Read Kilivila MADIU 24 Bible Online

MADIU 24 - Kilivila bible

MADIU 24

¹Yesu isilavi Bwala Kwebumaboma, ililoula; e la toligalega imakaiasi ikavitusaisi Bwala Kwebumaboma.

²Mitaga ivitakauloki matausina, kawala, “Lokugisaisi vavagi makwaisina komwaidona ke? Kululuwaisi baisa! Igau gala kwaitala makwaisina dakuna bikanukwenu odabala sola, mitaga komwaidona bilisaisi watanawa.”

³Bogwa isili wa Koya Umilela Olibe,[239] toligalega kasimwaleta imakaiasi matauna, kawasi, “Kulukwaimasi ammakawasi kweluva baisa bitokaia? Avai kabutuvatusi paila yoku bukuma, deli paila tovana valu kala vigimkovila?”

⁴E Yesu ivitakauloki matausina, kawala, “Kuyamatasi taga availa bisinapwaimi.

⁵Paila bidubadu bimaisi bikavitagaisi yagagu, bikaibigasi, kawasi, ‘Yeigu Mesaia!’ e bisinapwaisi bidubadu.

⁶Bukulagaisi butula kabilia katitaikina deli bulogala kabilia kaduwonaku, mitaga taga biyowa lupomi; paila ibodi vavagi makwaisina bikaloubusibogwa; mitaga tovana valu kala vigimkovila igau.

⁷Paila bitokaia kabilia; tuwoli tomota bivataisi sola tuwoli tomota, e kabokwaraiwaga bivataisi sola tuwoli kabokwaraiwaga; e bitokaiasi molusaula deli likuliku ambaisa ambaisa.

⁸Metoya komwaidona vavagi makwaisina igigadi bikaloubusi tuta mwau.

⁹“Wa tuta matutowena bikasalaimi ommayuyu bidubadu saina mwau, e bikatumataimi; e komwaidosi tomota ovalu watanawa bikoulovaimi paila uula kubokulaigusi.

¹⁰Oluvi bidubadu bikapusisi, bikasalaisi sesia, bikoulovaisi sesia.

¹¹Tovitoubobuta kaponai bidubadu bisunapulasi e bikiwolaisi bidubadu.

¹²Kowolova karaiwaga bidubadu bisunapulasi, mapaila bidubadu si bobwailila bimamasi.

¹³Mitaga availa bipeuloki tovana valu okala vigimkovila, matauna bimova.

¹⁴E tomota bikamitulaisi Bulogala Bwaina paila Labuma Karaiwogala baisa valu valu komwaidona, mwada komwaidosi mina watanawa bilagaisi. E wa tuta matutona tovana valu kala vigimkovila bima.

¹⁵“Mapaila igau bukugisaisi Makwaina Vavagi Kaboyogwala[240] bipeili la ligisa Yaubada. Daniela tovitoubobuta bogwa leilivala paila makwaina. (E ibodi tokwalawa bikateta.)

¹⁶Wa tuta matutowena ibodi tosisula Yudia bisakaulasi wa koya;

¹⁷matauna isisu obuneyova[241] gala ibodi bikau la guguwa metoya ola bwala;

¹⁸e matauna isisu obuyagu gala ibodi bikaimilavau bikau kala kakapula.

¹⁹Wo! kapisisi minasina nasusuma deli minasina iuvanunusi wa yam makwaisina!

²⁰Bukunigadasi kidamwa gala bukusakaulasi okala kweluva katubugibogi, kaina wa sabate.[242]

²¹Paila wa tuta matutowena mwau sainela bitokaia. E kala mwau gala avaka bipati metoya kala vitouula watanawa e lagaila. E igau tuta bima gala bitokaia makawala baisa.

²²Kidamwa Yaubada gala bikelituli yam kala bawa, gala availa bimova. Mitaga bogwa bikelituli uula mwada bipilasi matausina availa availa bogwa leinagi.

²³“E kidamwa availa bilukwaimi, kawala, ‘Ka, kugisi Mesaia baisa emaima,’ kaina ‘Ka baisa ewaiwa,’ taga bukudubumaisi baisa.

²⁴Paila bitokaiasi Mesaia kaponai toyo tovitoubobuta kaponai, bivagaisi kabutuvatusi kwevakaveka deli kaboyowalula, mwada bisuninaisi matausina availa availa Yaubada einagi goli, kidamwa igagabila.

²⁵Ka, lalukibogwimi.

²⁶“Mapaila kidamwa bilukwaimi, kawasi, ‘Ka, matauna isisu oviloupakala,’ taga bukulokaiasi; e kidamwa bikaibigasi, kawasi, ‘Ka, matauna isisu olopola bwala,’ taga bukudubumaisi makwaina.

²⁷Paila yeigu Latula Tomota bama makawala kavikavila kidamwa bikavila okwaibwaga e bititapi baisa obomatu.

²⁸“Ambaisa tomata bikanukwenu, baisa mluveka[243] bitogugulasi mwada bikamsi.

²⁹“Igau biwokuva tuta mwau matutona, oluvi nanakwa kalasia bidudubila, tubukona gala bilumalama, utuyam bikapusisi metoya wa labuma, e avai peula avai peula isisuaisi wa labuma[244] biyegasi.

³⁰Oluvi kabutuvitusila Latula Tomota biyoumatila wa labuma; e komwaidosi mina watanawa bivalamsi; e bigisaigusi yeigu Latula Tomota bamaima olowalowala labuma deli peula toyo guyugwayu sainela.

³¹Bitagilulu tauya kwaiveka, e bawitali ulo anelosi bilosi ovalu watanawa wokulula kwaivasi, e bikogugulaisi availa availa bogwa lanagi metoyasi ambaisa ambaisa labuma ikalitobu.

³²“Ibodi bukukwatetasi seuseu la vituloki kwaitala. Igau osisila itaginapulasi e yekwesila itamsi, kunikolaisi kala kweluva milamala katitaikina.

³³Makawala goli, tutala yokomi bukugisaisi vavagi makwaisina komwaidona, bukunikolaisi tuta matutona katitaikina, makateki goli bitokaia.[245]

³⁴Kululuwaisi baisa; kami tubwa matubona ola tuta Yaubada bivigimkulovi komwaidona vavagi makwaisina.

³⁵Labuma deli valu watanawa biwokuvasi, mitaga ulo biga gala biwokuva.

³⁶“Mitaga gala availa inikoli paila yam makwaiwena kaina tuta matutona, gala anelosi wa labuma goli, kaina Latula, mitaga Tamagu kalamwaleta goli.

³⁷E yeigu Latula Tomota bama makawala avaka ikaloubusi ola tuta Nowa.

³⁸Paila makawala wa yam makwaisina igau gala bidadoya, ikamkwamsi imomomsi, iveivaisi ipukupakusi, ee! yam makwaiwena Nowa eisila ola waga.

³⁹E gala binikolaisi avaka ikikaloubusi igau tutala leima dadoya, e komwaidosi idoumlabasi; e bikaloubusi makawala tutala yeigu Latula Tomota bama.

⁴⁰Wa tuta matutona, taiyu tauwau obuyagu bibigubagulasi; Yaubada bikau taitala e taitalaga bisim;

⁴¹nayu vivila bitutusi kasi witi bimila pwarawa; Yaubada bikau natana e natalaga bisim.

⁴²“Mapaila kuyuuyausasi; paila gala kunikolaisi avai yam bima mi Guyau.

⁴³Ibodi bukululuwaisi kidamwa tolibwala binikoli avai tuta wa bogi toveilau bima, bogwa biyausa e gala bitagwala bikopwali bwala.

⁴⁴E makawala yokomi, bukuiyamwasisi; paila avai tuta gala kupikwaku - e, yeigu Latula Tomota bama.

⁴⁵“Mapaila avai tolibaku tosalau deli tokabitam? Matauwena kala tokwaraiwaga leivigaki kasi tokugwa la towotetila komwaidosi, mwada bisaiki budala kʹasi okala tuta mokwita.

⁴⁶Bimwasawa touwata matauna kidamwa kala tokwaraiwaga bima e bibani matauna iuvagi makawala.

⁴⁷Kululuwaisi baisa! - bivigaki matauwena tokwaraiwaga paila la guguwa komwaidona.

⁴⁸Mitaga kidamwa matauna touwata gaga goli, bilivala onanola, ‘Bogwa eiyobali agu tokwaraiwaga.’

⁴⁹E bivitouula biwawaiya budala, e bikamkwam bimomom deli matausina imomomsi kabotutu,

⁵⁰e avai tuta gala ipikwaku kala tokwaraiwaga bima wa tuta gala inikoli,

⁵¹e bitapupoi wowola[246] matauna, bibani kala mipuki deli tokwatudewa gaga. Baisa tomota biuvalamsi e bipulummosilasi sainela.