Read Kilivila MADIU 3 Bible Online

MADIU 3 - Kilivila bible

MADIU 3

¹Tuta baisa[21] Yoni Tobapitaisi ima Yudia oviloupakala,[22] ikikamituli,

²kawala, “Kuninavilasi, paila Labuma Karaiwogala[23] bogwa ivakatitaikina.”

³Aisea tovitoubobuta eilivala paila matauna Yoni, kawala, “Taitala idoudou oviloupakala, ‘Kukwatubiasaisi la keda Guyau, kukiduwosisiaisi la keda.’”

⁴Yoni isikam kala kakapula iwoliki unuunula kameli, palitula[24] yatala kanuvinela bulumakau; e kʹala, kilili toyo kitorina.

⁵Mina Yerusalem toyo mapilana Yudia komwaidona, toyo viluwela Yoridani komwaidona ilokaiasi matauna;

⁶ikamitulaisi si mitugaga, e Yoni ibapitaisi matausina wa Waya Yoridani.

⁷Tutala igisi bidubadu Parisi toyo Sadusi[25] imaisi paila bapitaiso, iluki matausina, kawala, “Tubula mitugaga yokomi, availa ilukwaimi bukusakaulasi metoya omi sula mapula igau Yaubada biwitali?

⁸Kuvagaisi avaka bivituloki mi ninavila.

⁹Taga kuvitokaimi oninami, ‘Matauna Eberaam tabudasi.’ Paila alukwaimi, gagabila Yaubada bikau dakuna makwaisina bivigaki tubula Eberaam.

¹⁰Baisa tuta kema eikatubiasaisi mwada biteyasi kai ouula. Mapaila avai kai gala biuwa kaiuwala bwaina biteyasi bilavaisi bila wa kova.

¹¹“Yeigu abapitaisaimi metoya wa sopi bivituloki mi ninavila, mitaga matauna iyeikulaigu imaima, matauna bibapitaisaimi metoya baisa Baloma Tobumaboma deli kova. Matauwena ikalisauwaigu, katubukolela kaikela gala ikwanaigu bakeula.[26]

¹²Iyosi la kabokila oyamala bikatukili witi[27] kalagila deli kanuvinela. La witi bikedidagi ola bwaima, mitaga kanuvinela bigabu wa kova gala bimata.”

¹³Wa tuta matutona Yesu isilavi Galili imakaia Waya Yoridani mwada Yoni bibapitaisi matauna.

¹⁴Mitaga Yoni mwada bisilibodi matauna, kawala, “Ibodaigu bukubapitaisaigu, taga yoku kumakaiagu ke?”

¹⁵Yesu ivitakauloki matauna, kawala, “Kutagwala tuta baisa, ibodaida bitavagi komwaidona avaka Yaubada magila.” E Yoni itagwala.

¹⁶Yesu bogwa ibapitaiso, e nanakwa ivalaguva metoya wa sopi, e ka, labuma ikivi, igisi Bilomala Yaubada italakapusi makawala bubuna itoula baisa matauna.

¹⁷E, kaigila metoya wa labuma, kawala, “Matauna Latugu Tombwailigu, saina iyomwasalaigu.”