Read Kilivila MADIU 26 Bible Online

MADIU 26 - Kilivila bible

MADIU 26

¹E Yesu bogwa ivinaku biga mabigasina komwaidona, iluki la toligalega,

²kawala, “Kunikolaisi kwaiyu yam bogwa biwokuva, bitokaia Luvapela[253] pakala, e bikasalaigusi yeigu Latula Tomota kidamwa bikatukorosaigusi.”

³E tolula kasi tokugwa toyo kaidadala valu isigugulasi ola buneyova tolula toveka[254] matauna idokaisi Kaiapa;

⁴e ikikeiwalasi gulitinidesi kidamwa bivakiumsi biyosisi Yesu e bikatumataisi.

⁵Mitaga ikaibigasi, kawasi, “Taga otutala paka, kaina tomota bivataisi.”

⁶Yesu isisu Bedani,[255] ola bwala Saimoni tokagwaiguya.[256]

⁷E natana vivila imakaia matauna deli bulami kaisimasimina wa kabisibasi dakuna alabasita,[257] e bulami makaina mapula saina mwau. Minana iligabu bulami okulula Yesu tutala ikamkwam.

⁸La toligalega igisaisi e igibuluwasi ikaibigasi, kawasi, “Avaka dimlela iyomadi makaina?

⁹Kidamwa bulami makaina kaisimasimila bitagimlokaisi mapula kwaiveka e bitasakaisi tonamakava.”

¹⁰Mitaga Yesu inikoli avaka ililivalasi e iluki matausina, kawala, “Avaka paila kuyogililamaisi minawena? Paila bogwa ivagi kwaitala vavagi bwaina sainela baisa yeigu.

¹¹Paila tonamakava isikailimi yumyambwata, mitaga yeigu gala basikailimi yumyambwata.

¹²Iligabu bulami makaina owowogu, mwada bikeputumibogwaigu paila tutala bibakwaigusi.[258]

¹³Kululuwaisi baisa! Ambaisa ambaisa bikamitulaisi Bulogala Bwaina makwaina ovalu komwaidona, avaka minana leivagi bililivalaisi kaikeyala minawena.”

¹⁴E taitala matausina tailuwotala taiyu, matauna idokaisi Yudasa Isikariota, ilokaia tolula kasi tokugwa,

¹⁵ikaibiga, kawala, “Avaka bukusakaigusi, kidamwa bakasali matauna Yesu baisa yokomi?” E imapwaisi baisa matauna kweluwotolu siliba.

¹⁶E metoya wa tuta matutowena inainevi avai tuta bibodi bikasali matauna.

¹⁷E wa yamla kabovitouula Beredi Gala Deli Kala Yisi Pakala,[259] toligalega imakaiasi Yesu, ikaibigasi, kawasi, “Ambaisa magim bakakatubaiasasi paila yoku bukukwam Luvapela Pakala?”

¹⁸E ikaibiga, kawala, “Kuviloubusisi ovilouveka[260] bukubodaisi taitala, e kulukwaisi matauna, kawami, ‘Tovituloki leikaibiga, Ulo tuta ivakatitaikina. Bavagi Luvapela Pakala om bwala deli ulo toligalega.’”

¹⁹E toligalega ivagaisi makawala Yesu la karaiwaga, e ikatubiasaisi Luvapela Pakala.

²⁰Eibogi ikamkwam deli toligalega tailuwotala taiyu.

²¹E tutala ikamkwamsi, ikaibiga, kawala, “Kululuwaisi baisa! Taitala yokomi bikasalaigu.”

²²E toligalega ikaikai ninasi sainela, ivitouulasi ikatupoiyaisi matauna taitala taitala, kawasi, “Ki Tomoya, kaina yeigu?”

²³E Yesu ivitakaula, kawala, “Matauna deli yeigu bogwa kavanumla okagu kaboma,[261] matauwena bikasalaigu.

²⁴Yeigu Latula Tomota bakaliga makawala Buki Pilabumaboma[262] kala ginigini paila titoulegu; mitaga wo! matauna bikasalaigu yeigu Latula Tomota. Ibodi mokwita kidamwa inala gala biuni matauna goli.”

²⁵E Yudasa matauna kala tokwasesila ikawota, kawala, “Ki, Toboma, kaina yeigu?” Yesu iluki matauna, kawala, “Lokukwaibiga makawala.”[263]

²⁶Ikamkwamsi, e Yesu ikau beredi, inokagutoki baisa Yaubada ikimimisi isaiki toligalega, e ikaibiga, kawala, “Kukwauwaisi, kukwamsi, baisa wowogu.”

²⁷E ikau viga, inokagutoki baisa Yaubada e isaiki matausina, e ikaibiga, kawala, “Kumomsi komwaidomi;

²⁸paila baisa buyavigu, Yaubada la kabutu[264] ikikamokwita,[265] ibubusi paila tobobawa, paila mitugaga kala ligaiwa.

²⁹Alukwaimi, gala tuvaila bamom kaiuwala waini makaina igau yam makwaiwena wainivau bitamomsi deli yokomi ola Karaiwaga Tamagu.”

³⁰Bogwa iwosisi pilatala wosi,[266] isunapulasi ilokaiasi Koya Umilela Olibe.

³¹E Yesu iluki matausina, kawala, “Bogi makwaiwena yokomi komwaidomi bukukwapusisi paila uula yeigu; paila Buki Pilabumaboma kala ginigini isisu, ‘Yaubada biwaiya kasi toyamata sipi, e sipi yuwomwaidona bibutusi.

³²Mitaga tutala batokaia bamovavau balobogwa Galili igau bukuwaisi.”

³³Pita iluki matauna, kawala, “Ilagoli komwaidosi bikapusisi paila uula yoku, yeigula gala kwaitala tuta bakapusi.”

³⁴Yesu iluki matauna, kawala, “Kululuwai baisa! Wa bogi makwaiwena goli, igau gala bisola rekorekwa yoku bukusivatolu bukuyakalaigu.”

³⁵Pita iluki matauna, kawala, “Ilagoli bakaliga goli deli yoku, yeigu gala bayakalaim, gala.” E toligalega komwaidosi ilivalasi makawala.

³⁶E Yesu deli matausina ilosi mapilana baleku idokaisi Getisemani;[267] e iluki la toligalega, kawala, “Kusilaisi baisa bala anigada baisa ewaiwa.”

³⁷Ilau Pita toyo Sebedi litula taiyu, ivitouula ikiuta nanola e ikaikai wowola.

³⁸E iluki matausina, kawala, “Ulo baloma ikaikai sainela makawala bogwa bakaliga. Kusimwaisi baisa, kuyuuyausasi deli yeigu.”

³⁹Itowada ikavagina e migila itobu opwaipwaia; e inigada, kawala, “Tamagu, kidamwa gagabila bukukwau makwelana viga metoya omatagu; taga gala bavagi makawala avaka magigu, mitaga bavagi makawala avaka magim.”

⁴⁰E imakaia toligalega, ibani matausina immasisisi, e iluki Pita deli sala, kawala, “Ammakawami, gala igagabila bukuyuuyausasi deli yeigu bimomwa?

⁴¹Kuyuuyausasi, kunigadasi taga bukubodasi tamnabi. Mokwita nona magila mitaga woula imama.”

⁴²E siviyuwela ila inigada, kawala, “Tamagu, kidamwa gala igagabila bukukwau makwelana mitaga ibodi bamom wala, desi wala. Nanom bavagi.”

⁴³E ikaimilavau ibani matausina immasisisi paila saina nunupula mitasi.

⁴⁴E isilavivau matausina ila inigada sivitolula ikaibigivau biga makawala.

⁴⁵E ikaimilavau baisa toligalega, iluki matausina, kawala, “Ammakawami? Kummasisisi, kuuvaiwasisi?[268] Ka, tuta bogwa leima, e bogwa bikasalaigu yeigu Latula Tomota oyumasi tomitugaga.

⁴⁶Kutokaiasi bitamwaisi. Ka, agu tokwasesila bogwa leima.”

⁴⁷Ililivala, e Yudasa, taitala matausina tailuwotala taiyu, leima deli saina tobobawa eiyosisi puluta toyo lewa; leimaisi metoyasi baisa tolula kasi tokugwa toyo kaidadala valu.

⁴⁸E tokwasesila leisaiki kabutuvatusi kwaitala baisa matausina, eikaibiga, kawala, “Availa baviyuwoli,[269] matauwena goli magimi; bukuyosisi.”

⁴⁹E nanakwa ima otalila Yesu, ikaibiga, kawala, “Toboma, kagutoki,” e iviyuwoli matauna.

⁵⁰Yesu iluki matauna, kawala, “Sogu, avaka mwada bukuvagi, nani kuvagi!”[270] E matausina imaisi, ikiulaisi Yesu, iyosisi.

⁵¹E ka! taitala matausina isikaili Yesu iyosi la puluta ibiigili, e iwaiya la towotetila tolula toveka, ikapituni taigala.

⁵²E Yesu iluki matauna, kawala, “Kusewoya m puluta okauyala; paila availa availa ikikauwaisi puluta igau bikaligasi metoya opuluta.

⁵³Ki kudokaisi gala gagabila banigadi Tamagu, e matauna nanakwa biwitali baisa yeigu anelosi kasi boda kala bawa bikalisau yuwoluwotala yuwoyu.

⁵⁴Mitaga kidamwa bavagi makawala, ammakawala Buki Pilabumaboma bogwa bisala; paila buki mapilana kala ginigini ivituloki kidamwa vavagi baisa bikaloubusi.”

⁵⁵Oluvi Yesu iluki tobobawa, kawala, “Lokumaisi bukuyosaigusi deli puluta toyo lewa makawala baisa tolibulebu ke? Yumyambwata asisu wa Bwala Kwebumaboma, avivituloki, mitaga gala kuyosaigusi.

⁵⁶Mitaga vavagi baisa komwaidona ikaloubusi kidamwa tovitoubobuta si ginigini wa Buki Pilabumaboma gala bisala.” E toligalega komwaidosi iulilavaisi matauna, isakaulasi.

⁵⁷E matausina leiyosisi Yesu ivakoulisi matauna iuyokaisi Kaiapa, matauna tolula toveka. E toninitalapula paila Karaiwaga deli kaidadala valu bogwa leisisigugulasi baisa.

⁵⁸Mitaga Pita ililoula oluvi iyeikuli matauna mapilana okoukweda la bwala tolula toveka; e isuvi isiwalai deli toyausa mwada bigisi kala vigimkovila.

⁵⁹E tolula kasi tokugwa, deli togugula komwaidosi[271] inainevisi tabinona[272] paila Yesu, kidamwa bikatumataisi matauna.

⁶⁰E bidubadu totabinona imaisi, mitaga gala ibanaisi sitana. Oluvi imaisi taiyu totabinona,

⁶¹ikaibigasi, kawasi, “Matauwena tau ikaibiga, kawala, ‘Igagabila bakodidaimi Yaubada la Bwala Kwebumaboma, e yam kwaitolu wala bakaliivau.’”

⁶²E tolula toveka itomalaula omitasi ikaibiga, kawala, “Ki, gala sitana kuvivitakauloki? Ammakawala baisa eikamitulaimsi?”

⁶³Mitaga Yesu ikapatu. E tolula toveka iluki matauna, kawala, “Omatala Yaubada Tosigaga akaraiwogaim - kulukwaimasi kidamwa yoku Mesaia, Yaubada Latula.”

⁶⁴Yesu iluki matauna, kawala, “Yokula lokukwaibiga.[273] Mitaga alukwaimi, igau bukugisaigusi yeigu Latula Tomota asili ola kakata Topeuligaga deli amaima olowalowala labuma.”

⁶⁵E tolula toveka ikisi kala kakapula,[274] ikaibiga, kawala, “Bogwa ibigigagi Yaubada! Avaka dimlela tanainevisi tokamatula? Bogwa kulagaisi ibigigagi Yaubada.

⁶⁶Avaka kudokaisi?” Ikawotasi, kawasi, “Ibodi kala kamwaga bikaliga.”

⁶⁷E igiusailisi omigila, inobutuwaisi matauna, e mimilisi ikipitataisi yumasi iwawaiyasi,

⁶⁸ikaibigasi, kawasi, “Mwa Mesaia! Kuvitoubobuta baisa yakamaisi, availa leiwaim?”

⁶⁹Pita isili okoukweda, e natana nawotetila imakaia matauna, kawala, “Yoku tuvaila kusikaili matauna Yesu guma Galili.”[275]

⁷⁰Mitaga iyakala omitasi komwaidosi, kawala, “Gala anikoli avaka kulilivala.”

⁷¹Tutala isunapula ila omatala kabosusuvi, nawotetila nayuwela igisi matauna, e iluki matausina itotusi otalila matauna, kawala, “Tau matauna isikaili Yesu guma Nasaredi.”

⁷²E tuvaila Pita iyakala deli ikaibiga, kawala, “Omatala Yaubada, gala anikoli tau matauna.”

⁷³Igau gala imomwa matausina itotusi otalila imaisi ilukwaisi Pita, kawasi, “Mokwitala yoku tuvaila taitala matausina; paila bonam ikamitulaim.”[276]

⁷⁴E Pita ilivala biga katotila mwau, kawala, “Omatala Yaubada, gala sitana anikoli tau matauna.” E wa tuta matutona goli rekorekwa igela,

⁷⁵e Pita iluluwai avaka Yesu eilivala, kawala, “Igau gala bisola rekorekwa bukusivatolu bukuyakalaigu.” E isunapula, ivalam ivilumgaga.