Read Kilivila MADIU 15 Bible Online

MADIU 15 - Kilivila bible

MADIU 15

¹Oluvi Parisi toyo toninitalapula paila Karaiwaga imakaiasi Yesu metoyasi Yerusalem, ikaibigasi, kawasi,

²“Avaka paila m toligalega ikoulovaisi kasi gulogula kaidadala valu? Paila gala iwinaisi yumasi[166] tutala ikamkwamsi.”

³E Yesu ivitakauloki matausina, kawala, “Avaka paila yokomi kukoulovaisi la Karaiwaga Yaubada paila kami gulogula?

⁴Paila Yaubada ikaibiga, kawala, ‘Kutemmali tamam inam,’ e, ‘Availa ikaluwou tamala kaina inala, ibodi bikatumataisi matauna.’

⁵Mitaga yokomi kukwaibigasi, kawami, ‘Kidamwa availa biluki tamala kaina inala, kawala, “Avaka mwada basakaim bogwa ladoki Semakavi”[167] -

⁶matauna gala ibodi bitemmali tamala.’[168] Lokutakilaisi avaka la Karaiwaga Yaubada paila kami gulogula.

⁷Mina katudewa gaga yokomi! Mokwita Aisea ivitoubobuta paila yokomi, ikaibiga,

⁸‘Yaubada kawala, Tomota matausina itemmalaigusi kasi udokaiwa wala, mitaga oninasi gala sitana ikamiabaigusi.

⁹Ikamnumonaigusi mitaga gala avaka dimlela baisa, ivitulokisi si karaiwaga tomota wala mwada bivigakaisi uulesi tapwaroru.’”

¹⁰Idou tobobawa bimakaiasi, e iluki matausina, kawala, “Kulagaisi e bukukwatetasi.

¹¹Avaka isuvi wa wodila gala biyogagi nona mitaga avaka isunapula metoya wa wodila, makwaina biyogagi ninasi tomota.”

¹²Oluvi toligalega imaisi ilukwaisi matauna, kawasi, “Ki, kunikoli tutala Parisi ilagaisi biga mabigana, imwau ninasi?”

¹³Ivitakauloki, kawala, “Avaka Tamagu wa labuma gala bivali, bogwa bilulu.

¹⁴Kuligaiwaisi matausina; paila mina kau matausina e mwada bivakadaisi tomota; e kidamwa tokwau bivakadi tokwau, kasitaiyu bikapusisi omlopu.”

¹⁵Mitaga Pita iluki matauna, kawala, “Kulukwaimasi avaka kala bigavisaiki makwaina.”

¹⁶E Yesu iluki matausina, kawala, “Ki, yokomi tuvaila tonagowa wala?

¹⁷Ki, gala kukwatetasi? Avaka bisuvi wa wodila bilokaia wa lula e oluvi bisunapula.

¹⁸Mitaga avaka bisunapula wa wodila, baisa metoya wa nona e biyogagi ninasi tomota.

¹⁹Paila metoyasi wa nona isunapulasi nanamsa gaga, katumata, kailasi, ulatila deli kapugula, veilau, tabinona, silapulu;

²⁰vavagi makwaisina iyogagaisi ninasi tomota, mitaga kidamwa gala biwinaisi yumasi e bikamkwamsi, baisa gala biyogagi nona.”

²¹Yesu isilavi baisa ila mapilasina Taia toyo Saidoni.[169]

²²Natana vivila im Kenani[170] mesisiki baisa ima idou, kawala, “Tomoya yoku Latula Debida;[171] kunokapisaigu. Baloma gaga saina peula isikaila latugu vivila.”

²³Mitaga Yesu gala kwaitala biga iluki minana; e la toligalega imaisi iyokakapisisi baisa matauna, kawasi, “Kuyabi minawena, paila ibokulaidasi idoudou.”

²⁴Mitaga Yesu ivitakauloki, kawala, “Yaubada iwitalaigu baisa mina Isireli wala, banevi sipila itamwausi.”

²⁵Mitaga minana ima ikavagina omatala Yesu, ikaibiga, kawala, “Tomoya, kupilasaigu.”

²⁶E Yesu ivitakauloki, kawala, “Gala ibodi bitakau kʹasi gugwadi e bitalavi baisa kaukwa.”[172]

²⁷Minana ikaibiga, kawala, “Mokwitala baisa Tomoya, mitaga kaukwa bikabubunasi silimku ikapusisi metoya okabala tolikaukwa.”

²⁸E mapaila Yesu ivitakauloki minana, kawala, “Ve! Saina m dubumi kwaiveka; bavigaki baisa yoku makawala nanom.” E latula ibwaina metoya wa tuta matutowena.

²⁹E Yesu isilavi mapilana, iuvayali okawolawala milaveta Galili.[173] E imwena wa koya isili.

³⁰E tobobawa sainela imakaiasi matauna, imaiyaisi topem, togei, tokwau tokutabu, toyo bidubadu tuvaila, isailisi omatala, e Yesu ikatumovi matausina;

³¹mapaila tobobawa itutu uwosi, tutala igisaisi tokutabu ililivalasi, togei ibwabwainasi, topem ililoulasi, tokwau igigisasi; e iyakawolaisi Isireli la Yaubada.

³²E Yesu idou la toligalega bimakaiasi, ikaibiga, kawala, “Anokapisi tobobawa, paila ikalatolusi isikailigusi e gala kʹasi. E gala magigu bawitali matausina deli kasi molu bilosi, kaina bivigaki kasi mitibiliuya wa keda.”

³³E toligalega ivitakaulokaisi matauna, kawasi, “Ammetoya ovilouwokuva bitabanaisi kaula kala bawa bibudoki tobobawa isisuaisi baisa?”

³⁴E Yesu ikatupoi matausina, kawala, “Kwaivila beredi[174] kuyosisi?” E ikaibigasi, kawasi, “Kwailima kwaiyu, toyo sita yena nakikekita.”

³⁵Mapaila Yesu iluki tobobawa bisilaisi opwaipwaia.

³⁶Ikau makwaisina beredi kwailima kwaiyu, toyo yena. Bogwa inokagutoki baisa Yaubada, ikimimisi isaiki toligalega, e toligalega ipataisi baisa tobobawa.

³⁷E komwaidosi ikamsi, ikomatasi; ikatuyoulaisi kasi kobwaga peta lima yuwa ikasewasi.

³⁸Matausina tokwam tauwau iboda tailakatuluwovasi e tuvaila bidubadu vivila toyo gugwadi.

³⁹Itali tobobawa bilosi, e isila wa waga, itapela mapilana Magadana.[175]