Read Kilivila YOWELI 3 Bible Online

YOWELI 3 - Kilivila bible

YOWELI 3

¹Guyau ikaibiga, kawala, “Wa tuta matutona bakaimilivau kala kabinai si valu mina Yuda deli mina Yerusalem.

²Bavayouli komwaidona boda ituwoli ituwoli e komwaidosi bamai oItayatilela Yakala. Baisa bayakali matausina, paila komwaidona avaka avaka eivigakaisi ulo tomota. Eiyobutubutaisi mina Isireli ilosi isivagelusi valu ituwoli ituwoli, e eivilaisi mapilana Isireli, mapilawena ulo pwaipwaia goli.

³Ikowobobutasi paila binagaisi availa availa biyosisi matausina tokwatupipi. Igimolaisi gugwadi tauwau deli vivila mwada magudisina bivigaki ula paila bimapwaisi minasina nakakalimwala deli kasi waini.

⁴“Ammakawami, yokomi mina Taia deli mina Saidoni, deli viloumwaidona Pilisitia? Avaka mwada bukuvigakaigusi? Ki kuvigikonaisi mwada bukukeulasi kami lugwa baisa yeigu paila avaka? Kidamwa makawala, e ka! — yeigu bananakwa bakeula agu lugwa baisa yokomi.

⁵Bogwa lokukwauwaisi ulo siliba e ulo goula, e lokukwauwaisi ulo veiguwa kweminibwaita kulauwaisi olopola mi bwala kwebumaboma.

⁶Lokulauwaisi mina Yuda deli mina Yerusalem opiliyuwelʹo, e lokugimolaisi matausina baisa mina Girisi.

⁷E tuta baisa bakaimilivau matausina metoya mapilasina valu eigimolaisi matausina. E bogwa bavigakaimi makawala yokomi lokuvigakaisi matausina.

⁸Bogwa batagwala tomota bigimolaisi litumia tauwau deli vivila baisa mina Yuda. E matausina bigimlovauwaisi magudisina baisa mina Sabia[3] osi valu opiliyuwela. Ka, yeigu Guyau bogwa lalivala.

⁹“Kukwamitulaisi ulo biga oluwalaisi boda ituwoli ituwoli, kawami, ‘Kukwatubaiasasi paila kabilia. Kudouwaisi mi tokwabilia mina gigasisi. Kukougugulaisi mi tokwabilia e bukukwatudelisi.

¹⁰Mi daima bukuvigakaisi mi puluta, e mi kaivatam bukutasaisi paila mi kaiyala. Mina mamama tuvaila ibodi bikabiliasi goli.

¹¹Yokomi komwaidomi boda lokutoulaisi Yuda, kunanakwasi e bukumaisi. Kusigugulasi oitayatila!’” Mwa Guyau! Kuwitali mabudona m tokwabilia bibusisi bikabiliasi deli matausina.

¹²E Guyau kawala, “Ibodi mabudosina boda bikatubaiasasi, e bimaisi baisa oItayatilela Yakala. Baisa goli yeigu Guyau basili paila bayakali mabudosina boda leitoulaisi baisa.

¹³Saina tomitugaga matausina. Kuteyasi matausina bikapusisi makawala yonitaitu otutala tayoyuwa. Kukwatupupoiyaisi matausina makawala kabopola kwekikasewa ikapupoi kaiuwala waini tatoula wala waini bilupuseula.”

¹⁴Saina bidugaga lakatuluwovila tomota isisuaisi oItayatilela Yakala. Mapilawena goli Guyau la yam eimati bima.

¹⁵Kalasia deli tubukona bidudubilasi, e utuyam gala wala bikatasi.

¹⁶Guyau kaigaveka idoudou metoya wa Koya Saiyoni. Kaigala ibutupilapala metoya mapilana Yerusalem. Valu watanawa e walakaiwa iyegasi. Mitaga bogwa bikoli la tomota.

¹⁷“E mina Isireli, wa tuta matutona bukunikolaisi wala kidamwa yeigu goli Guyau mi Yaubada. Yeigu masisiki mapilana Saiyoni, baisa ulo koya kwebumaboma. Mapilana Yerusalem igau bavigaki valu viloubumaboma, e tomitawasi gala avai tuta tuvaila biyoulisi mapilana.

¹⁸“Wa tuta matutona koya bikasewoki bigulesi waini, e bitabani bulutuvalu wa koya kwaitala kwaitala sopi bidubadu bisisu, kala bawa bibodi komwaidona sakalela Yuda. Kaduyotala sakala bititayelu metoya Guyau ola Bwala Kwebumaboma, e makaduyona biyopututu Itayatilela Akakia.

¹⁹“Mapilana Itipita bimila viloupakala, e mapilana Edom biviloububu wala, paila uula iyoulisi viluwela Yuda e ikatumataisi matausina tobubwaila goli.

²⁰Bakau kasi lugwa matausina eikatumataisi. Gala wala banokapisi matausina isim kasi pakula. Mitaga tomota bisigagasi wala olopola Yuda deli Yerusalem, tuta gala biwokuva. E yeigu Guyau basivagasi wala wa Koya Saiyoni.”