Read Kilivila SEKARAIA 1 Bible Online

SEKARAIA 1 - Kilivila bible

SEKARAIA 1

¹Olopola kwaiyuwela kala taitu Dariusa eikikaraiwaga mapilana Pesia, e tubukona nalima natolula, Guyau iluki biga mabigasina baisa tovitoubobuta Sekaraia, matauna Berekia latula, e Ido tabula.

²E Guyau Topeuligaga iluki Sekaraia biluki tomota kawala, “Yeigu Guyau saina agibuluwi tubumia omitibogwa,

³mitaga baisa tuta lalukwaimi kawagu, ‘Kukwaimilavausi baisa yeigu, e yeigu bakaimilavau baisa yokomi.

⁴Ka, gala bukuvigakaimi makawala tubumia. Tuta omitibogwa tovitoubobuta ikamitulaisi baisa matausina avaka ulo biga, ilukwaisi gala bibubunasi avai mitugaga, deli gala bimitugagasi tuvaila. Mitaga matausina gala wala inakaigalaigusi.

⁵Ka, tubumia deli matausina tovitoubobuta komwaidosi wala bogwa eikaligasi.

⁶E metoya oudosi ulo towotetila matausina tovitoubobuta, yeigu asaiki kasi karaiwaga deli kasi katuloluta tubumia omitibogwa. Mitaga matausina ikaluwouwaisi ulo karaiwaga mapaila ibodasi mmayuyu. Oluvi matausina ininavilasi deli isimokwitasi baisa yeigu, Guyau Topeuligaga, lamipuki matausina makawala avaka eibudoki kasi mipuki e deli goli makawala avaka bogwa lavitobu nanogu bavagi.’”

⁷Olopola kwaiyuwela kala taitu Dariusa eikikaraiwaga, tubukona naluwotala natalela (tubukonela Sebati[1]) kala yam kwailuwoyu kwaivasila, wa bogi Guyau ilukwaigu la biga metoya okilisala.

⁸E yeigu agisi Guyau la anelosi taitala eisisila otapwala natana wosa nabweyani. Matauna ivakuloti la wosa e itoulisi oitayatila oluwalaisi poulotala gumgwam, e otuboulola mimilisi wosa tuvaila ibokulaisi - nabubweyani, natunutunu, deli napupwakau.

⁹E yeigu akatupoi matauna kawagu, “Tomoya, wosa minasina avaka kasi katumiki?” E matauna ivitakaula kawala, “Bogwa bakamitububuli avaka kasi katumiki.

¹⁰Guyau eiwitali minasina bivakawolaisi valu watanawa.”

¹¹E minasina ikikamitulaisi bulogala valu baisa anelosi Kawasi, “Yakamaisi bogwa lakalouyasi valu watanawa komwaidona, e kabanaisi viloumwaidona wala bogwa eimanum deli eivakota.”

¹²E anelosi ikaibiga kawala, “Mwa Guyau Topeuligaga, yoku lokugibuluwi Yerusalem deli mavilousina viluwela Yuda, leiboda kweluwolima kweluwoyu taitu. Ammakawala kala kaduwonaku tuvaila e oluvi bukunokapisi ke?”

¹³E Guyau ivitakauloki anelosi deli la katumanum,

¹⁴e anelosi ilukwaigu bakagai la biga Guyau Topeuligaga kawala. “Yeigu saina ayebwaili deli ikaiki wowogu paila Yerusalem, makwaina ulo valu kwebumaboma,

¹⁵mitaga ulo gibuluwa sainela baisa mabudosina boda iyomkulovaisi wala kasi mmayuyu ulo tomota.

¹⁶Mapaila yeigu basivilaki Yerusalem e banokapisi makwaina. E ulo Bwala Kwebumaboma bikaliivauwaisi deli goli viluwela.”

¹⁷Tuvaila goli anelosi leilukwaigu balivala, “Guyau Topeuligaga eikaibiga, la valu mavilousina bisibwabwailasi e deli matauna tuvaila binokapisi Yerusalem e bitayuvisi livalela makwaina, la valu tatoula.”

¹⁸Kwaiyuwela kilisala agisi kaivasi kasi doga bulumakau.

¹⁹Akatupoi anelosi matauna kalilivala kamataiyu kawagu, “Avaka kala katumiki makavisina doga ke?” E ivitakaulokaigu kawala, “Kala katumiki valu watanawa tomotala topapeula matausina leibutugigaiyaisi tomotala Yuda, Isireli, Yerusalem.”

²⁰Oluvi Guyau ivitulokaigu taivasi topaisewa deli si kaiwawa.

²¹E yeigu akatupoi kawagu, “Tauwau matausina leimasi avaka bivagaisi?” Matauna ivitakaula kawala, “Ka, leimaisi bivitukukolaisi deli bikodidaimisi boda mabudosina bogwa mokwitatoula eiyogagaisi viluwela Yuda deli eibutugigaiyaisi tomotala.”