipita bima.

²Madoula wala badidou matausina, e tuvaila goli bitotubulokaigusi. Ulo tomota ilulasi baisa Beali, igabwaisi maiina simasimina baisa tokolu.

³Mitaga mayeigula lavakadi Isireli paila biloula. Akopwi ulo tomota, mitaga gala wala isimokwitasi kidamwa yeigu kasi toyamata.

⁴Avakouli matausina metoya ogu ninabwaila deli ulo yebwaili. Alupi matausina akipituki kimwagu. Akululu avakoma matausina.

⁵“Ipakaisi bikaimilavausi baisa yeigu, e mapaila ibodi bikaimilavausi bilosi Itipita, e mina Asiria bikaraiwogaisi matausina.

⁶Kabilia biyogagi si valu e bikodidaimi kalapisilela si valu. E kabilia bogwa bikatumtuwoli ulo tomota, paila uula iuvagaisi avaka ninasi titoulesi idokaisi bwaina.

⁷Ikatotusi paila bitotubulokaigusi. Ka, igau biyogililami paila uula makaina kaitakewa otupwasi saina mwau, mitaga gala availa bilitaki matausina.

⁸“Mina Isireli, ammakawala bavigaki baligaimwaimi? Ammakawala bavigaki basilavaimi? Ki, gagabila bakodidaimimi makawala lakodidaimi mapilana Adima, kaina bavigakaimi makawala lavigaki mapilana Seboiim?[12] Gala wala ibodaigu makawala, paila yokomi saina mina mbwailigu sainela goli.

⁹Gala bamipukwaimi ogu gibuluwa, e gala tuvaila bakatumtuwoli mina Isireli. Paila yeigu gala guma watanawa, yeigu goli Yaubada. Ka, yeigu Tobumaboma lasikailimi. Gala wala bamakaiami deli ulo gibuluwa.”

¹⁰Avai tuta baguuvavila makawala laiyoni baisa kasi tilaula, ulo tomota bibokulaigusi. Bogwa binanakwasi bimakaiagusi metoya opilikwaibwaga.

¹¹Bimaisi metoya mapilana Itipita e binanakwasi makawala mauna nayoyowa. Bimaisi metoya mapilana Asiria makawala bubuna. Bakaimilivau matausina biviloubusivausi osi valu tatousi. Ka, yeigu Guyau bogwa lalivala goli.

¹²E Guyau ilivala kawala, “Ka, mina Isireli si sasopa deli si wabu itavinaigu itapataigu, e deli goli mina Yuda igau wala eikosomapwaigusi, yeigu Yaubada tomitakwai deli tobumaboma.