Read Kilivila MADIU 4 Bible Online

MADIU 4 - Kilivila bible

MADIU 4

¹Wa tuta matutowena Baloma Tobumaboma iviyelu nanola Yesu e ivakouli ilau oviloupakala kidamwa Diabolo[28] bitamnabi matauna.

²E bogwa yam kweluwovasi deli bogi kweluwovasi ipusoposuma, oluvi Yesu ikamolu.

³E totamnabi imakaia iluki matauna, kawala, “Kidamwa yoku Latula Yaubada, kukwaraiwaga dakuna makwaisina bimila kaulasi.”

⁴Mitaga Yesu ivitakaula, kawala, “Buki Pilabumaboma kala ginigini isisu, ‘Gala kaula wala bimovasi tomota mitaga biga komwaidona avaka bilivala Yaubada.’”

⁵E Diabolo ilau Yesu ilosi Yerusalem, baisa Valu Kwebumaboma, isaili matauna odabala Bwala Kwebumaboma,

⁶iluki matauna, kawala, “Kidamwa yoku Latula Yaubada, kukokuwa, paila Buki Pilabumaboma kala ginigini isisu, ‘Bikaraiwogi la anelosi paila yoku, oyumasi bikauwaimsi, taga biwaiya kaikem dakuna.’”

⁷Yesu iluki matauna, kawala, “Tuvaila Buki Pilabumaboma kala ginigini isisu, ‘Taga bukuwakoli Guyau m Yaubada.’”

⁸Tuvaila Diabolo ilau matauna wa koya saina kwaiveka e ikavitusi baisa matauna valu watanawa kala kabokwaraiwaga komwaidona toyo kasi katububula;

⁹e iluki matauna, kawala, “Vavagi makwaisina komwaidona basakaim, kidamwa bukukwavagina bukutemmalaigu.”

¹⁰E Yesu iluki matauna, kawala, “Setani kula, paila Buki Pilabumaboma kala ginigini isisu, ‘Bukutemmali Guyau m Yaubada e matauna kalamwaleta bukuwotitali.’”

¹¹Oluvi Diabolo isilavi matauna, e anelosi imakaiasi ipilasaisi matauna.

¹²Tutala ilagi Yoni leikatupipaisi,[29] Yesu ikaimilavau mapilana Galili;

¹³igala metoya Nasaredi imakaia mapilana olumata milaveta Galili yagala Kapaneum, itotu oluwalaisi mapilasina valu Sebuloni toyo valu Napitalai;[30]

¹⁴kidamwa la biga Aisea tovitoubobuta gala bisala, kawala,

¹⁵“Valu Sebuloni toyo valu Napitalai, okedala lumata, Yoridani mapilana ewaiwa, Galili si valu matausina gala mina Yudia.

¹⁶Tomota isikailisi odudubila, lumalama sainela leigisaisi. Lumalama iyuwoula baisa matausina isikailisi oviluwela kaliga saina dudubila.”

¹⁷Tuta matutona Yesu ivitouula ikamituli, kawala, “Kuninavilasi, paila Labuma Karaiwogala[31] bogwa ivakatitaikina.”[32]

¹⁸Iuvayali okawolawala milaveta Galili,[33] igisi matausina kasitaiyu topoula, Saimoni idokaisi Pita sola bodala Anideru, ipwapoulasi obolita.

¹⁹E iluki matausina, kawala, “Kubokulaigusi, bavigakaimi kasi topoula tomota.”

²⁰E nanakwa isilavaisi si wota, ibokulaisi matauna.

²¹Itowada tuvaila, igisi ituwoli kasitaiyu Sebedi litula, Yemesa sola bodala Yoni, isisuaisi wa waga toyo tumasi Sebedi, iyayaimasi si wota.[34] E idou matausina bibokulaisi.

²²E nanakwa isilavaisi si waga toyo tumasi, e ibokulaisi matauna.

²³E, Yesu ititavina Galili komwaidona, iuvituloki[35] osi bwala tapwaroru, ikikamituli Bulogala Bwaina paila Labuma Karaiwogala, ikatumovi tomota komwaidona kasi lelia toyo kasi katoula.

²⁴E bulogala ikaligiaki Siria komwaidona;[36] imiakaisi matauna tokwatoula komwaidona, kasi lelia tuwoli, kasi mmayuyu tuwoli, matausina isikailasi baloma gaga,[37] matausina tobulomata, toyo matausina totatuva; e Yesu ikatumovi matausina.

²⁵Saina tobobawa ibokulaisi matauna metoyasi mapilasina Galili, Valu Kweluwotala,[38] Yerusalem, Yudia,[39] toyo Yoridani mapilana ewaiwa.[40]