Read Kilivila OSIA 2 Bible Online

OSIA 2 - Kilivila bible

OSIA 2

¹Mapaila bukudokaisi semia mina Isireli yagasi “Yaubada La Tomota”, deli “Mina Mbwailila Guyau”.

²Litugwa, kumnabisi baisa inami. Mitaga ka! minana goli gala ulo kwava tuta baisa, e yeigu gala la mwala. Kumnabaisi kidamwa biligaiwa la kailasi deli la kalimwala.

³Kidamwa gala biligaiwa la mitugaga, e bavigaki minana bikimwadu makawala yam makwaina eikaloubusi. Bavigaki minana bisimakava makawala viloupakala, e daka wala bikimati.

⁴Gala banokapisi litula, paila inasi nakalimwala gala wala sitana isim kala mmosila.[5] Paila minana titoulela eikaibiga, kawala, “Balokaia lubaigwa. Tuta tuta ibububwaigusi kaula, sopi, agu kwarekwa yabidubadu deli yakakalaia, bulamila olibe deli waini.”

⁶Mapaila yeigu bala ayokanikani minana metoya kai kaigunigwaini, e bawaiya dakwa batavini batapatu e batabodi la keda minana.

⁷E minana mwada bisakaula bilokaia lubʹaila mitaga gala wala biboda matausina. E minana binainevi mitaga gala wala bibani matausina. E oluvi minana bikaibiga, kawala, “Bakeiita balokaia agu vaigwadi, tuta ikugwa ulo sisu bwaina gala makawala baisa tuta.”

⁸Gala avai tuta minana bisimokwita kidamwa yeigu agumwaguta basaiki minana kawailuwa, waini, deli bulamila olibe deli komwaidona siliba deli goula minana eiyosi paila bitapwaroru baisa Beali.[6]

⁹Mapaila otutala tayoyuwa yeigu bakaimali kawailuwa deli waini bogwa lasaiki minana, e bakaimali kwama yabidubadu deli yakakalaia. bogwa lasaiki paila bisisikam.

¹⁰E bavigaki minana bikimwadu omitasi lubʹaila, e gala taitala gagabila bikoli minana metoya ogu peula.

¹¹E bakatubodi komwaidona kala paka - paka makwaisina eiuvagi taitu taitu deli tubukona tubukona, e deli kamkwam makwaisina eiuvagi sabate sabate, komwaidona la tapwaroru sigugulela.

¹²Bakodidaimi matamsina waini deli makaisina seuseu, baisa eilivala mwada buwala metoya baisa lubaila. La bagula bigulesi waini deli kawailuwa bavigaki biliya. Bolodila bikodidaimisi bagula makwaisina.

¹³E bamipuki minana paila tuta makwaisina ilumwelavaigu, avai tuta igubugabu maiina simasimina baisa Beali, deli ikatububula kidamwa bila ikatukulokola lubaila mwada bibodi Guyau bogwa leilivala.

¹⁴E mapaila balau minana oviloupakala tuvaila e mapilana batavili nanola minana metoya bigala yebwaili e bisivilakaigu.

¹⁵Bakaimali baisa minana makubilasina bigulela waini, deli mapilana Itayatilela Kabomwau bavigaki kala lulu pikwaku. Paila mapilana goli minana bimapu kaigagu makawala eivagi tutala okapugulela, tuta makwaina eisunapula metoya mapilana Itipita ima.

¹⁶Makwaina tuta bidokaigu tuvaila la mwala, e gala goli avai tuta tuvaila bidokaigu la Beali.[7]

¹⁷Yeigu gala avai tuta batagwala minana bikavitagivau yagala Beali.

¹⁸Wa tuta matutona bakabutu minasina bolodila deli mauna nayoyowa, kidamwa gala biyogagaisi ulo tomota. Deli igau bakatuyouli komwaidona guguwala kabilia metoya ovalu, komwaidona puluta deli kaiyala, e batagwala ulo tomota bivakota si valu deli gala avaka biyogagi matausina.

¹⁹Ve! Isireli, igau bavigakaim yoku ulo kwava. Yeigu tuta komwaidona bavagi makawala ulo katotila. Bamitukwaiyaim deli banokapisiaim e bavigakaim yoku ulo vavagi, tuta gala biwokuva.

²⁰Bogwa bavagi makawala akatotila, kidamwa yoku bavigakaim ulo vavagi, e yoku bukusimokwita kidamwa yeigu goli Guyau.

²¹E tuta makwaina bamapu avaka si nigada ulo tomota mina Isireli.[8] Bavagi kuna kidamwa bikuna baisa ovalu watanawa, e pwaipwaia biluvabwaila witi, waini deli olibe.

²³Basaili ulo tomota bisigagasi mapilana valu, e bisibwabwailasi. Bamitakwai baisa matausina yagasi “Gala Yebwaili”, deli baisa matausina yagasi “Gala Ulo Tomota”. Ka, bogwa bakaibiga, “Yokomi ulo tomota!” e bimapwaisi, “Yokula ma Yaubadasi.”