Read Kilivila YOWELI 1 Bible Online

YOWELI 1 - Kilivila bible

YOWELI 1

¹Baisa Guyau la biga baisa Yoweli, matauna Petuweli latula.

²Yokomi tommoya nunumoya kunakaigalaisi, e komwaidomi mina Yuda, kulegasi. Ki, avai vavagi makawala baisa sitana eikaloubusibogwa avai tuta, omi tuta yokomi, kaina tumimia osi tuta?

³Bukulukwaisi litumia paila baisa, e igau matausina tuvaila bilukwaisi litusia, e matausina tubumia tuvaila goli bilukwaisi tubwa matubona oluvi.

⁴Yuwovila nipawa imaisi itoulisi wa bagula. Avaka yuwotala ikomlovaisi e yuwoyuwelaga imaisi ikamkulovaisi.

⁵Yokomi tomomom kaibotutu, ka, kumamatasi kuvalamsi, e yokomi tomomom waini, bibusi mitilagimi. Kaiuwasi matamsina waini avaka bivigaki wainivau bogwa eidadaimisi.

⁶Yuwoveka nipawa makawala budotala tokwabilia eiyoulisi da pwaipwaiasi. Mina papeula deli saina bidugaga minasina, gala gagabila bitakalau. Kudusi kaikikakata makawala kudula laiyoni.

⁷E minasina bogwa ikamkulovaisi matamsina da wainisi, e eisomasi da kaisi makaisina seuseu. Ikaninaisi kanuvinesi e sisisi sisiukuwokuva wala.

⁸E yokomi tomota bukuvalamsi. Bukukwavinavinasi makawala natana vilakapugula ikikavivia, paila tau matauna mwada makateki bivaisi kasitaiyu bogwa eikaliga.

⁹Gala isim witi kaina waini, avaka tomota bivigakaisi si semakavi wa Bwala Kwebumaboma. Tolula ikavinavinasi paila gala avaka iyosisi paila bilulasi baisa Guyau.

¹⁰Bagula isisuaisi pwaipwaiawokuva wala. Pwaipwaia iuvalam paila witi komwaidona eimatasi, deli kaiuwala waini eimatutilasi, e makaisina olibe eimwailelasi.

¹¹Yokomi tobigubagula bukukwavinavinasi, e yokomi kubigulaisi bigulela waini bukuvalamsi, paila witi deli bali, e deli komwaidona avaka wa bagula eimatasi wala.

¹²Matamsina waini deli makaisina seuseu bogwa eimwailelasi. Komwaidona kai isim kaiuwasi bogwa iyagisi e imatasi wala. Tomota si mwasawa bogwa eitamwau wala.

¹³Yokomi tolula kuuwotetilasi okabolula bukusikamsi kami koula e bukuvalamsi. Bukusuvisi wa Bwala Kwebumaboma e bukukwavinavinasi bogi komwaidona. Gala avai witi kaina avai waini isisu paila bukululasi avaka baisa mi Yaubada.

¹⁴Bukulukwaisi tomota kasi karaiwaga biposumasi. Kudousi tomota bisigugulasi. Bukukougugulaisi kasi tokugwa tomota deli goli komwaidosi mina Yudia bisigugulasi olumoulela la Bwala Kwebumaboma Guyau mi Yaubada, e bukunigadasi baisa matauna.

¹⁵La yam Guyau bogwa eivilalamila, yam makwaina matauna Topeuligaga bima bikodidaimi valu. Wi! Yam makwaina bimai kabokokola sainela goli.

¹⁶Tagigisasi wala gala kabovitakaula tutala da bagulasi ikomkulovaisi. Gala wala bitabanaisi mwasawa ola Bwala Kwebumaboma da Yaubadasi.

¹⁷Yagogu imitamatasi opwaipwaia saina bidapakala. Gala witi paila bitadodigasi, e bwaima bwaimawokuva wala ididadaimisi.

¹⁸Bulumakau kasi molu igilagelasi, mayuwosina sipi tuvaila ibodasi mmayuyu paila uula gala wala avaka bikomasi osaivau.

¹⁹Mwa Guyau! Anigadaim, paila mnumonu deli kai komwaidona bogwa eimatasi wala, makawala goli kova eivakamkulovi.

²⁰E ka, mauna nabubolodila goli igilagelasi baisa yoku, paila uula waya komwaidona bogwa eimadaisi wala.