Read Kilivila SEPANAIA 3 Bible Online

SEPANAIA 3 - Kilivila bible

SEPANAIA 3

¹Mina Yerusalem bogwa bidoumsi, matausina mina mitugaga, deli mina kosomapu, e tuvaila ilamidadaisi si tomota tatousi.

²Matausina gala binakaigalaisi kaina bitagwalasi biyosisi Guyau la vituloki. Matausina gala idubumaisi Guyau, kaina binigadaisi matauna paila pilasi.

³Ka, matausina kaidadala valu makawala minasina laiyoni eiguguvavilasi. E matausina tovagisi yakala saina mina buligaga makawala minasina ugiwagi saina kasi molusaula, e gala ibodi bikabogaisi kaitala totuwana igau biyam.

⁴E matausina tovitoubobuta osi paisewa imamasi ikayupalaisi titoulesi, e deli mina ubuwabu. E matausina tolula iyogwalaisi uvagila kwebumaboma deli ikivilivauwaisi la karaiwaga Guyau mwada bibanaisi kasi bwaina.

⁵Mitaga Guyau gala isilavi, eisisu wala olopola Yerusalem. Matauna iuvagi avaka duwosisia e gala avai tuta ivagi sula. E kaukwau kwaitala kwaitala matauna iuvagi karaiwaga duwosisia baisa la tomota, e gala avai tuta bilapi. Mitaga matausina mina mitugaga tosisula baisa immitugagasi wala e gala isim kasi mmosila.

⁶Guyau ikaibiga kawala, “Ka, bogwa lakatudumani budomwaidona boda. E si valu bogwa lakodidaimi, e kalila si valu deli si bwala paila kabilia kwedidadaimi wala. E valu makwaisina vilouukuwokuva wala deli kedala kadaukuwokuva - e gala taitala ikesa.

⁷Adokila mwada ulo tomota ibodi bitemmalaigusi, deli bikabikuwolaisi ulo vituloki e gala avai tuta bilumwelavaisi vituloki makwaina bogwa lavituloki matausina. Mitaga gala imomwa ibubunasi bubunela gaga makawala omitibogwa.”

⁸E Guyau ikaibiga kawala, “Ka, kutulotulasi, kututulaigusi yam makwaina batokaia paila batabinaki boda komwaidona. Yeigu bogwa lavitobu nanogu paila bavayouli boda komwaidona deli kabokaraiwaga gulitinidesi kidamwa bavigaki bilumkolaisi lutula ulo gibuluwa. E metoya ogu gidumleiya makawala kova, valu watanawa komwaidona bivakovi.

⁹“E oluvi bakatumapu tomotasi boda mabudosina, e matausina bininigadasi baisa wala yeigu, e gala baisa tuwoli yaubada. E matausina komwaidosi wala bikabikuwolaigusi.

¹⁰Ka, ulo tomota metoya omiloutalʹo mapilana Sudani bimiakaigusi si lula.

¹¹Ka wa tuta matutona yokomi ulo tomota gala ibodi bukummosilasi tuvaila paila mi kamnomwana lokupakaigusi. Yeigu babokavili matausina availa availa mina kamnomwana deli mina kaluvalova e gala avai tuta tuvaila bukukominimanisi baisa yeigu ogu koya kwebumaboma.

¹²E yeigu bavigaki tomota matausina ninasi watanawa deli mina mmanum, e matausina goli bimakaiagusi paila pilasi.

¹³E tomotala Isireli matausina availa availa bikesasi gala tuvaila bilamidadaisi availa, gala bisasopasi, gala mwada bisipulokaisi. Matausina bisibwabwailasi deli bikwalasi e deli goli gala tuvaila bikukolaisi availa.”

¹⁴Yokomi mina Isireli kuwosisi toyo govami deli mi mwasawa. Yokomi mina Yerusalem, kumwasawasi metoya oninami komwaidona!

¹⁵Ka, Guyau bogwa eiligaim kami mipuki; matauna bogwa eimtuli komwaidosi kami tilaula. Ka Guyau matauna guyoula Isireli bogwa eisikailimi, e gala wala avaka uula bukukokolasi tuta baisa.

¹⁶E kala tuta bogwa leimaima paila matausina bilukwaimi yokomi mina Yerusalem kawasi, “Yokomi mina Saiyoni, gala bukukokolasi! Gala bimama yumami!

¹⁷E Guyau mi Yaubada deli yokomi e metoya ola peula yokomi kutomgagasi. Guyau bimwamwasila nanola paila yokomi, e metoya ola bobwailila bisakaimi momova kwaivau. Matauna biwosi deli la mwasawa baisa yokomi,

¹⁸e la mwasawa gala bitakaibiga makawala matausina eipakapakasi deli si mwasawa.” E Guyau ikaibiga kawala, “Ka, kami kapoi paila kami katudoum bogwa eiwokuva e leitalilisi kami mmosila.

¹⁹E kala tuta bogwa leimaima! Yeigu bamipuki matausina kami tolamadada, e bakoli matausina mina pem deli bakaimilivau matausina okatupipi bamai osi valu. Bakivilivau kasi mmosila bavigaki kasi taimamila, e komwaidona valu watanawa biyakawolaisi matausina.

²⁰E kala tuta bogwa leimaima! Yeigu bakaimilivau mi tomota matausina eiwakisilava bamai osi valu e bavigakaimi bulogami bikaligiaki ovalu watanawa komwaidona deli bavigakaimi bukusibwabwailasi tuvaila.” Baisa Guyau bogwa eilivala.