Read Kilivila KALA BAWA 23 Bible Online

KALA BAWA 23 - Kilivila bible

KALA BAWA 23

¹E iluki Balaki, kawala, “Kukwaliai kwailima kwaiyu kabolula baisa paila yeigu, e kumai nalima nayu bulumakau nammwala deli nalima nayu sipi nammwala.”

²Balaki ivagi avaka eiluki. E matauna sola Balam igabwaisi natana bulumakau deli natana sipi odubasi kabolula kwaitala kwaitala.

³Oluvi Balam iluki Balaki, kawala, “Kutoli baisa opapala m lula kwegubugabu e igaugwa alokaia bagisi kaina Guyau bibodaigu kaina gala. E igau balukwaim avaka bilukwaigu.” E matauna kalamwaleta ila wa koya.

⁴E Yaubada ibodi matauna. E Balam iluki Guyau, kawala, “Bogwa lakaliai kwailima kwaiyu kabolula e lagabu lula bulumakau natana deli sipi natana odubasi kwaitala kwaitala makwaisina.”

⁵E Guyau iluki Balam avaka bilivala e iluki matauna bikaimilavau baisa Balaki bisola Guyau la biga baisa matauna.

⁶E ikeiita ibani Balaki eitotu opapala la lula kwegubugabu deli goli komwaidosi kasi tokwaraiwaga mina Mowabi.

⁷Balam ivitoubobuta baisa makawala. “Matauna Balaki guyoula Mowabi eimaiyaigu metoya mapilana Siria, e metoya wa koya opilibomatu. Kawala, ‘Kuma kulivala paila yeigu. Bukubuloti mina Isireli.’

⁸Ammakawala babuloti avaka Yaubada gala ibuloti, kaina balivala paila kaliga avai tuta Guyau gala wala eilivala makawala?

⁹Metoya dukutotu saina walakaiwa gagabila bagisi matausina. E igagabila bavitusi matausina metoya wa koya. Matausina makwaina boda eisisuaisi kasimwaleta. Bogwa eikatetasi kidamwa Yaubada eikabwaili matausina, gala makawala boda ituwoli.

¹⁰Dalela Isireli makawala tubumyou. Matausina saina bidugaga gala gagabila bitakalau. Ibodaigu bavigimkulovi ulo tuta ovalu watanawa makawala taitala Yaubada la tomota. Ibodaigu bakaliga duwosisia wala makawala tomitukwaibwaila.”

¹¹E Balaki ivitakauloki Balam, kawala, “Avaka kuvagi baisa yeigu? Yeigu lamaiyaim baisa paila mwada bukubuloti agu tilaula, mitaga yoku lokukwabwaili wala matausina.”

¹²E Balam ivitakauloki, kawala, “Yeigu gagabila balivala mesinaku wala avaka Guyau bilukwaigu balivala.”

¹³E oluvi Balaki ikaibiga baisa Balam, kawala, “Kuma bitala kwaiyuwela valu e baisa igagabila bukugisi mimilisi wala mina Isireli, e metoya baisa bukubuloti matausina paila yeigu.”

¹⁴Ivakouli matauna ilau obaleku Sopim odabala Koya Pisiga. Baisa tuvaila ikaliai kwailima kwaiyu kabolula e igabu natana bulumakau namwala deli natana sipi namwala odubasi kwaitala kwaitala makwaisina.

¹⁵Balam ikaibiga baisa Balaki, kawala, “Kutotu baisa opapala m lula kwegubugabu e yeigu bala baisʹe babodi Yaubada.”

¹⁶E Yaubada ibodi Balam e iluki matauna avaka bilivala, deli iwitali matauna bikaimilavau baisa Balaki paila bisola Guyau la biga baisa matauna.

¹⁷Mapaila ikaimilavau e ibani Balaki itotu wala opapala la lula kwegubugabu deli tokwaraiwaga mina Mowabi. E Balaki ikatupoi avaka Guyau eilivala.

¹⁸E Balam ivitoubobuta baisa makawala. “Balaki yoku Sipora latula, kuma, e bukulagi avaka balukwaim.

¹⁹Yaubada gala makawala tomota tosisasopa. Guma watanawa tuta tuta ikivilivau nanola mitaga Yaubada gala makawala. Avai vavagi ikatotila bivagi e bogwa bivagi wala. Eililivala e bogwa eikaloubusi.

²⁰Bogwa eikaraiwogaigu paila bakabwaila. E avai tuta Yaubada bikabwaili, yeigu gala gagabila badouyumali.

²¹Bogwa lagisibogwi paila mina Isireli tuta oluvi kidamwa gala bibodasi mwau kaina pakula, paila Guyau si Yaubada deli matausina, e matausina ikamitulaisi matauna si Guyau.

²²Yaubada eikaimilivau matausina metoya Itipita. Iyowai paila matausina makawala bulumakau nabolodila.

²³Baisa gala isisu avai silami deli avai mlukwausa gagabila biyogagaisi mabudona mina Isireli.[21] Tuta baisa tomota bikaibigasi paila mina Isireli, kawasi, ‘Kugisaisi avaka Yaubada bogwa leivagi.’

²⁴E mabudona mina Isireli makawala laiyoni napeula, gala wala bivaiwasi tatoula wala bigadi bikamtumtu tatoula bimom buyavi metoya minasina bogwa eikamati.”

²⁵E Balaki ikaibiga baisa Balam kawala, “Ka, lokupaiki bukubuloti mina Isireli. Mitaga anigadaim gala bukukwabwaili matausina.”

²⁶Balam ivitakauloki, kawala, “Kaina gala alukwaim mwada bogwa bavagi vavagi komwaidona avaka Guyau leilukwaigu.”

²⁷E Balaki ikaibiga kawala, “Kuma deli yeigu bitala balauwaim ituwoli valu. Kaina Yaubada bitagwala bukubuloti matausina paila yeigu metoya mapilawena.

²⁸E ivamwenei Balam odabala Koya Peora ambaisa metitoki baisa viloupakala opapala.

²⁹Balam iluki matauna kawala, “Kukwaliai kwailima kwaiyu kabolula paila yeigu e baisa kumai nalima nayu bulumakau nammwala deli nalima nayu sipi nammwala.”

³⁰E Balaki ivigaki makawala eiluki, e igabu natana bulumakau namwala deli natana sipi namwala odubasi kwaitala kwaitala kabolula makwaisina.