Read Kilivila NEUM 1 Bible Online

NEUM 1 - Kilivila bible

NEUM 1

¹E livala makwaina livalela Niniba avaka Neum matauna guma Elikosi, leigisi metoya okilisala.

²Ka, Guyau Yaubada gala bitagwala bukutapwarorusi baisa availa mwada kaimapula matauna; e matauna bimipuki matausina availa availa ikoulovaisi matauna. Metoya ola gibuluwa matauna bimipuki matausina.

³E Guyau gala togibuluwa wala mitaga saina wala topeuligaga, deli gala avai tuta bitagwala mwada tosula gala bibani kala mipuki. Ambaisa ambaisa Guyau bililoula, utuyagila bitokaia; e makawala goli lowalowa baisa tubumyoula kaikela!

⁴Matauna ikikaraiwogi bolita, e imada. Matauna ivigaki waya bipakalasi. Saivau mapilana Basani bivamatasi. Koya Kamela kala gigisa bivadegila deli lalela Lebanoni bimwailelasi.

⁵E koya kwevakaveka bilikulikusi, koya kwekikekita bitumgeyaisi omatala Guyau. Avai tuta Guyau biyoulapula pwaipwaia biyega; e valu watanawa tomotala komwaidosi bitatatuvasi.

⁶Avai tuta matauna bigibuluwa availa ibodi bisisu tomomova? Availa ibodi bimova metoya ola gibuluwa matauna? Avai tuta matauna bikasau kala leiya; dakuna bitamsomsilasi wala bimila pwaipwaia omatala.

⁷Guyau matauna Giyoubwaila; matauna ikoli la tomota osi tuta mwau; matauna iiyamati availa availa ininavilasi baisa matauna.

⁸Ka, makawala sakala saina peula isisakaula, matauna imtuli komwaidona kala tilaula; matauna ivakaligi availa availa matausina ikoulovaisi matauna.

⁹Avai vavagi kukwewalaisi paila Guyau? Matauna makateki bikatudoumwaimi. Gala wala availa ibodi bisikileiwa kowolova baisa matauna.

¹⁰Matauna bivakadoumwaimi wa kova, yokomi tomommata makawala yonitaitu deli mnumonu yammatutila.

¹¹Ka, Niniba, metoya baisa yoku, taitala tau eikaloubusi, matauna ivakasau mitugaga e ikikeiwali Guyau.

¹²Baisa makawala avaka Guyau eilivala baisa la tomota mina Isireli. “Ka, kaina goli mina Asiria saina mina papeula deli tobobawa, mitaga makateki bidoumlabasi e bitamwauki kasi pikowau. Ka, yokomi ulo tomota, avigakaimi kulumkolaisi mmayuyu, mapaila gala tuvaila bavigivau.

¹³Tuta baisa bakapituni si karaiwaga mina Asiria metoya baisa yokomi deli bakotuni miyasina yuwoyoula leiyuwolaimi.”

¹⁴Baisa makawala avaka Guyau bogwa leikaraiwaga paila mina Asiria. “Matausina gala tuvaila bidalasi paila bikitetilasi dalesi. Yeigu bakatudidaimi minasina si yaubada tokolu olumoulela si bwala tapwaroru makwaisina. Yeigu bakatubiasi kwaitala laka paila mina Asiria. Matausina gala ibodi bimovasi.”

¹⁵Ka, kugisaisi, taitala touwata leimaima odabala koya, leimai bulogala bwaina! Matauna leimaima paila bikamituli bulogala tomgwaga! Ka, tomotela Yuda, kumwasawaisi makwaisina kami paka deli kusakaisi Yaubada makawala avaka mi biga katotila baisa matauna. Matausina mina mitugaga gala tuvaila biyoulisi mi valu. Matausina komwaidosi bogwa wala leidoumlabasi.