Read Kilivila KALA BAWA 3 Bible Online

KALA BAWA 3 - Kilivila bible

KALA BAWA 3

¹Baisa makawala Eroni sola Mosese veyala, tuta matutona Guyau eibigitoni Mosese wa Koya Sinai.

²Eroni litula kasitaivasi, kuluta Nadaba, eisakaili Abiu, Eleasa, e kasusu Itama.

³Matausina bogwa eikiwotaisi deli eikabomaisi bivagisi tolula,

⁴mitaga Nadaba sola Abiu ikaligasi paila uula Guyau kala lula leigabwaisi metoya kovamakava wala mapilana Sinai Viloupakala. Matausina gala pesisi, mapaila igau wala Eroni tomomova Eleasa sola Itama eiwotetilasi tolula wotitalela.

⁵E Guyau iluki Mosese kawala,

⁶“Ka kuluki Libai dalela bimaisi e kusaiki kasi karaiwaga biwotetilasi deli Eroni tolula.

⁷E avai wotetila isisu paila ulo Buliyoyova wotitalela matausina bivagaisi, deli biwotitalaisi tolula deli goli tomota komwaidona.

⁸Tuvaila matausina biyamataisi komwaidona guguwala ulo Buliyoyova, deli biwotetilasi paila komwaidona mina Isireli.

⁹E si wotetilaga mokwita biwotitalaisi Eroni deli litula.

¹⁰Ka, yoku ibodi bukunagi Eroni deli litula biwotitalaisi tolula wotitalela, e kidamwa availa bivigikoni mwada bivagi wotetila makwaina bukukwatumataisi wala.”

¹¹E Guyau iluki Mosese kawala,

¹²“Ka, tuta baisa mina Libai ulo vavagi tatougu. Avai tuta lakatumati mina Itipita si kuluta tauwau komwaidona, e wa tuta matutona yeigu akatupali mina Isireli si kuluta tauwau komwaidona deli goli si mauna kuluta, komwaidona wala ulo vavagi. Mitaga ka, mwada mina Isireli si kuluta tauwau lakatupali paila yeigu, taga kaimapula mina Libai bogwa lavigaki ulo vavagi tatougu. Yeigu goli Guyau.

¹³

¹⁴E mapilana Sinai Viloupakala Guyau ikaraiwogi Mosese bisonukuli mina Libai avaka kasi bawa metoya odalesi deli veisia titoulesi,

¹⁵bikalau komwaidona tauwau kasi tubukona natana kaina ikalisau,

¹⁶e Mosese ivagi makawala.

¹⁷Libai litula taitolu. Gerisoni, Kowati, Merari, matausina tubusia paila dala madalasina isim yagasi makawala baisa. Gerisoni litula taiyu, Libini sola Simei; Kowati litula taivasi. Amram, Isa, Ebironi, Usieli; Merari litula taiyu. Mali sola Msi. Matausina tubusia paila dala madalasina yagasi makawala baisa.

¹⁸

¹⁹

²⁰

²¹Dala Gerisoni budoyu goli, Libini veyala, Simei veyala.

²²E komwaidona tauwau kasi tubukona natana kaina ikalisau eisonukulaisi kasi bawa iboda 7,500.

²³Madalana ibudaisi si kabosikaiwa opilikwaibwaga osisunela Guyau la Buliyoyova,

²⁴dala madilana tomoyela Eliasapi matauna Laeli latula.

²⁵Dala madalana si koni Buliyoyova kwemwaidona biyamataisi, katuvala miyasina yayu olumoulela deli okoukweda, e miyana tabodala paila kabosusuvi.

²⁶E miyasina tabodala leitapapaisi Buliyoyova kwemwaidona deli kabogwabu lula, e deli miyana paila tabodala kabosusuvi matabudona olumoulela. E komwaidona taboda miyasina matausina si koni paila biyamataisi.

²⁷Dala Kowati isisu, Amram veyala, Isa veyala, Ebironi veyala deli Usieli veyala.

²⁸E komwaidona tauwau kasi tubukona natana kaina ikalisau eisonukulaisi kasi bawa iboda 8,600.

²⁹Dala madalana ibudaisi si kabosikaiwa opilibolimila opapala Guyau la Buliyoyova,

³⁰e dala madalana tomoyela Elisapani matauna Usieli latula.

³¹Matausina si koni biyamataisi Kabutu Didawogala, tebeli, kaitapa la kabototu, makwaisina kabogwabu lula, deli guguwala komwaidona tolula leivigakaisi paila si wotetila olumoulela matabudona Bomikikila, deli miyana tabodala kabosusuvi matabudona Bomikikila Sainela. Komwaidona guguwa makwaisina matausina si koni paila biyamataisi.

³²Dala Libai tomoyela Eleasa matauna Eroni tolula latula. Matauna ikaraiwogi availa availa matausina iwotetilasi olumoulela Guyau la Buliyoyova matabudona Bomikikila.

³³Dala Merari budoyu, Mali sola Msi veisia,

³⁴e komwaidona tauwau kasi tubukona natana kaina ikalisau eisonukulaisi kasi bawa iboda 6,200.

³⁵Dala madalana ibudaisi si kabosikaiwa opiliyavata opapala Guyau la Buliyoyova. Dala madalana tomoyela Surieli matauna Abiaili latula.

³⁶Matausina einagaisi biyamataisi komwaidona youdulela Guyau la Buliyoyova, ketuwolela kokolela, ulilaguvala, deli goli youdulela komwaidona. Matausina si koni biyamataisi komwaidona guguwa makwaisina.

³⁷Tuvaila biyamataisi kokolela, ulilaguvala, kenubilumala, deli yuwoyoulela taboda miyana eitavinaisi eitapataisi Buliyoyova.

³⁸E Mosese, Eroni deli litula komwaidosi wala ibudaisi si kabosikaiwa opilibomatu omatala Guyau la Buliyoyova. E komwaidona matausina si koni paila biwotetilasi olumoulela matabudona Bomikikila paila mina Isireli. E kidamwaga availa mwada bivigikoni wotetila makwaina, matauwena bikatumataisi.

³⁹Baisa Guyau la karaiwaga makawala, Mosese isonukuli komwaidona mina Libai tauwau kasi tubukona natana kaina ikalisau, kasi bawa dala madalana iboda 22,000.

⁴⁰Guyau iluki Mosese kawala, “Komwaidona mina Isireli si kuluta tauwau matausina ulo vavagi. Mapaila kugini komwaidona yagasi mina Isireli kuluta tauwau, kasi tubukona natana kaina ikalisau. Mitaga kaimapusi mina Isireli si kuluta tauwau deli si mauna kuluta, mina Libai deli goli si mauna kuluta baisa bogwa ladoki ulo vavagi! Yeigu goli Guyau!”

⁴¹

⁴²Mapaila Mosese ikabikaula igini komwaidona yagasi mina Isireli si kuluta tauwau

⁴³natana kasi tubukona kaina ikalisau, e kasi bawa iboda 22,273.

⁴⁴Tuvaila Guyau iluki Mosese kawala,

⁴⁵“Tuta baisa kukwabomi mina Libai matausina ulo vavagi goli kaimapula mina Isireli si kuluta tauwau, deli kukwabomi mina Libai si mauna kuluta kaimapula mina Isireli si mauna kuluta.

⁴⁶Omitibogwa mina Isireli si kuluta tauwau kasi bawa ikalisau mina Libai kasi bawa, kasi kakalawa matausina kesa iboda 273.[6] Mauula ibodi yoku bukugimolivau matausina kesa.

⁴⁷E taitala taitala matausina bimapu paila titoulela kwailima siliba, makawala avaka kasi karaiwaga bimapusi,

⁴⁸e mani magulona kusaiki Eroni deli litula.”

⁴⁹E Mosese ivagi makawala, ikau

⁵⁰magulona 1,365 siliba

⁵¹isaiki Eroni deli litula.