Read Kilivila KALA BAWA 33 Bible Online

KALA BAWA 33 - Kilivila bible

KALA BAWA 33

¹Livala makatupona ikikamituli yagasi valu makwaisina ambaisa mina Isireli si kabosikaiwa tuta matutona leisilavaisi Itipita, osi tuta Mosese sola Eroni leikugwaiyaisi dala madalasina.

²Tuta matutosina bibudaisi si kabosikaiwa, Mosese igini yagasi valu makwaisina makawala Guyau la karaiwaga.

³E kala vitouula taitu makwaina tubukonela namatala, tutala kwematala Luvapela Pakala bogwa leiwokuva, e yamla kweluwotala kwelimala mina Isireli isilavaisi Itipita. Guyau bogwa ikoli matausina, e isilavaisi viluwela Ramesa omitasi wala mina Itipita,

⁴matutona ibekobekwasi si kuluta tauwau Guyau bogwa leikatumtuwoli. Tutala bogwa ivagi makawala, Guyau iyomitali la peuligaga eikalisuwoli si peula minasina mina Itipita si yaubada.

⁵E mina Isireli isilavaisi Ramesa e igalasi ilosi ibudaisi si kabosikaiwa mapilana Sukoti.

⁶E oluvi igalasi ilosi ibudaisi si kabosikaiwa mapilana Esam oviloupakala kala vigimkovila.

⁷Metoya baisa ikaimilavausi ilosi mapilana Pi Airota, opilibomatula Beali Seponi, e ibudaisi kabosikaiwa katitaikinela Migidoli.

⁸E isilavaisi Pi Airota isuwalaiyaisi Bolita Pilabweyani e iviloubusisi oviloupakala mapilana Sura, e kwaitolu yam ililoulasi wala oluvi ibudaisi kabosikaiwa mapilana Mara.

⁹Metoya baisa igalasi ilosi Elim, mapilana isisuaisi utuwotu kweluwotala kwaiyu deli kailuwolima kailuwoyu pulopola, mapaila ibudaisi si kabosikaiwa baisa.

¹⁰E isilavaisi Elim e ilosi ibudaisi si kabosikaiwa katitaikinela Bolita Pilabweyani.

¹¹E isilavaisi baisa igalasi ilosi ibudivauwaisi kabosikaiwa mapilana Sini oviloupakala.

¹²Oluvi igalasi ilosi ibudaisi kabosikaiwa mapilana Dopaka,

¹³e isilavaisi Dopaka ilosi ibudaisi kabosikaiwa mapilana Alusa.

¹⁴E matausina isilavaisi baisa ilosi ibudaisi kabosikaiwa mapilana Repidim, e makatupona gala isim sopila paila matausina bimomsi.

¹⁵Metoya Repidim biuvalutuga bila mapilana Koya Ora, matausina ibudaisi si kabosikaiwa oviluwesi valu makwaisina yagasi baisa makawala, Sinai Viloupakala, Kibiroti Atava, (kaina “Lakala Vikeiya”), Asaroti, Ritima, Rimoni Peresi, Libina, Risa, Keelata, Koya Sepera, Arada, Makeloti, Taata, Tira, Mitika, Asimona, Moseroti, Bene Yakani, Ora Agidigadi, Yotibata, Abirona, Esionigeba, Sini Oviloupakala (eidokaisi Kadesi), deli Koya Ora, okaligeila valu Edom.

³⁸Wa taitu makwaina kweluwovasila kasi taitu mina Isireli leisilavaisi Itipita tubukona nalimala e kala yam kwematala, Guyau ikaraiwogi matauna Eroni tolula imwena wa Koya Ora. E matauna ikaliga baisa, kala taitu eiboda kwailakatutala kwailuwoyu kwaitolu.

⁴⁰E guyoula Aradi mapilana Kenani opilibolimila inakaigali bulogasi mina Isireli bogwa bisuvisi.

⁴¹E metoya wa Koya Ora biuvalutuga bila mapilana oitayatila Mowabi, mina Isireli ibudaisi si kabosikaiwa oviluwesi valu makwaisina yagasi baisa makawala. Salimona, Punoni, Oboti, viloudadaimi Abarim mapilana Mowabi, Diboni Gada, Alimoni Dibulataim, makwaisina Koyasi Abarim katitaikinela Koya Nebo, e deli mapilana oitayatilela Mowabi opapala Waya Yoridani kibubotala biloula Yeriko, oviluwesi mavilousina Beti Yesimoti deli Itayatila Meku.

⁵⁰E oitayatila mapilana Mowabi Yoridani piliyuwela kibubotala biloula Yeriko, Guyau isaiki Mosese

⁵¹karaiwaga makwaisina kasi katuloluta mina Isireli kawala, “Avai tuta bukuluvipeilisi Waya Yoridani e bukusuvisi oviluwela Kenani,

⁵²ibodi wala bukubokavilaisi komwaidona tomotela valu mapilana. Kwatudidaimisi komwaidona minasina tokolu eibubulokaisi dakuna deli tanumnumta, deli komwaidona makatuposina eivigakaisi si kabotapwaroru.

⁵³Kuyoulisi valu e kusikaisi makwaina, paila yeigu bogwa lasakaimi.

⁵⁴Bukuvilaisi valu oluwalaisi dala dilatala dilatala metoya bukukowobobutasi, avai dala saina dilaveka e kusakaisi si valu pilaveka, dala dilakekita si valu pilakekita.

⁵⁵Mitaga kidamwa gala bukubokavilaisi komwaidona tomotala valu mapilana, matausina kesala eisisuaisi, bukugigisaisi makawala gibai omitami deli makawala kaiyala ebubasaimi; e matausina wala bitovilasi bikabiliaimi.

⁵⁶Kidamwa gala bukubokavilaisi bisunapulasi, ka, bakatudoumwaimi, makawala goli laninanamsa bakatudoum matausina.”