Read Kilivila SEKARAIA 10 Bible Online

SEKARAIA 10 - Kilivila bible

SEKARAIA 10

¹Kunigadasi baisa Guyau paila kuna otutala sopu. Paila Guyau matauna kala tosaiki kuna e ivasusuni si bagula tomota komwaidona.

²Tomota ikikatupoisi baisa tokolu deli tokalamimi, mitaga mapula ibanaisi sopa deli nagowa. Mimilisi ikatumikisi mimi, mitaga isipulokaimi wala, e avaka eikatigamwaisi lupomi baisa gala wala isim dimlela. Mapaila tomota iwausi wala makawala sipi natamwau. Matausina ibodasi mwau paila uula gala kasi tovakeda.

³Guyau ikaibiga kawala, “Yeigu saina agibuluwi matausina mina mitawasi, paila ikaraiwogaisi ulo tomota, mapaila yeigu bamipuki matausina. Tomotela Yuda baisa ulo vavagi, e yeigu Guyau Topeuligaga bayamati matausina. E bavigaki matausina makawala ulo wosa napapeula.

⁴E oluwalaisi matausina bavigaki mimilisi bitokaraiwagasi, bitokugwasi, deli bitokumatoulasi, paila biyamataisi ulo tomota.

⁵Tomotela Yuda bitomgwagasi makawala tokabilia bivapupoiyaisi kasi tilaula bimila pwadidiweta olopola keda. Matausina bikabiliasi paila uula Guyau deli matausina, e matausina bikalisauwaisi kasi tilaula matausina tosila wosa.

⁶“Ka, yeigu bavigaki mina Yuda bipeulasi; e bakoli mina Isireli. E yeigu banokapisi matausina e bakaimilivau komwaidosi matausina bamai osi valu. E bavigaki matausina makawala gala avai tuta akoulovi matausina. E yeigu goli Guyau si Yaubada; e yeigu bamapu si nigada.

⁷E tomotala Isireli bipeulasi makawala tokabilia, e bimwasawasi makawala matausina eimomomsi waini. E tubusia tuta oluvi biluluwaisi tomgwaga makwaina, deli bimwasawasi paila avaka Guyau bogwa leivagi.

⁸“Yeigu badou ulo tomota e bakouguguli matausina. Bakoli matausina, deli bavigaki matausina bidalasi makawala omitibogwa.

⁹Ilagoli bogwa labutugigai matausina eilosi isilomlasi oluwalaisi boda ituwoli ituwoli, mitaga ambaisa ambaisa eisikaduwonakusi matausina biluluwaigusi wala. Matausina deli litusia bimovasi, e bikaimilavausi osi valu gulitinidesi.

¹⁰Metoya mapilasina Itipita toyo Asiria yeigu bakaimilivau matausina osi valu, e bimilivalusi osi valu tatousi. Bavigaki matausina bimilivalusi Giliadi deli goli Lebanoni; e valu viloumwaidona bikasewoki wala tomota.

¹¹Avai tuta biluvapelasi oluwalela bolitala uvagila mwau, yeigu Guyau bawaiya kaisai, e sopila Waya Naili bimada. Asiria kwekamnomwana bavabu watanawa, e Itipita kwaipeula bavigaki bimama.

¹²E yeigu bavigaki ulo tomota bipeulasi. E matausina bitemmalaigusi deli bikabikuwolaigusi.” Baisa goli Guyau eilivala.