Read Kilivila EMOSI 1 Bible Online

EMOSI 1 - Kilivila bible

EMOSI 1

¹E baisa Emosi la biga, matauna taitala toyamata sipi, mapilana valu Tikowa. E Usaia guyoula mapilana Yuda, deli matauna Yowasi[1] latula yagala Yeroboam matauwena guyoula Isireli. Yaubada ikatuloluta baisa Emosi, e igau taitu kwaiyu eiwokuva oluvi likuliku[2] ikaloubusi e iigayega valu saina mwaugaga. E baisa Emosi eivitouula la vitoubobuta. E Yaubada ikatululuti Emosi vavagi komwaidona paila mina Isireli.

²E Emosi ikaibiga, “Guyau iwaiweya metoya wa Koya Saiyoni. Kaigala ibutupilapala metoya mapilana Yerusalem, mnumonu bwaina bogwa bivamatasi, deli wa Koya Kamela mnumonula bikivili bikalayagisi wala.”

³E Guyau ikaibiga, kawala, “Mina Damasiko[3] imitugagasi tuta tuta, e baisa mokwita bogwa bamipuki matausina. Iyomiyuyaisi mina Giliadi deli ilamidadaisi.

⁴Mapaila bawitali kova bila bigabu la ligisa guyau Asaeli deli guyau Benadadi[4] kala kali paila kabilia bogwa bivakakovi.

⁵Yeigu bakatumimisi si kalapisila mina Damasiko, e matausina oitayatila Abeni deli goli tokwaraiwogala Betedeni bakogali. Tokwabilia bimaisi bikatupipaisi mina Siria bilauwaisi Kiri.”

⁶E Guyau ikaibiga, kawala, “Mina Gasa[5] imitugagasi tuta tuta, e baisa mokwita bogwa bamipuki matausina. Paila eikatupipaisi budotala tomota ilauwaisi igimolaisi baisa mina Edom bivigakaisi si ula.

⁷Mapaila bawitali kova bila bigabu kasi kali mina Gasa deli bivakakovi kasi kali paila kabilia.

⁸Bogwa balau kasi tokwaraiwaga mapilasina Asidodi deli Asikeloni. Bamipuki mina Ekironi,[6] e komwaidosi kesala mina Pilisitia bidoumsi.”

⁹E Guyau ikaibiga, kawala, “Mina Taia eimitugagasi tuta tuta, e baisa mokwita bogwa bamipuki matausina. Paila ikatupipaisi budotala tomota e bikogalaisi bilosi mapilana Edom. Tuvaila gala iyamataisi si biga katotila paila kalubaila avaka bogwa eilivalaisi.

¹⁰Mapaila bawitali kova bila bigabu kasi kali mina Taia deli bivakakovi kasi kali paila kabilia.”

¹¹E Guyau ikaibiga, kawala, “Mina Edom[7] eimitugagasi tuta tuta, e baisa mokwita bogwa bamipuki matausina. Ibokavilaisi ikatumataisi sesia mina Isireli, mitaga gala inokapisaisi matausina. Kasi leiya gala kala kalitutila, e gala avai tuta bivagaisi ninasi bimanum.

¹²Mapaila bawitali kova bila bigabu mapilana Temani deli bivakakovi kasi kali paila kabilia mina Bosira.”[8]

¹³E Guyau ikaibiga, kawala, “Mina Amoni[9] eimitugagasi tuta tuta, e baisa mokwita bogwa bamipuki matausina. Paila kabilia olopola ivapelasi iyoulisi si valu, e ka, itabolusi luposi nasusuma vilesi Giliadi.

¹⁴Mapaila bawitali kova bila bigabu kasi kali mina Raba,[10] deli bivakakovi kasi kali paila kabilia. E igau yamla kabilia bimlovasi, luluwasi tokwabilia makawala likuliku valu biyega.

¹⁵Si guyau deli la tokaraiwaga bikogalaisi bilauwaisi ituwoli valu.”