Read Kilivila SEKARAIA 2 Bible Online

SEKARAIA 2 - Kilivila bible

SEKARAIA 2

¹Ka, kilisala tuvaila agisi taitala tau oyamala eiyosi yatala kaivisaikola.

²E akatupoi matauna kawagu, “Mwa, ambaisa bukula ke?” E matauna ivitakaulokaigu kawala, “Bala bavisaikoli Yerusalem, e bagisi ammakawala kala maloula toyo kala beiyaya.”

³Oluvi agisi anelosi matauna kalilivala kamataiyu eivalapula, e taiyuwela anelosi ivalapula imakaia matauna bibodi.

⁴E matauna eimaibogwa iluki sola kawala, “Mwa kusakaula kula kuluki matauna tau totubovau eiyosi miyana kaivisaikola kawam, ‘Yerusalem makateki bivakasau tomota toyo bulutuvalu, mapaila saina vilouveka e gala wala ibodi bitapali kalila.

⁵Ka, Guyau bogwa eikatotila bivigaki titoulela makawala kova bipali kalila valu e bikoli makwaina, e matauna bisisu baisa deli komwaidona kala katububula.’”

⁶E Guyau iluki la tomota kawala, “Yeigu bogwa labutugigaiyaimi lokulosi ambaisa ambaisa. Mitaga yokomi lokusisuaisi okatupipi, baisa tuta kukwaimilavausi Yerusalem.

⁸Kidamwa availa biwaimi, matauna eiwawaiya avaka yeigu saina ininaki lopogu.” Mapaila Guyau Topeuligaga iwitalaigu paila baluki la biga baisa boda mabudosina, e mabudosina goli eilebwaisi si guguwa la tomota.

⁹Kawagu, “E Guyau titoulela bikabilia deli yokomi, e oluvi tomota matausina omitibogwa lokuvigakaisi mi touwata bilebwaisi mi guguwa.” E avai tuta bikaloubusi makawala, komwaidona tomota binikolaisi baisa Guyau Topeuligaga leiwitalaigu.

¹⁰Guyau ikaibiga kawala, “Yokomi mina Yerusalem, kuwosisi deli mi mwasawa paila yeigu bogwa lama basividulaimi!”

¹¹Wa tuta matutona bidubadu boda bimakaiasi Guyau e bivigaki matausina la tomota. Matauna bisikailimi, e yokomi bukunikolaisi matauna goli leiwitalaigu lamakaiami.

¹²E tuvaila Guyau bivigaki kala katukila Yuda la vavagi tatoula olopola pwaipwaia makwaina kwebumaboma, e Yerusalem makwaina la valu tatoula.

¹³Komwaidomi kumanumsi omatala Guyau, paila matauna leimaima metoya ola valu kwebumaboma.