Read Kilivila MAIKA 4 Bible Online

MAIKA 4 - Kilivila bible

MAIKA 4

¹Avai tuta oyamla bima, koya makwaina Bwala Kwebumaboma eititoki bivigaki kala wonaku bikalisuwoli komwaidona, bikalituwoli odubasi komwaidona koya. E bidubadu tomota ituwoli boda ituwoli boda biwoduduwasi bimakaiasi wala baisa,

²e si tomota bilivalasi, kawasi, “Tauwau, kumaisi tamwenasi Guyau ola koya,[7] e bitalokaiasi mina Isireli si Yaubada ola Bwala Kwebumaboma. Paila matauna bivitulokaidasi avaka magila bitavagaisi, e bitaliloulasi avai keda matauna binagi. Paila Guyau la vituloki imaima metoya Yerusalem. Metoya baisa Saiyoni matauna ililivala baisa la tomota.”

³Matauna bibuyoyu kominimani oluwalaisi mabudosina boda ituwoli ituwoli, deli oluwalaisi kabokwaraiwaga kwevakaveka makwaisina katitaikina deli kaduwonaku. Si puluta bivigakaisi si kema, e si kaiyala bivigakaisi si daima. Tomota ituwoli ituwoli gala tuvaila bilosi okabilia, deli gala tuvaila bikatubaiasasi paila kabilia.

⁴Taitala taitala bisibwabwaila metoya ola waini bigulesi deli seuseu, e gala availa bivigaki matauna bikokola. Guyau Topeuligaga bogwa eikatotila paila baisa.

⁵Kabokwaraiwaga kwaitala kwaitala ititapwaroru e ikikabikaula la yaubada titoulela. Mitaga yakidasi bitatapwarorusi deli bitakabikaulasi baisa Guyau da Yaubadasi, tuta gala biwokuva, gala biwokuva.

⁶E Guyau ikaibiga, kawala, “Tuta igau bima bakouguguli tomota gulitinidesi matausina lamipuki, matausina goli availa availa eibodasi mwau metoya okatupipi.

⁷Matausina togugolia deli kaduwonaku si valu. Mitaga bavitouli kwaitala vavagi kwaivau baisa availa matausina kesa, e matausina bavigaki boda kwaiveka. Yeigu bakaraiwogi odubasi matausina wa Koya Saiyoni metoya tuta matutona e tuta gala biwokuva.”

⁸E yoku Yerusalem, baisa Yaubada matauna iiyamati la tomota makawala taitala toyamata sipi. Igau tuvaila yoku vilouguyau odabala makwaina valu omitibogwa m kwabokwaraiwaga.

⁹Avaka paila kukwaviviasi valam saina peula? Avaka paila kuboda mwau makawala natana vivila eigadi paila bivalulu? Kaina paila gala mi guyau, deli kam topilasi bogwa eikaligasi?

¹⁰Tomotala Yerusalem, kuluvidoudogasi kukwayagigilasi, makawala natana vivila tutala bivalulu. Paila baisa tuta yokomi bukusilavaisi mi valu e bukusisuaisi ovilouwokuva. Yokomi bukulosi mapilana Babiloni,[8] mitaga mapilawena Guyau bikolaimi metoya kami tilaula.

¹¹Bidubadu boda bogwa eikougugulaisi paila biwaimi. Matausina ikaibigasi, kawasi, “Ibodi Yerusalem wala bidadaimi. E yakidasi bitagisaisi mapilana valu bogwa bidadaimi.”

¹²Mitaga boda mabudosina gala wala inikolaisi avaka Guyau nanola. Gala wala itapuloki ninasi, kidamwa eikouguguli gulitinidesi mwada bimipuki matausina makawala witi imaiyaisi paila bitutaisi.

¹³Guyau ikaibiga, kawala, “Mina Yerusalem, kulosi kumipukwaisi kami tilaula! Yeigu bavigakaimi bukupeulasi makawala bulumakau namwala, kala doga tanumnumta aiyani deli kwaibakwaila tanumnumta barasi. Yokomi bukuvagunugunaisi bidubadu boda si veiguwa eikwaiyaisi metoya ovilougaga, yokomi bukusakaigusi, yeigu Guyoula valu watanawa komwaidona.”