Read Kilivila MADIU 2 Bible Online

MADIU 2 - Kilivila bible

MADIU 2

¹Yesu ikaloubusi Bedeliem[9] viluwela Yudia,[10] ola tuta Kini Erodi.[11] E oluvi tokwabitam[12] metoyasi opilibomatu imakaiasi Yerusalem, ikaibigasi, kawasi,

²“Ambaisa matauna eikaloubusi mina Yudia si kini? Paila bogwa kagisaisi kala utuyam leiyuwola obomatu, e lakamaisi mwada bakakavaginasi baisa matauna.”

³Kini Erodi bogwa ilagi ikubukubu lopola deli komwaidosi mina Yerusalem.

⁴E idou isigugulasi tolula kasi tokugwa[13] deli toninitalapula paila Karaiwaga,[14] ikatupoi matausina, kawala, “Ki, ambaisa bikaloubusi Mesaia?”[15]

⁵E ilukwaisi matauna, kawasi, “Mapilana Bedeliem oviluwela Yudia, paila makawala tovitoubobuta leigini, kawala,

⁶‘E, yoku Bedeliem, mapilana Yuda, yoku gala valu kasi kwekekita oluwalaisi vilouvakaveka mapilana Yuda; paila metoya baisa yoku tokwaraiwaga bima biyamati uli tomota Isireli.’”

⁷Erodi ikium idou tokwabitam e ilagi metoya baisa matausina avai tuta utuyam eiyoumatila.

⁸E iwitali matausina bilosi Bedeliem, ikaibiga, kawala, “Kulosi bukunevisi mokwita paila gwadi magudiwena; e avai tuta kubanaisi magudina, bukumiakaigusi biga, e yeigu tuvaila bala bakavagina baisa magudina.”

⁹Matausina bogwa ilagaisi kini la biga e ilosi. Ililoulasi, e ka, igisaisi utuyam, minawena omitibogwa leigisaisi obomatu. E utuyam ikugwai matausina, e itom ikibuboti ambaisa monagwadi ikanukwenu.

¹⁰Imwamwasila ninasi tutala igisaisi utuyam deli si mwasawa sainela.

¹¹E isuvisi wa bwala, igisaisi monagwadi deli Meri inala, e ikavaginasi baisa matauna. Itagaiyaisi kasi kauya, si bobwailila isakaisi baisa magudina; goula, bulami mapula mwau toyo mro.

¹²E Yaubada iluki matausina wa mimi taga bikaimilavausi baisa Erodi; mapaila ivapoisi keda ituwoli ilosi osi valu.

¹³Tokwabitam isilavaisi mapilana, e la anelosi Guyau iyoumatila baisa Yosepa wa mimi, ikaibiga, kawala, “Kutokaia, kulau monagwadi deli inala, e kusakaulasi bukulosi Itipita baisa bukusigagasi igau balukwaim; paila Erodi igau binevi monagwadi mwada bikatumati matauna.”

¹⁴Itokaia, isakawoli monagwadi sola inala wa bogi, e ilokaiasi Itipita,

¹⁵e isigagasi baisa igau bikaliga Erodi; kidamwa avaka Guyau bogwa ilivala metoya ola tovitoubobuta gala bisala, kawala, “Ladou latugu bisilavi Itipita bima.”

¹⁶Erodi igisi tokwabitam eisipulokaisi matauna, e igibuluwa sainela; ikaraiwaga bikatumataisi gugwadi tauwau komwaidosi isisuaisi Bedeliem toyo okatuposulala mapilana kidamwa kasi taitu kwaiyu kaina gala iboda kwaiyu, makawala tuta eilagi metoya baisa matausina tokwabitam.

¹⁷E avaka Yeremaia tovitoubobuta ilivala gala isala, kawala,

¹⁸“Kaigila ilagaisi mapilana Rama,[16] valam, kavivia sainela, Retieli iuvalam paila litula, gala magila visimoli, paila bogwa ikaligasi litula.”

¹⁹Erodi bogwa ikaliga. E mapilana Itipita Yosepa imimi igisi la anelosi Guyau iyoumatila.

²⁰Anelosi ikaibiga, kawala, “Kutokaia kulau monagwadi sola inala, kukwaimilavausi mapilana Isireli; paila matausina mwada bikatumataisi monagwadi bogwa leikaligasi.”

²¹E itokaia ilau monagwadi sola inala, ikaimilavausi mapilana Isireli.

²²Mitaga tutala ilagi Akelosi[17] iguguyoi Yudia kaimapula tamala Erodi, ikukoli bilokaia baisa; Yaubada ivituloki matauna wa mimi, mapaila isaitaula ila Galili,[18]

²³e ila isisu ovalu yagala Nasaredi,[19] e mwada avaka ilivalasi tovitoubobuta gala bisala, kawasi, “Bidokaisi matauna guma Nasaredi.”[20]