Read Kilivila MADIU 12 Bible Online

MADIU 12 - Kilivila bible

MADIU 12

¹Oluvi Yesu ivawalai obigulela witi wa yam sabate.[138] La toligalega ikamolusi[139] mapaila igudaisi waitunela witi, e ikamkwamsi.

²Mitaga tutala Parisi[140] igisaisi, ilukwaisi matauna, kawasi, “Ka, m toligalega gala ivagaisi avaka ibodi[141] Mosese la Karaiwaga;[142] paila matauna ikikili yam sabate.”

³Iluki matausina, kawala, “Kaina gala lokukwalawasi avaka Debida ivagi, tutala ikamolu deli matausina kala tobwakuli?

⁴Paila isuvi ola bwala Yaubada[143] e matauna deli kala tobwakuli ikomasi kaula kwaibumaboma avaka leisemakavaisi baisa Yaubada. Mitaga gala ibodi Mosese la Karaiwaga kidamwa bikomasi, paila baisa tolula wala kʹasi.

⁵Kaina gala lokukwalawasi ola Karaiwaga Mosese, wa yam sabate tolula wa Bwala Kwebumaboma iyogwalasi sabate[144] e gala isim kasi pakula.

⁶Mitaga alukwaimi, baisa isisu avaka ikalisau Bwala Kwebumaboma.

⁷Mitaga kidamwa lokukwatetasi vituloki makwaina, ‘Yeigu gala magigu lula, mitaga magigu wala mitakwai,’ gala bukukwamogaisi matausina tobubwaila.

⁸Paila yeigu Latula Tomota[145] guyoula sabate.”

⁹E Yesu isilavi baisa, isuvi kwaitala bwala tapwaroru.

¹⁰E ka, taitala tau leisuvi, yamala kwayamata. Mimilisi mwada bitabinakaisi matauna. E ikatupoiyaisi, kawasi, “Ki, ibodi Mosese la Karaiwaga bitayomovasi wa yam sabate kaina gala?”

¹¹Iluki matausina, kawala, “Kidamwa taitala yokomi iyosi natana sipi, e kidamwa minawena bikapusi wa mesi wa yam sabate, biyosi e bilupi minawena kaina gala?

¹²E taitala tau mapula ikalisuwoli sainela mapula natana sipi. Mapaila ibodi Mosese la Karaiwaga bitamitakwaisi wa yam sabate.”

¹³Oluvi iluki matauna tau, kawala, “Kuvitukoli yamam.” Ivitukoli, e bogwa ibwaina makwayana makawala kwayayuwela.

¹⁴Mitaga Parisi isunapulasi ikeiwalaisi Yesu, ammakawala bivigakaisi kidamwa bikatumataisi matauna.

¹⁵Yesu ivitusi baisa e isilavi mapilana. Bidubadu ibokulaisi matauna; e ikatuyuvisi tokwatoula komwaidosi;

¹⁶e iluluki matausina taga bikayayaisi availaga matauna.

¹⁷E avaka Aisea tovitoubobuta ilivala gala bisala, kawala,

¹⁸“Ka, ulo touwata bogwa lanagi matauna; tombwailigu matauna, iyomwasalaigu. Basaili ulo Baloma baisa matauna, e biyakali baisa mina watanawa komwaidosi.

¹⁹Matauna gala bikominimani, biwaiweya; kaina gala taitala bilagi kaigala okadumalagala valu.

²⁰Mnumonu bogwa itawoula gala bikiuwoli, e kovagwaia[146] gala bikimati. Igau bimai karaiwaga duwosisia, e karaiwaga makwaina bikalisuwoli;

²¹e mina watanawa bipikwakusi baisa matauna.”

²²E imiakaisi matauna taitala tokwau tokutabu, paila baloma gaga eisikaila matauna; Yesu ikatuyuvisi matauna e tokutabu ilivala e igisa.

²³Tomota komwaidosi saina itutu uwosi sainela, ikaibigasi, kawasi, “Kaina matauna Latula Debida[147] ke?”

²⁴Mitaga tutala Parisi ilagaisi makwaina, ikaibigasi, kawasi, “Tau matauna iiyabi baloma gaga paila wala Bielisibuli,[148] baloma gaga si guyau, ikatupewoli matauna.”

²⁵Yesu inikoli si nanamsa, e iluki matausina, kawala, “Kidamwa kabokwaraiwaga eipoisivisisi, e iuvataisi, kabokwaraiwaga makwaina bitamwau; e kidamwa valu kaina dala ikovisisi, e iuvataisi, makwaisina gala bitotusi.

²⁶E kidamwa Setani iyabi Setani, la karaiwaga eikovisisi iuvataisi, e ammakawala la karaiwaga bisisu ke?

²⁷Kulivalasi yeigu aiyabi baloma gaga paila Bielisibuli ikatupewolaigu. Mimilisi yokomi iiyabaisi baloma gaga ke? Kudokaisi availa ikatupewoli matausina? Mapaila matausina bikibubotaisi mi sula.

²⁸Mitaga yeigu aiyabi baloma gaga paila Bilomala Yaubada ikatupewolaigu, e baisa ivitububoti kidamwa Yaubada la Karaiwaga bogwa leimakaiami.

²⁹“Ammakawala igagabila taitala bisuvi ola bwala topeula biveilau la guguwa? Ikugwa biyuwolibogwi topeula matauna oluviga biveilau metoya ola bwala.

³⁰“Availa gala ipilasaigu, matauna ipakaigu, e availa gala ikougugula deli yeigu, matauna tokodadaimi gugula.

³¹Mapaila alukwaimi, Yaubada biligaiwa tomota si mitugaga komwaidona deli si bigigaga baisa Yaubada; mitaga gala biligaiwa si bigigaga baisa Baloma Tobumaboma.

³²E availa bilivala paila magila bisilibodaigu yeigu Latula Tomota, Yaubada biligaiwa la mitugaga; mitaga availa bilivala mwada bisilibodi Baloma Tobumaboma, Yaubada gala biligaiwa la mitugaga, gala tuta baisa deli gala tuta igau bima.

³³“Kidamwa kutaviyasi kai bibwaina e kaiuwala bibwaina; kidamwa kutaviyasi kai bigaga e kaiuwala bigaga; paila bitavitusi makaina metoya ouwala.

³⁴Tubula mitugaga yokomi! Ammakawala bukulivalaisi vavagi bwaina kidamwa yokomi tomitugaga? Gagabila bitalivala wala avaka ivakasau nanoda.

³⁵Tomitukwaibwaila imai vavagi bwaina metoya ola guguwa bwaina; e tomitugaga imai vavagi gaga metoya ola guguwa gaga.

³⁶“E alukwaimi, wa Yamla Yakala taitala taitala bikamituli paila avai bigimakava leilivala.

³⁷Yaubada bikabwailim kaina bikamogaim metoya om biga.”

³⁸E mimilisi toninitalapula paila Karaiwaga toyo Parisi ilukwaisi matauna, kawasi, “Tovituloki, magimasi bakagisaisi bukuvagi vavagi siligaga.”

³⁹Mitaga Yesu ivitakauloki matausina, kawala, “Tubwa matubona tubugaga ilumwelavaisi Yaubada. Kunainevisi vavagi siligaga; mitaga basakaimi Youna tovitoubobuta kala kabutuvatusi e gala avai kabutuvatusi tuvaila.

⁴⁰Paila makawala Youna ikalatolu ibugitolu olopola yena naveka, makawala yeigu Latula Tomota bakalatolu babugitolu olumoulela pwaipwaia.

⁴¹Mina Niniba[149] bitotusi wa Yamla Yakala deli yokomi e biyakalaimi; paila ininavilasi paila la kamituli Youna; e ka, yeigu asisu baisa akalisau Youna.

⁴²Minana Giyouvila mapilana pilayouya[150] bitotu wa Yamla Yakala deli yokomi, e biyakalaimi, paila minana ima saina kaduwonaku mwada bilagi la kabitam Solomoni; e ka, yeigu asisu baisa akalisau Solomoni.

⁴³“Tutala baloma gaga isilavi avai tau ivavivila mapilasina oviloupakala[151] inainevi vaiwasi, mitaga gala ibani.

⁴⁴E ikaibiga, kawala, ‘Bakaimilavau ogu bwala ambaisa lasunapula lama.’ Ima, e ibani makwaina kwaiwokuva, bogwa itanevaisi deli ikatubiasaisi.

⁴⁵Mapaila matauna ila, ivakouli baloma gaga tuwoli tailima taiyu, kasi gaga ikalisau kala gaga matauna, e isuvisi isigagasi baisa; e tuta kala vigimkovila tau matauna ibani kala gaga ikalisau kala gaga liloubogwa. Makawala goli bikaloubusi baisa yokomi matubowena tubugaga.”

⁴⁶Ililivala baisa tobobawa, e, inala deli budala itotusi okoukweda, magisi mwada Yesu deli bibigatonasi.

⁴⁷E taitala iluki matauna, kawala, “Ka, inam deli budamwa itulotulasi okoukweda magisi mwada deli bukubigatonasi.”[152]

⁴⁸Mitaga Yesu ivitakauloki matauna, kawala, “Availa inagu e availa budagwa?”

⁴⁹E ivakasi la toligalega, ikaibiga, kawala, “Ka, baisaga inagu deli budagwa.

⁵⁰Paila availa bivagi avaka Tamagu wa labuma magila bivagi, matauwena wala bodagu, luguta, e deli inagu.”