Read Kilivila MADIU 21 Bible Online

MADIU 21 - Kilivila bible

MADIU 21

¹Bogwa imaisi katitaikinela Yerusalem. Iviloubusisi Bedipeigi wa Koya Umilela Olibe,[211] e Yesu iwitali taiyu toligalega.

²Iluki matausina, kawala, “Kuviloubusisi valu makwaina omitami, e bogwa bukubanaisi natana ase isikolaisi e nagwadi itoviduli minana. Kutanekwaisi minasina, kumiakaigusi.

³Kidamwa availa bilukwaimi avaka, bukulukwaisi matauna, kawami, ‘Tomoya[212] magila minasina’, e nanakwa bitugwali minasina bukumaiyaisi.”[213]

⁴Baisa ikaloubusi kidamwa avaka tovitoubobuta ilivala gala bisala,

⁵“Kulukwaisi mina Saiyoni, Ka, m Kini eimaima baisa yoku, tomanum, leisila wa ase, e wa ase nagwadi leisila.”

⁶E toligalega ilosi, ivagaisi makawala Yesu iluki matausina.

⁷Imaiyaisi ase deli nagwadi. Isailisi kasi kwama otupwasi minasina, e Yesu isila.

⁸E saina tobobawa iyavaisi kasi kwama wa keda; mimilisi tuvaila iteyasi sisila kai iyavaisi[214] wa keda.

⁹Saina tobobawa omatala matauna deli otuboulola ililoulasi deli Yesu ivatalasi, kawasi, “Osana baisa Latula Debida; Yaubada biyomwasali matauna imaima ikikavitagi yagala Guyau. Osana saina walakaiwa sainela.”

¹⁰E bogwa leiviloubusi Yerusalem, viloumwaidona valu itatatuva uwosi, ikaibigasi, kawasi, “Avai tau matauna?”

¹¹E tobobawa ivitakaulokaisi, kawasi, “Matauwena Yesu tovitoubobuta, tolela Nasaredi mapilana Galili.”

¹²Yesu isuvi Bwala Kwebumaboma, iyobutubutu matausina igigimwalasi[215] wa Bwala Kwebumaboma, ikatukovi si kabosakaila mani matausina tokwatumapu mani[216] deli kabasi matausina igigimwalasi bubuna.

¹³E iluki matausina, kawala, “Buki Pilabumaboma kala ginigini isisu, ‘Yaubada kawala, Ulo bwala bidokaisi bolela nigada.’ Mitaga yokomi kuvigakaisi si kabosisu tolibulebu.”

¹⁴Tokwau toyo topem imakaiasi matauna wa Bwala Kwebumaboma; e ikatumovi matausina.

¹⁵Mitaga tolula kasi tokugwa toyo toninitalapula paila Karaiwaga igibuluwasi tutala igisaisi vavagi siligaga ivagi toyo gugwadi ivatalasi Bwala Kwebumaboma olumoulela, kawasi, “Osana baisa Latula Debida.” Italosisisi,

¹⁶ilukwaisi matauna, kawasi, “Kulagi avaka ilivalasi ke?” Yesu iluki matausina, kawala, “Taga. Ki, gala sitana Buki Pilabumaboma kukwalawasi, ‘Lokuvituloki gugwadi toyo gudinununu biyakawolaimsi.’”

¹⁷E isilavi matausina, iulilavi valu makwaina ila Bedani,[217] ikanawa.

¹⁸Igau eiyam kaukwau Yesu ikaimilavau ovilouveka, e ikamolu.

¹⁹Igisi kaitala seuseu osiusiula keda, ilokaia makaina, mitaga gala avaka ibani baisa mitaga yekwesiwokuva; e iluki makaina, kawala, “Gala tuvaila bukuuwa lagaila yumyambwata.” E nanakwa seuseu imwailela.

²⁰Toligalega igisaisi baisa, itutu uwosi, ikaibigasi, kawasi, “Ammakawala seuseu nanakwa imwailela?”

²¹Yesu ivitakauloki matausina, kawala, “Kululuwaisi baisa! Kidamwa kudubumaisi, e gala kuninayuwasi, gagabila bukuvagaisi makawala avaka lavigaki makaina seuseu; e tuvaila kidamwa bukulukwaisi koya makwaina, ‘Kumoliku kula kukwapusi obolita,’ e bivagi makawala.

²²Kidamwa kudubumaisi bogwa bukubanaisi avaka avaka lokusavalaisi omi ninigada.”

²³Isuvi wa Bwala Kwebumaboma, iuvituloki; e tolula kasi tokugwa deli kaidadala valu imakaiasi matauna, e ikatupoiyaisi, kawasi, “Avai karaiwaga kuvagi vavagi makwaisina? Availa isakaim kwaraiwaga makwaina?”

²⁴Yesu ivitakauloki matausina, kawala, “Yeigu tuvaila bakatupoiyaimi kwaitala katupoi; e kidamwa bukumapwaisi, yeigu tuvaila bakamituli avai karaiwaga avagi makwaisina vavagi.

²⁵Yoni kala karaiwaga paila bapitaiso ammetoya? Metoya baisa Yaubada kaina metoya baisa tomota?” Ititamapusi titoulesi, kawasi, “Kidamwa bitakaibigasi, ‘Metoya baisa Yaubada,’ matauna bilukwaidasi, ‘Avaka paila gala kudubumaisi Yoni?’

²⁶Mitaga kidamwa bitakaibigasi, ‘Metoya baisa tomota’, takukolaisi tobobawa, paila komwaidosi idokaisi Yoni tovitoubobuta.”

²⁷E ivitakaulokaisi Yesu, kawasi, “Gala kanikolaisi.” E iluki matausina, kawala, “Yeigu makawala goli gala balukwaimi avai karaiwaga avagi vavagi makwaisina.

²⁸“Kwatulaimi? Taitala tau litula taiyu; matauna imakaia molitomoya, ikaibiga, kawala, ‘Latugu, kula kubagula obigulela waini lagaila.’

²⁹E ivitakauloki, kawala, ‘Apaiki’; mitaga oluvi ininavila, e ila.

³⁰Imakaia molagwadi, iluki makawala. Ivitakauloki, kawala, ‘Tomoya bala’; mitaga gala ila.

³¹Availaga matausina ivagi nanola tamala?” Ikaibigasi, kawasi, “Matauna molitomoya.” Mapaila Yesu iluki matausina, kawala, “Kululuwaisi baisa - tokougugula pokala toyo tokwalimwala ikugwaiyaimi isubogwasi ola Karaiwaga Yaubada.

³²Paila Yoni imakaiami ivitulokaimi avai keda ibodi mi kaisisu, e gala kudubumaisi matauna; mitaga tokougugula pokala toyo tokwalimwala idubumaisi matauna; e yokomi, kugisaisi baisa, mitaga oluvi gala kuninavilasi, kidamwa bukudubumaisi matauna.

³³“Kulagaisi bigavisaiki[218] tuvaila. Taitala tolibagula ibiguli bigulela waini, ipali kala kali bitavina, ikeli mesila waini kidamwa tomota bipolaisi waini, ikaliai buliyamata; e bagula makwaina ikabutu baisa tobigubagula, e matauna ila ituwoli valu.

³⁴Igau bogwa katitaikina kala kweluva kaiuwala, iwitali la touwata baisa tobigubagula kidamwa bikauwaisi kawailuwa paila kala vilavila.

³⁵E matausina tobigubagula iyosisi la touwata, iwaiyasi taitala, ikatumataisi taiyuwela, e taitolula ikabidikunaisi.

³⁶Tuvaila iwitali touwata ituwoli, kasi bawa ikalisau tolobogwa; e ivigakaisi makawala baisa matausina.

³⁷Oluvi iwitali latula baisa matausina, ikaibiga, kawala, ‘Adoki kaina bitemmalaisi latugu.’

³⁸Mitaga tutala igisaisi latula, tobigubagula ikaibigasi titoulesi, ‘Matauna kaikeyala; kumaisi, takatumataisi matauna, kidamwa bitayoulisi da bagulasi.’

³⁹Iyosisi matauna, ilavaisi otokeda bigulela waini, ikatumataisi matauna.”

⁴⁰E Yesu ikatupoi matausina, kawala, “Mapaila tutala tolibagula bima, avaka bivigaki matausina tobigubagula?”

⁴¹Ivitakaulokaisi matauna, kawasi, “Matausina saina tomitugaga mokwitala bikatumtuwoli e bikabutuvau bagula baisa tomota ituwoli, kidamwa matausina bisakaisi tolibagula kala vilavila kawailuwa okala kweluva.”

⁴²Yesu iluki matausina, kawala, “Gala sitana kukwalawasi wa Buki Pilabumaboma ke? Paila kala ginigini isisu, ‘Dakuna itakilaisi tokwaliai bwala, makwaina ivigaki makawala lipumatala. Baisa ivagi Guyau. Makwaina kabokatubau omatadasi.’

⁴³“Mapaila alukwaimi, Yaubada bikau la Karaiwaga metoya baisa yokomi, e bisaiki tomota ituwoli, availa goli bivitulokaisi bubunela ibodi Yaubada la Karaiwaga, makawala bitagisi kaiuwala bibodi kaitala kai.”[219]

⁴⁵Tutala tolula kasi tokugwa deli Parisi ilagaisi Yesu la bigavisaiki makwaisina, inikolaisi Yesu ilivala paila kasi tabilibili.

⁴⁶Mitaga tutala ikimalalasi mwada biyosisi matauna, ikukolaisi tobobawa, paila idokaisi matauna tovitoubobuta.