Read Kilivila MADIU 20 Bible Online

MADIU 20 - Kilivila bible

MADIU 20

¹“Labuma Karaiwogala makawala baisa. Taitala tolibagula waini bulubuvisiga isalili mwada bikabutu baisa availa bibagulasi ola bagula.

²Ikabutu matausina kidamwa mapusi kwaitala yam kwaitala kina, e iwitali matausina ola bagula.

³Kaukwau ililoula, igisi mimilisi tuvaila itomakavasi obikubaku;

⁴e iluki matausina, kawala, ‘Yokomi tuvaila kulosi ogu bagula, e basakaimi avaka bibodi.’ E ilosi.

⁵Ililoula lalavi toyo eitovila kalasia e ivigivau makawala.

⁶E bogwa bisalili kalasia ililoula tuvaila e ibani mimilisi itomakavasi. E ikatupoi matausina, kawala, ‘Avaka paila kutomakavasi baisa paila yam komwaidona?’

⁷Ilukwaisi matauna, kawasi, ‘Paila gala taitala bikabutaimasi.’ Iluki matausina, kawala, ‘Yokomi tuvaila kulosi ogu bagula.’

⁸“Bogwa idudubali e tolibagula waini iluki la tolibaku, kawala, ‘Kudou tobigubagula kumapu matausina. Kuvitouula kumapu matausina tovabodanim, e kuvigimkulovi baisa matausina ikugwasi.’

⁹E matausina ivitouulasi si paisewa kalasia bogwa bisalili idoubogwi. E tutala imaisi, taitala taitala ikau kwaitala kina.

¹⁰Tutala matausina tolobogwa imaisi, idokaisi bikauwaisi deli kala katumkovila; mitaga taitala taitala matausina tuvaila ikau kwaitala kina.

¹¹E tutala ikauwaisi makawala, ikominimanisi baisa tolibagula ikaibigasi, kawasi,

¹²‘Matausina tovabodanim iwotetilasi gala imomwa; mitaga yakamaisi lakalumkolaisi yam kala koni mwau deli kalasia kala yuviyavi, e lokuvigaki matausina makawala yakamaisi.’

¹³“Mitaga ivitakauloki taitala, kawala, ‘Sogu, gala ayogagaim. Bogwa lakabutaimi paila kwaitala kina, ke?

¹⁴Kukwau kam mapu, e kula; magigu basaiki matausina tovabodanim makawala lasakaim.

¹⁵Kaina kudoki gala ibodaigu banagi ammakawala basaiki ulo mani[204] baisa availa? Kugisi lamitukwaii matausina, e baisa kaina eikau matam ke?’

¹⁶“Mapaila matausina tovabodanim bikugwasi, e tokugwa bivabodasinim.”

¹⁷Yesu ililoula bila Yerusalem. Wa keda ililoulasi ililoulasi, e idouyumali toligalega tailuwotala taiyu. Iluki matausina,

¹⁸kawala, “Ka, bitawaisi Yerusalem. Baisa bikasalaigusi yeigu Latula Tomota baisa tolula kasi tokugwa toyo toninitalapula paila Karaiwaga; e bikaraiwagasi bakaliga;

¹⁹oluvi bikasalaigusi baisa matausina gala mina Yudia[205] kidamwa biyosokanaisi, bilogumtaigusi, bikatukorosaigusi e yam kwaitolula batokaia bamovavau goli.”

²⁰Imakaia matauna Sebedi la kwava toyo litula,[206] e minana ikavagina omatala, inigada bitagwala kwaitala vavagi bwaina baisa minana.

²¹E ikatupoi minana, kawala, “Avaka magim?” Iluki matauna, kawala, “Kukwaraiwaga kidamwa matausina litugwa bisilaisi, taitala om kwakata, taitala om kikiwama,[207] om kwabokwaraiwaga.”

²²Mitaga Yesu ivitakauloki, kawala, “Gala kunikolaisi avaka kuninigadaisi. Ki, kudokaisi gagabila bukumomsi viga mkwelana igau bamom?” Ilukwaisi matauna, kawasi, “Baisa gagabila wala.”

²³Iluki matausina, kawala, “E mokwitala agu viga bukumomsi.[208] Mitaga gala gagabila yeigu banagi availa bisili ogu kwakata deli ogu kikiwama; mitaga availa availa Tamagu bogwa leinagi, bisilaisi wala ambaisa eikatubiasi kabasi.”

²⁴Tutala matausina tailuwotala ilagaisi biga, isegibuluwaisi kasitaiyu.

²⁵Mitaga Yesu idou matausina bimakaiasi, ikaibiga, kawala, “Kunikolaisi kidamwa kasi tokwaraiwaga mina watanawa iguyoiyaisi matausina, deli tuvaila si gweguya ikikaraiwogaisi matausina.

²⁶Mitaga yokomi gala makawala; mitaga availa magila bitomgwaga, matauna budami;

²⁷e availa magila bisisu kami tokugwa, matauwena bitugwali la momova komwaidona paila wotetila.

²⁸Makawala yeigu Latula Tomota lama gala paila tomota biwotitalaigusi, mitaga bawotitali matausina, e batugwalaigu okaliga kaimapusi[209] tomota bidubadu.”

²⁹Bogwa isilavaisi Yeriko,[210] e saina tobobawa ibokulaisi matauna.

³⁰E ka, taiyu tokwau isisuaisi osiusiula keda. Tutala ilagaisi kidamwa Yesu ililoula, ikawotasi, ikaibigasi, kawasi, “Kunokapisaima, yoku Latula Debida.”

³¹E tobobawa ibuyoyaisi matausina, ilukwaisi bikapatusi; mitaga ikawotavausi saina minimani, ikaibigasi, kawasi, “Tomoya, kunokapisaima, yoku Latula Debida.”

³²E Yesu itom idou matausina bimakaiasi, ikaibiga, kawala, “Avaka magimi bavigakaimi?”

³³Ilukwaisi matauna, kawasi, “Tomoya, kidamwa bimitalala mitamaisi.”

³⁴E Yesu inokapisi, ikabikoni mitasi; e wa tuta matutona imitalala mitasi, e ibokulaisi matauna.