Read Kilivila EMOSI 9 Bible Online

EMOSI 9 - Kilivila bible

EMOSI 9

¹Agisi Guyau itotu opapala kabolula. E ilivala la karaiwaga. Kawala, “Kuwaiya kokolela Bwala Kwebumaboma omitasi e kukwatuminimani kidamwa bwala komwaidona biyega. Kukwatuwoli mitasi kokola makaisina kidamwa bikapusisi odubasi tomota bimtuli wala. E kesalaga tomota yeigu bamtuli okabilia. Gala availa bisakaula e gala availa bikoli.

²Kaina bikilikelisi mwada bisuvisi osi valu tomata,[35] yeigu babokavili bayosi. Kaina bimwenasi bilosi walakaiwa wa labuma, e yeigu bavabu matausina.

³Kidamwa bikanukwenusi odabala makwaina Koya Kamela, yeigu banevi e bayosi wala. Kaina goli bisalilisi bilosi otilibwabwau mwada bisipepunisi, e yeigu baluki minana Dokanikani,[36] minana guyoula mapilana, kidamwa bigadi matausina.

⁴E kidamwa kasi tilaula bikauwaisi matausina deli kasi katupipi, e yeigu bogwa bakaraiwaga mwada bimtulaisi bidoumsi. Paila bogwa lanagi bamtuli wala, e gala goli bapilasi matausina.”

⁵Guyau Topeuligaga ikabikoni valu watanawa, e itokaia likuliku. Komwaidosi mina watanawa ivalamsi. Valu komwaidona bidumdum makawala sopi wa Waya Naili.[37]

⁶Guyau ibudi la valu wa labuma, e isaili labuma odabala pwaipwaia kala gigisa makawala kailuya. Idou sopi metoya obolita,[38] e iligabu bila opwaipwaia. E matauna yagala Guyau.

⁷E Guyau ikaibiga, kawala, “Ka, mina Isireli, aninamsi mina Sudani makawala goli aninamsaimi tuta tuta. Makawala akaimali mina Pilisitia metoya mapilana Kiriti, deli mina Siria metoya mapilana Kiri,[39] makawala goli yokomi lakaimilivauwaimi metoya mapilana Itipita.

⁸E yeigu wala Guyau Yaubada amitakavati mina Isireli saina mina mitugaga e makateki bakatudidaimi metoya odabala pwaipwaia. Mitaga gala bakatudidaimi komwaidosi Yekobe dalela.

⁹“Basaiki karaiwaga, e bakatukili mina Isireli makawala tasaili witi okabokatukila. Bakatukili matausina oluwalaisi mina watanawa bakau bakatupali availa availa matausina gala isim dimlesi.

¹⁰Komwaidosi availa availa ilivalasi, ‘Yaubada gala bitagwala avai vavagi mwau biyogagaidasi’ - e matausina goli tomitugaga oluwalaisi ulo tomota bikaligasi okabilia.”

¹¹Guyau ikaibiga, kawala, “Igau kwaitala yam bima, bavigivau la kabokwaraiwaga Debida, makwaiwena tuta baisa makawala kwaitala bwala bogwa ikapusi ikatumsomsoli. Bavigivau tabodala, e bikwaivau tuvaila. Bakaliivau makwaina makawala omitibogwa kala kaliai.

¹²E mapaila mina Isireli bivayoulisi avaka kesala si pwaipwaia mina Edom, e deli goli bikauwaisi komwaidosi kabokwaraiwaga makwaisina omitibogwa ulo vavagi titoulegu.” Baisa Guyau ilivala, matauna uulela bikaloubusi makawala.

¹³Guyau ikaibiga, “Ka, wa yam makwaisina bima, witi saina nanakwa bisusina, e gala gagabila bukuvinakwaisi tayoyuwa, bogwa bisusinovau. Deli matamsina waini saina nanakwa bibukulasi, e gala gagabila bukuvinakwaisi bukuvigakaisi kami waini, paila bogwa biuwovau goli. E koya makwaisina bibubusisi kala simokainia waini, deli koya kwekikekita bisosusi e bidumyelu wainiwokuva wala.

¹⁴E bakaimali ulo tomota bikaimilavausi osi valu. Matausina bivigivauwaisi si valu kala kodadaimi, kidamwa bisilaisi baisa. E matausina bibigubagulasi bigulela waini e bimomsi kasi waini. Deli matausina bivaulasi avaka osi bagula e igau bikamsi avaka eivalaisi.

¹⁵E yeigu bavali ulo tomota baisa osi valu bogwa lasaiki matausina, e gala availa bisabuvau matausina.” Guyau mi Yaubada bogwa leilivala.