Read Kilivila YOWELI 2 Bible Online

YOWELI 2 - Kilivila bible

YOWELI 2

¹Kuyuvaisi tauya. Kuyuvidousi odabala mapilana Saiyoni,[1] Yaubada la koya kwebumaboma. Kutatuvasi yokomi mina Yuda! Guyau la yam bogwa eivilalamila.

²Yam makwaina kwedudubila deli yam kwegugugu, bivigaki kala bwau deli lowalowa. Nipawa yuwoveka makawala tokwabilia bisuyaisi kulusi, makawala dubilikitakita bikuboli odubasi koya. Gala kwaitala vavagi makawala makwaina omitibogwa, deli gala tuvaila bikaloubusi makawala.

³Bikamdabwaisi kai makawala kova. Omitasi isisu kwabila makawala Bigulela Ideni, mitaga otuboulosi baisa katubakana viloupakala. Gala kwaitala vavagi bikesa.

⁴Kasi gigisa makawala wosa. Bisakaulasi makawala wosala kabilia.

⁵Biyuweitaulasi odubasi koya, e bikogoregorasi makawala wogala kabilia kaibibiu. Bisilakakupwanasi makawala mnumonu lubulabu wa kova. Bitodelisi makawala budoveka tokwabilia bogwa eikatubaiasasi paila kabilia.

⁶Tutala imaisi, tomota ikokolasi e taitala taitala migisi idavilasi.

⁷Iyowaisi makawala tokwabilia, e makawala tokwabilia imweimwenasi wa kali. Komwaidosi ivautuutusi isaitaulasi duwosisia, e gala isuvilasi

⁸kaina isuwaisi osi keda sesia. Imwenaisi okabosilaboda, deli gala avaka gagabila bisilibodi minasina.

⁹Isuvaisi kulusi ovilouveka. Iyuweitaulasi wa kali. Imwenasi wa bwala deli isuvisi owinidowa makawala touveilau.

¹⁰Pwaipwaia iigayega avai tuta bisuyaisi kulusi, e labuma imotatina. Kalasia deli tubukona idudubilasi, deli utuyam gala tuvaila bikatasi.

¹¹Guyau ibutupilapala la karaiwaga baisa la tokwabilia. Mabudosina tokwabilia ikabikuwolaisi matauna tobobawa deli mina papeula. Guyau la yam kaiyokwaila woula. Availa gagabila bimova?

¹²Guyau ikaibiga, kawala, “Baisa tuta goli kuninavilasi mokwita deli bukukweiitasi baisa yeigu, deli mi posuma, deli mi valam e deli mi kavinavina.

¹³Kutugwalaisi ninami bikamituli mi ninamwau. Gala wala ibodi bukusikammakavaisi kami kakapula.” Kukwaimilavausi baisa Guyau mi Yaubada. Matauna tolilalasi deli ivakasau nokapisi. Matauna topeuloki, deli ivagi makawala la biga katotila. Tuta komwaidona matauna ikatubaiasabogwa paila biligaiwa mitugaga e gala bimipuki.

¹⁴Kaina matauna Guyau mi Yaubada bivigivau nanola e bimitukwaiyaimi metoya kabinaila mi pwaipwaia. Oluvi yokomi gagabila bukululasi kaula deli waini baisa matauna.

¹⁵Kuyuvaisi tauya wa Koya Saiyoni. Kusakaisi tomota kasi karaiwaga biposumasi e kudousi tomota bisigugulasi.

¹⁶Kukougugulaisi tomota. Kukwatubiasaisi matausina paila sigugulela tapwaroru. Kumaiyaisi tommoya. Kumaiyaisi gugwadi, deli goli pwapwawa. E tuvaila matausina vavaigilavau ibodi bisilavaisi si bwala e bimaisi.

¹⁷Tolula matausina iwotitalaisi Guyau oluwalela kabolula deli okabosusuvi wa Bwala Kwebumaboma. Ibodi bivalamsi deli binigadasi, kawasi, “Mwa Guyau! Kunokapisaimasi yakamaisi m tomota. Taga kutagwala tuwoli tomota bikaluwouwaimasi deli biyosokanaimasi kawasi, ‘Weei, ammatauwenaga mi Yaubada?’”

¹⁸Oluvi Guyau ininavila paila la pwaipwaia, e inokapisi la tomota.

¹⁹Bogwa ivitakauloki si nigada, kawala, “Baisa tuta basakaimi kaula deli waini deli bulamila olibe, e baisa avaka lasakaimi bibodaimi wala. Boda ituwoli ituwoli gala tuvaila bikaluwouwaimi.

²⁰Bavabutu minasina nipawa leimaisi metoyasi opiliyavata makawala budotala tokwabilia. Babokavili mimilisi minasina bilosi oviloupakala. Kasi kasa okatumatala babokavili bilosi Milaveta Pilamata, e kasi kasa oluvi bilosi oBolita Kwaiveka. Uwosi biboginasi. Bakatudoum minasina paila uula komwaidona avaka bogwa eivigakaimi.

²¹“E buyagu, ka, taga kukokolasi mitaga ibodi bimwamwasila ninami e bukumwasawasi paila komwaidona avaka Guyau bogwa leivagi paila yokomi.

²²Yokomi mauna, taga kukokolasi. Mnumonu isemitamatasi. Kai iwouwasi, deli bidubadu kaiuwasi seuseu deli waini.

²³“Yokomi mina Saiyoni,[2] bimwamwasila ninami. Bukumwasawasi paila avaka Guyau mi Yaubada bogwa eivagi paila yokomi. Bogwa isakaimi kuna okala tuta sopu, e iligabu kuna otutala katubugibogi. Kala kunobasi tayoyuwa isakaimi makawala tuta tuta eiuvagi.

²⁴Kabotutu makwaisina bikasewoki witi, e mesi opapala kabopola bikasewoki kaiuwasi waini deli olibe.

²⁵Basakaivauwaimi avaka bogwa lokukitumouwaisi wa taitu makwaisina mayuwosina nipawa leikomasi mi bagula. Ka, yeigu goli lawitali mabudona nipawa leimaisi iyogagaimi.

²⁶Baisa tuta bukuyosisi bidubadu paila bukukwamsi, e bukukomatasi. Bukuyakawolaigusi yeigu Guyau mi Yaubada paila bogwa lavagi vavagi kabokatubau paila yokomi. Yokomi ulo tomota gala availa tuvaila bikaluwouwaimi.

²⁷E mina Isireli, ka - bukunikolaisi kidamwa yeigu asisu oluwalaimi, deli yeigu goli Guyau mi Yaubada, e gala avai Yaubada ituwoli isisu. Yokomi ulo tomota gala availa tuvaila bikaluwouwaimi.

²⁸“Igau oluvi baligabu ulo baloma baisa tomota komwaidosi. Litumia tauwau deli vivila igau bikamitulaisi nanogu. Mi tommoya mimi bimimisi, deli mi totubovau bigisaisi kilisala.

²⁹Wa tuta makwaina baligabu ulo baloma baisa touwata goli, tauwau deli vivila.

³⁰“Basaiki katumamatila paila yam makwaina wa labuma deli ovalu watanawa, baisa makawala bibubusi buyavi, e kova, deli kubowala mseu.

³¹Kalasia igau bidavila binadudubila deli tubukona bikulubweyani makawala buyavi igau gala bivitoulai la yam Guyau, yam makwaiwena tubulela yam saina kabokokola sainela.

³²Mitaga komwaidona availa availa matausina inigadasi baisa yeigu Guyau paila pilasi, e yeigu bogwa bakoli matausina. Makawala yeigu Guyau lakaibiga, kawagu, ‘Mimilisi olopola Yerusalem bisakaulasi bibwainasi. Availa availa matausina lanagi bogwa bimovasi.’”