Read Kilivila KALA BAWA 25 Bible Online

KALA BAWA 25 - Kilivila bible

KALA BAWA 25

¹Avai tuta mina Isireli ibudaisi si kabosikaiwa oItayatilela Akakia, e tauwau imisiaisi vilesi Mowabi.

²Vivila minasina ivakoulisi matausina ilauwaisi okasi paka makatupona tuta komwaidona bititaimamilasi baisa minana si yaubada tokolu. Mina Isireli ikomasi kalagila deli itemmalaisi minana tokolu

³Beali mina Peori si yaubada. Mapaila Guyau saina igibuluwi matausina

⁴e iluki Mosese kawala, “Ibodi bukukwabikuwolaigu makawala - kuvakouli komwaidona tokugwala Isireli e kukwatumati matausina omilakatila, e yeigu gala tuvaila bagibuluwi mina Isireli.”

⁵Mosese iluki komwaidona tokaraiwaga kawala, “Taitala taitala yokomi ibodi bikatumati metoya odalela titoulela matausina bogwa eitugwalaisi titoulesi itemmalaisi baisa tokolu Beali mina Peori si yaubada.”

⁶E tuta matutona wala matausina iuvalamsi omatala Guyau la Buliyoyova, taitala sasi wala guma Isireli ivakouli natana vilela Midiani e ilau ola buliyoyova titoulela omatala wala Mosese deli goli komwaidona tomota.

⁷E Peniasi matauna Eleasa latula e Eroni tolula tabula. Tutala Peniasi igisi baisa, itokaia isilavi tomota komwaidona. Matauna ikau kaitala kaiyala,

⁸e isaitaula wala ilokaia tau matauna sola vivila obuliyoyova, e ikopituki wala kasitaiyu okaiyala. E baisa makawala katudoum makwaina lelia saina mwaugaga eiyogagi mina Isireli iwokuva.

⁹Mitaga tomota bogwa leikaligasi kasi bawa 24,000.

¹⁰E Guyau iluki Mosese kawala,

¹¹“Ka avaka Peniasi leivagi baisa ivigaki gala tuvaila bagibuluwi mina Isireli. Matauna gala itagwala availa bitaimamila baisa avai yaubada, mitaga agumwaleta wala, mauula gala akatumtuwoli matausina metoya ogu gibuluwa.

¹²Mapaila kuluki matauna kidamwa yeigu babigakatotila deli matauna tuta baisa e bikanuvagasi goli.

¹³Yeigu bogwa lakamokwita matauna deli dalela komwaidona bimila tolulasi tuta komwaidona; paila uula matauna gala itagwala avai yaubada bisisu kaimapugu e baisa makawala eivigaki tomota si mitugaga kala ligaiwa.”

¹⁴E Simri matauna Salu latula, matauna tokugwala kwaitala boda metoya Simioni odalela. Peniasi bogwa eikatumati Simri sola natana vilela Midiani.

¹⁵Minana yagala Kosibi, tamala yagala Sura, matauna guyoula kwaitala boda metoya Midiani.

¹⁶E Guyau ikaraiwogi Mosese kawala,

¹⁷“Kusuvi kukwabilia deli mina Midiani e kukwatudidaimi si valu komwaidona,

¹⁸paila bogwa leivagaisi sula baisa yokomi tuta matutona leisinapwaimi mapilana Peori; deli paila minana Kosibi eikatumati tuta makwaina lelia kala tuta mapilana Peori.”