Read Kilivila MADIU 27 Bible Online

MADIU 27 - Kilivila bible

MADIU 27

¹Obulubuvisiga komwaidosi tolula kasi tokugwa deli kaidadala valu ikikeiwalasi gulitinidesi mwada bikatumataisi Yesu.

²E iyuwolaisi Yesu, ivakoulisi e iuyokaisi tokwaraiwaga Pailato.[277]

³Tutala tokwasesila Yudasa igisi bogwa ikamogaisi matauna, ininavila, ikaimili siliba kweluwotolu baisa tolula kasi tokugwa deli kaidadala valu,

⁴ikaibiga, kawala, “Lamitugaga paila lakasali tobwaila bikaliga.” Ikaibigasi, kawasi, “O, desi wala. Baisa yoku wala kam pakula.”

⁵Yudasa ilavi siliba wa Bwala Kwebumaboma e isilavi matausina ila. E imwena wa kai ibuligigi kaiyola, ilou ikasinekukwa.

⁶Mitaga tolula kasi tokugwa ikauwaisi siliba, ikaibigasi, “Baisa mapula buyavi, e gala ibodi Mosese la Karaiwaga[278] kidamwa bitasailisi okabosakaila semakavi.”

⁷Ininanamsasi e ikauwaisi siliba igimlokaisi kwabila yagala Tobubula Kulia mwada makubilana bivigakaisi togilagala kasi laka.

⁸E mauula tuta baisa idouvilaisi makubilana Kubilela Buyavi.

⁹E avaka Yeremaia tovitoubobuta ilivala[279] gala isala, ikaibiga, kawala, “Mimilisi mina Isireli mwada bimapwaisi taitala tau, e mapula matauna siliba kweluwotolu. Mapaila ikauwaisi makwaisina,

¹⁰igimolaisi kwabila yagala Tobubula Kulia, makawala Guyau ikaraiwogaigu.”

¹¹E Yesu itotu omatala tokwaraiwaga, e tokwaraiwaga ikatupoi matauna, kawala, “Ki, yoku si giyouveka mina Yudia?” Yesu iluki matauna, kawala, “Yokula lokukwaibiga.”[280]

¹²Mitaga tutala tolula kasi tokugwa deli kaidadala valu itabinakaisi matauna, gala imapu kwaitala biga.

¹³Mapaila Pailato iluki matauna, kawala, “Ki, gala lokulagi kwaivila vavagi ikamitulaimsi?”

¹⁴Mitaga Yesu gala ivitakauloki matausina, e gala kwaitala kamatula imapu; mapaila tokwaraiwaga saina itutu wowola.

¹⁵Tokwaraiwaga la bubunela otutala Luvapela[281] Pakala bitaneku baisa tobobawa avai tomipuki magisi.

¹⁶E wa tuta matutowena isisu taitala tomipuki la sula kwaiveka, yagala Baraba.

¹⁷Mapaila tutala isigugulasi, Pailato iluki matausina, kawala, “Availa magimi bataneku omitami? Kaina Baraba kaina Yesu idokaisi Keriso?”[282]

¹⁸Paila inikoli ikasalaisi matauna uula si pogi.

¹⁹E tuvaila, tutala Pailato isili okaboyakala, la kwava iwitali biga baisa matauna, ikaibiga, kawala, “Taga bukuvagi avaka baisa tomitukwaibwaila matauna; paila saina mmayuyu lalumkoli lagaila paila matauna wa mimi.”

²⁰Tolula kasi tokugwa deli kaidadala valu itainonaisi tobobawa, kidamwa binigadasi bitaneku Baraba, e bikatumataisi Yesu.

²¹E tuvaila tokwaraiwaga iluki matausina, kawala, “Kasitaiyu matausina availa magimi bataneku omitami?” Ikaibigasi, kawasi, “Baraba.”

²²E Pailato iluki matausina, kawala, “Avaka bavigaki Yesu idokaisi Keriso?” Komwaidosi matausina ikaibigasi, kawasi, “Kukwatukorosi matauna.”

²³Mitaga Pailato ikatupoi, kawala, “Avaka dimlela? Avai mitugaga leivagi?” Mitaga saina minimani idouwaisi, kawasi, “Kukwatukorosi matauna.”

²⁴Pailato igisi gala ikalisau matausina, mitaga saina ikaninisisi. Mapaila ikau sopi, iwini yamala[283] omitasi tobobawa, ikaibiga, kawala, “Gala agu pakula la kaliga matauna;[284] yokomi wala kami pakula.”

²⁵E tomota komwaidosi ivitakaulokaisi, kawasi, “Desi wala! kama pakulasi la kaliga e litumaiasi kasi pakula.”

²⁶E itaneku Baraba baisa matausina; ikaraiwaga iwawaiyasi Yesu, oluvi ikasali kidamwa bikatukorosaisi matauna.

²⁷Tokwaraiwaga la tokwabilia ilauwaisi Yesu ola bwala tokwaraiwaga, ikatuyoulisi tokwabilia kasi boda omatala.

²⁸Ivililaisi kala kwama e ivisikomaisi kakapula yabweyani.[285]

²⁹Ivilaisi doula kala butia isailisi okulula, e kai oyamala kakata. Itapopula kwetutusi, ikavisakaisi omatala, igugovaisi, kawasi, “Wo! si giyouveka mina Yudia.”

³⁰Igiusailisi matauna, e iyosisi kai ilopetaisi pwanetala.

³¹E bogwa ikatudeuwaisi matauna, ivililaisi miyana kakapula e ivisikomaisi kala kwama; e ivakoulisi ivisunupuloiyaisi kidamwa bikatukorosaisi matauna.

³²Isusunapulasi, ibanaisi taitala guma Sairini[286] yagala Saimoni; e iyosisi ikaraiwagasi bikeula Yesu la korosi.[287]

³³E bogwa iviloubusisi mapilana baleku idokaisi Goligota (e kidamwa takatumikaisi, baisa Viluwela Pwaneta[288]),

³⁴itagulikaisi waini deli kalula[289] mwada bipilasaisi kala mmayuyu. E tutala bogwa imomkoli sitana, ipaiki gala magila bimom.

³⁵Ikatukorosaisi matauna; e ivilaisi kala kwama ikowobobutasi availa bikau avaka.[290]

³⁶Oluvi isilaisi iyamataisi matauna.

³⁷Isailisi walakaiwa odabala kala tabinona, kawala, “Matauna Yesu si Giyouveka mina Yudia.”

³⁸E ikatukorosaisi deli matauna taiyu tolibulebu,[291] taitala ola kakata, taitala ola kikiwama.

³⁹Matausina ililoulasi ititageunasi ibigigagaisi matauna,

⁴⁰e ikaibigasi, kawasi, “Ki, yoku bukukodidaimi Bwala Kwebumaboma e yam kwaitolu bukukwaliai? Kukwatumovaim titoulem; kidamwa yoku Yaubada Latula kubusi metoya wa korosi.”

⁴¹Makawala goli tolula kasi tokugwa deli toninitalapula paila Karaiwaga deli kaidadala valu ikatudeuwaisi matauna, kawasi,

⁴²“Eikatumovi tomota ituwoli mitaga gala gagabila bikatumovi titoulela. Ki, matauna ma giyouvekasi yakamaisi mina Isireli? Kidamwa tuta matutona bibusi titoulela metoya wa korosi bitadubumaisi matauna.

⁴³Leidubumi Yaubada; ibodi tuta baisa Yaubada bikoli, kidamwa magila matauna; paila leikaibigi, kawala, ‘Yeigu Yaubada Latula.’”

⁴⁴E matausina tolibulebu goli leikatukorosaisi deli matauna ilulukwaisi matauna makawala.

⁴⁵Bogwa itowota kalasia e valu komwaidona idudubila igau ila itobala kalasia.

⁴⁶E bogwa itobala kalasia, Yesu kaigala kaigaveka idou obonasi mina Iberu, kawala, “Eli, Eli, lema sabakitani?”[292] E baisa, “Ulo Yaubada, ulo Yaubada, avaka dimlela lokusilavaigu?”

⁴⁷Mimilisi matausina itotusi baisa, ilagaisi e ikaibigasi, kawasi, “Matauna idoudou baisa Ilaitia.”[293]

⁴⁸E nanakwa taitala isakaula, ikau toutou, ividagu deli waini pwayuyu, e ibabi wa kai mwada bivimom.

⁴⁹Mitaga komwaidosi ikaibigasi, kawasi, “Desi, iga bitagisaisi kaina Ilaitia bima bikoli matauna.”[294]

⁵⁰E Yesu iwaiweya e itugwali la baloma ikaliga.

⁵¹E ka, Bwala Kwebumaboma kala taboda karekwa[295] itavisiki yayu metoya walakaiwa e watanawa. E pwaipwaia ilikuliku, dakuna itavisisi.

⁵²Laka tuvaila ikapogegasi, e bidubadu totapwaroru tokwaligabogwa itokaiasi imovavausi.

⁵³E isunapulasi metoya okasi laka. E igau Yesu itokaia imovavau, matausina tokwaligabogwa iviloubusisi Valu Kwebumaboma,[296] e iyoulapulasi baisa bidubadu.

⁵⁴Tutala kumatoula deli matausina iyamataisi Yesu igisaisi likuliku toyo avaka ikaloubusi, immakiusasi sainela, e ikaibigasi, kawasi, “Mokwitala matauna Yaubada Latula.”

⁵⁵E bidubadu vivila tuvaila itotusi kaduwonaku igigisaisi, minasina bogwa leibokulaisi Yesu metoyasi mapilana Galili, leiwotitalaisi matauna.

⁵⁶Mimilisi minasina igasi Meri Magidalini[297] sola Meri inasi Yemesa deli Yosepa, toyo inasi Sebedi litula.

⁵⁷Isisu taitala tau saina bidubadu la guguwa. Matauna guma Alimatia[298] e yagala Yosepa, e itoligalega baisa Yesu goli. Eikoyavi,[299]

⁵⁸e matauna ilokaia Pailato, inigadi wowola Yesu. E Pailato ikaraiwaga bisakaisi matauna.

⁵⁹Yosepa ikau wowola, ikapoliki omwaikapula yamigileu yapupwakau,

⁶⁰ibaku ola laka titoulela; makwaina kwaivau e leikeli metoya odakuna;[300] e ilopipili kwaitala dakuna kwaiveka owodola laka, e isilavi baisa.

⁶¹Meri Magidalini[301] sola Meri ituwoli[302] isisuaisi baisa isilaisi owodola laka.

⁶²Tutala bogwa leiwokuva Yamla Katubaiasa, e eiyam tolula kasi tokugwa toyo Parisi isigugulasi omatala Pailato,

⁶³e ikaibigasi, kawasi, “Tomoya! Kaluluwaisi tutala matauwena tosasopa isisu tomomova ikaibiga, kawala, ‘Yam kwaitolula batokaia bamovavau.’

⁶⁴Mapaila bukukwaraiwaga biyamataisi mokwita laka, igau yam kwaitolula; kaina la toligalega bilosi biveilauwaisi matauna, e bilivalasi baisa tomota, kawasi, ‘Bogwa leitokaia imovavau.’ E sopa makwaina ivabodanim bikalisau makwaina ikugwa.”[303]

⁶⁵Pailato iluki matausina, kawala, “Kukwauwaisi[304] mi toyausa; bogwa kukwatetasi yausa. Kulosi kuyausasi laka bibwaina.”

⁶⁶Mapaila ilosi, e ivigakaisi laka bibwaina; itakaibasaisi dakuna makwaina, e ikaraiwogaisi toyausa biyausasi.