Read Kilivila KALA BAWA 24 Bible Online

KALA BAWA 24 - Kilivila bible

KALA BAWA 24

¹Makwaina tuta wala Balam inikoli Guyau magila bikabwaili mina Isireli, e mapaila gala ila ivitoki tolosila avai kabovitoubobuta makawala eiuvagi omitibogwa. Itovila itovilaki viloupakala

²e igisi mina Isireli eibudaisi si kabosikaiwa dala kwaitala kwaitala. E Yaubada bilomala iviyelu nanola matauna,

³e ivitoubobuta baisa makawala. “Baisa ulo biga yeigu Beori latula, yeigula Balam. Baisa goli yeigu ulo biga, e bogwa agisimlili,

⁴e yeigu gagabila balagi avaka Yaubada eililivali. Amitatobu agigisi metoya wa mimi, agigisi kilisala metoya baisa Yaubada Topeuligaga.

⁵Si buliyoyova mina Isireli kwemminabwaita sainela,

⁶makawala pitalela pulopola saina kasawonaku, kaina bagula opapala waya. Makawala lileikoya avaka Guyau eivali, kaina makawala kweisila opapala waya.

⁷Bogwa bibanaisi bidubadu kuna, deli bisapwaisi kasi yagogu obilekula outuwotu. Si guyau la karaiwaga bikalisau guyau Agagi, e la kabokwaraiwaga kala kaduwonaku deli kala beiyaya.

⁸Yaubada eivisunupuloi matausina metoya mapilana Itipita, e iyowai paila matausina makawala bulumakau nabolodila. Ikatumtuwolisi kasi tilaula, ikatumkumkwaisi tutuwanesi e deli ikomtumtaisi si kaiyala.

⁹Makwaina boda makawala wala laiyoni napeuligaga. Avai tuta eimmasisi, gala wala taitala totuvaluwa biyommati. Availa availa ikabwailisi mina Isireli, e matausina tuvaila Guyau Yaubada bikabwaili. E availa availa ibulotaisi mina Isireli, e matausina tuvaila Guyau Yaubada bibuloti.”

¹⁰E Balaki ikinunuma yamala e deli la gidaleiya iluki Balam, “Yeigu ladouwaim paila bukubuloti agu tilaula, mitaga kaimapula lokukwabwaili wala iboda sivatolu.

¹¹Nani wala baisa tuta bukula om valu. Alivalabogwa biga katotila paila bamapwaim, mitaga Guyau gala itagwala yoku bukukwau mapu makwaina.”

¹²E Balam ivitakaula kawala, “Bogwa laluki m touwata matausina lokuwitali agu tokaikivi,

¹³kawagu kidamwa yoku bukusakaigu komwaidona siliba deli goula olopola m ligisa, yeigu gala wala igagabila bakoulovi avaka la karaiwaga Guyau paila mwada bavagi avaka titoulegu. Yeigu balivala avaka wala Guyau eilukwaigu balivala.”

¹⁴E Balam iluki Balaki, kawala, “Baisa tuta yeigu bakaimilavau balokaia ulo tomota tatougu, mitaga ikugwa bakatululutaim paila avaka mina Isireli bivigakaisi m tomota igau tuta oluvi, e oluviga bala.”

¹⁵E ivitoubobuta baisa makawala, “Baisa ulo biga yeigu Beori latula, yeigula Balam. Baisa goli yeigu ulo biga, e bogwa agisimlili,

¹⁶e yeigu gagabila balagi avaka Yaubada eililivali e babani kabitam metoya baisa matauna Towalakaiwa Sainela. Amitatobu agigisi metoya wa mimi, agigisi kilisala metoya baisa Yaubada Topeuligaga.

¹⁷Agisibogwi avaka igau tuta bima, deli agisi mabudona mina Isireli. Taitala guyau igau biyuwoula metoya boda makwaina, matauna makawala natana utuyam saina visigala, kaina makawala utuyam isim yeyunela, e matauna biyoulapula metoya wa Isireli. Matauna biwaiya tokugwala Mowabi e bikapusisi, deli goli bivakapusii komwaidosi mina Seti.

¹⁸Matauna bitomgwaga odubasi kala tilaula mapilana Edom, e bivigaki si valu kala bigukeya. Tuta komwaidona mina Isireli bitomgwagasi wala.

¹⁹E mina Isireli bivapupoiyaisi matausina, e bikatumtuwolisi kesala matausina.”

²⁰E Balam okilisala igisi mina Amaleki, e ivitoubobuta baisa makawala, “Mina Amaleki saina mina peuligaga odubasi avai boda avai boda, Mitaga igau kala vigimkovila mabudona bitamwauvagasisi.”

²¹E tuvaila okilisala igisi mina Keni, e ivitoubobuta baisa makawala, “Kabosisu makwaina lokusisiki kwaipeuligaga, makawala avai nigwa eikaliai odubadabila.

²²Mitaga avai tuta mina Asiria bikatupipaimi, e yokomi mina Keni bukutamwausi.”

²³Balam ivitoubobuta baisa makawala, “Avai tomota matausina eigugugulasi baisa opiliyavata?

²⁴Tokwabilia bikewasi metoya Saipirosi, e biyoulisi Asiria deli Eba. Mitaga igau tuta bima matausina tokwabilia tuvaila bitamwauvagasisi.”

²⁵E Balam ikatubaiasa ikaimilavau ila ola valu e Balaki isaitaula wala ila ola keda.