Read Kilivila SEKARAIA 9 Bible Online

SEKARAIA 9 - Kilivila bible

SEKARAIA 9

¹Baisa Guyau la biga. Matauna bogwa eikaraiwaga bimipuki valu Adaraki deli vilouveka Damasiko. Isireli dalela baisa Guyau la vavagi deli goli vilouvekala Siria baisa Guyau la vavagi.

²E Amati mavilouna deli kaligeila Adaraki tuvaila la vavagi, deli goli vilouvakaveka Taia toyo Saidoni, deli goli tomotesi saina mina katavatu.

³E mina Taia bogwa eikaliaiisi kasi kali kwepapeula deli eikogugulaisi siliba toyo goula saina bidugaga, tavayayaila wala!

⁴Mitaga Guyau igau bikau komwaidona avaka avaka leiyosisi. E bilavi komwaidona si veiguwa bila obolita, e viluwelaga bivakakovi wa kova.

⁵E mina Asikeloni bigisaisi mipuki makwaina e bikokolasi, mina Gasa bigisaisi mipuki makwaina, e saina biyomiyuyu matausina. Makawala goli mina Ekironi, si pikwaku bogwa biwokuva. E guyoula Gasa bitamwau, deli Asikeloni biviloububu.

⁶Tomota lumolomla bisikaisi Asidodi. E Guyau eilivala kawala, “Mina Pilisitia matausina ninasi walakaiwa bogwa bavabu.

⁷E matausina gala tuvaila bikamsi kasi viliona deli buyavila, kaina bikamsi avai kaula bomikikila. Komwaidona matausina eikesasi mina mmomova bavigaki ulo tomota deli bavigaki kwaitala dala odalela Yuda. Mina Ekironi bavigaki ulo tomota, makawala lavigaki mina Yebusi.

⁸Yeigu bayausi ulo valu e gala batagwala tokabilia bisuwalaiyaisi makwaina. Yeigu gala batugwali matausina giyougaga bilamidadaisi tuvaila ulo tomota. Paila yeigu bogwa leigisaki matagu ammakawala ulo tomota leilumkolaisi mmayuyu.”

⁹Yokomi mina Saiyoni,[4] bimwamwasila ninami sainela, e bukugovasi deli mwasawa, yokomi mina Yerusalem. Ka, mi guyau eimaima baisa yokomi. Matauna eimaima totomgwaga deli tokwalisewa, mitaga tomanum, leisila wa ase, e wa ase nagwadi leisila.

¹⁰Guyau ikaibiga, “Bakatuyouli wogala kabilia kaibibiu metoya mapilana Isireli, e balau minasina wosa metoya mapilana Yerusalem. Makaisina kaiyala eiyosisi paila kabilia bogwa bakomtumtu. Mi guyau bivakadi boda ituwoli ituwoli bivakotasi. Matauna biguyau metoya pilatala bolita bila bolita piliyuwelʹo, e metoya wa Waya Yupereiti bila okala kalitutila valu watanawa.”

¹¹Guyau ikaibiga, “Ulo kabutu deli yokomi bogwa lokukwatukikitaisi metoya obuyavisi mi lula bidubadu, e mauula baisa, bogwa bataneku mi tomota, e bisilavaisi metoya okatupipi, makwaina makawala utuwotu kwaimada.

¹²E yokomi tokwatupipi, bukukwaimilavausi paila baisa tuta isim mi pikwaku. Kukwaimilavausi baisa omi kabokwala. Ka, baisa tuta alukwaimi, biboda sivayu bamipuvau baisa yokomi, e bamitukwaiyaimi kaimapula komwaidona avaka kami mmayuyu.

¹³Bavigaki mina Yuda ulo kaikwakuna, e mina Isireli bavigaki ulo kaiyala. Bavigaki tolesi Saiyoni ulo puluta, paila bakabilia deli mina Girisi.”

¹⁴Guyau biyoumatila odubasi la tomota. Matauna bilavi la kaiyala makala kavikavila. Guyau Towalakaiwa biyuvi tauya, e bikatudelisi deli la tomota olumoulela utuyagila metoya opilibolimila.

¹⁵Guyau Topeuligaga bikoli la tomota, e matausina bikatumtuwolaisi kasi tilaula. Otutala kabilia bigovasi makawala tomomom kaibotutu. Bitapupoiyaisi kasi tilaula, e buyavisi bitayelu makawala buyavila lula tutala biligabwaisi odabala kabolula metoya wa bolu.

¹⁶Avai tuta yam makwaina bima, Guyau bikoli la tomota, makawala taitala toyamata sipi bikoli la yawa metoya okabosilagi. Matausina bivivivilasi ola valu, makawala dakuna kwevivivila okala kulupaipi guyau.

¹⁷Wo, isa bwaina mapilana valu saina kweminabwaita. Tubovau bogwa bikamsi kaulela e bimomsi wainila, e bogwa bibwasa uwosi.