Read Kilivila MADIU 5 Bible Online

MADIU 5 - Kilivila bible

MADIU 5

¹Tutala Yesu igisi tobobawa, imwena wa koya, isili,[41] e la toligalega imakaiasi matauna.

²Ivitouula, ivituloki matausina toligalega makawala baisa. Ikaibiga.

³“Yokomi kunamakavasi paila uula mi tapwaroru bukumwasawasi, paila Labuma Karaiwogala[42] baisa mi vavagi[43] goli.

⁴Yokomi kuuvalamsi bukumwasawasi, paila Yaubada bivisimolaimi.

⁵Yokomi kummanumsi bukumwasawasi, paila bukusibwabwailasi ovalu watanawa.

⁶Yokomi ikau ninami bubunela duwosisia[44] bukumwasawasi, paila bukubanaisi bubunela makwaina goli.

⁷Yokomi kunokapisaisi semia bukumwasawasi, paila Yaubada binokapisaimi.

⁸Yokomi imigileu ninami bukumwasawasi, paila bukugisaisi Yaubada.

⁹Yokomi kubuyoyusi vatai bukumwasawasi, paila Yaubada bidokaimi litula.

¹⁰Yokomi leiyogagaimi tomota paila uula mi mitukwaibwaila bukumwasawasi, paila Labuma Karaiwogala baisa mi vavagi[45] goli.

¹¹“Yokomi bukumwasawasi kidamwa tomota bibigigagaimi biyogagaimi e bitabinakaimi[46] komwaidona vavagi gaga tuwoli tuwoli, paila uula yeigu.

¹²Saina mwamwasila ninami bukumwasawasi, paila kami mapu kwaiveka wa labuma, paila baisa makawala tomota iyogagaisi matausina tovitoubobuta[47] omitibogwa.

¹³“Yokomi makawala yonala valu watanawa; mitaga kidamwa yona kakamwenala bitamwau, ammakawala bitavigaki biwaki makwaina? Gala dimlela vavagi makwaina, mitaga biligaiwaisi tomota, okaikesi bivapupoiyaisi.

¹⁴“Yokomi makawala lumalamela valu watanawa. Kidamwa valu itotu odabala koya gala gagabila bitopepuni.

¹⁵Kidamwa tomota ivakanotaisi kaitapa[48] gala bikatubukolaisi wa peta, mitaga isailisi ola kabototu e itapi baisa komwaidosi isisuaisi wa bwala.[49]

¹⁶Makawala yokomi lumalamemi bititapi omitasi tomota, kidamwa mi mitakwai bigisaisi e bikavisaisi Tamami wa labuma.

¹⁷“Taga kudokaisi yeigu lama bakatudidaimi Mosese la Karaiwaga[50] toyo tovitoubobuta si vituloki;[51] gala lama paila bakatudidaimi, mitaga kidamwa bavitububoti uulotoula.

¹⁸Kululuwaisi baisa, kaina labuma deli watanawa bitamwausi, mitaga gala kwaitala ginigini pikekita kaina tunutunu metoya ola Karaiwaga Mosese biwokuva; e igau goli kala vigimkovila vavagi komwaidona.[52]

¹⁹Mapaila availa ikoulovi kaina kwaitala metoya karaiwaga makwaisina kasi kwekekita deli iuvituloki tomota makawala, bitadoki matauna Labuma Karaiwogala kasi tokekita; mitaga availa ikabikaula karaiwaga makwaisina deli iuvituloki makawala, bitadoki matauna tovekala Labuma Karaiwogala.

²⁰Paila alukwaimi gagabila bukusuvisi Labuma Karaiwogala, kidamwa wala mi mitukwaibwaila bikalisuwoli si mitukwaibwaila toninitalapula paila Karaiwaga toyo Parisi.

²¹“Bogwa kulagaisi ilukwaisi matausina tobubogwa, kawasi, ‘Taga kukwatumata; e availa bikatumata, ibodi matauna biboda kala yakala.’

²²Mitaga yeigu alukwaimi, availa bigibuluwi bodala,[53] ibodi matauna biboda kala yakala; e availa biluki bodala,[54] kawala, ‘Yoku gala dimlem’, ibodi matauna bisuvi kaboyakala kwaiveka;[55] e availa biluki, kawala, ‘Tonagowa yoku!’ ibodi matauna bibani kovala Eli.

²³Mapaila kidamwa makateki bukusemakavi baisa Yaubada wa kabolula, e kululuwai bodam eileilim,

²⁴kusaim m semakavi omatala kabolula, e kula, ikugwa bukukwabilula baisa bodam oluviga bukuma, bukusemakavi.

²⁵“Kidamwa availa magila biyakalaim, e deli kuliloulasi bukulosi okaboyakala, kunanakwa bukuveyawasi kamitaiyu kam totabinona. Kaina totabinona bikasalaim baisa toyakala, e toyakala bikasalaim baisa tokwatupipi, e bikovisuyaim wa bwala katupipi.

²⁶Kululuwai baisa, gala wala bukusaga, mitaga bukumipubogwi m mapu komwaidona.

²⁷“Bogwa kulagaisi ikaibigasi, kawasi, ‘Taga kukwailasi.’

²⁸Mitaga yeigu alukwaimi, availa bimitakavata mwada bimisii vivila, bogwa onanola isakauloki bikikailasisi deli minana.

²⁹E kidamwa matam pilakakata bivakapusiaim, kukwau kuligaiwa; ibodi sainela matam pilatala bitamwau e taga tomwaidom bilavaimsi wa Eli.

³⁰E kidamwa yamam kwayakakata bivakapusiaim, kubobu makwayana, kuligaiwa; ibodi sainela yamam kwayatala bitamwau e taga tomwaidom bukusuvi wa Eli.

³¹“Tuvaila leikaibigasi, kawasi, ‘Availa bivaipaki la kwava, ibodi bisaiki minawena yatala kala ginigini vaipaka.’[56]

³²Mitaga yeigu alukwaimi, kidamwa taitala tau la kwava gala eikailasi e matauna ivaipaki minana bogwa ivigaki minana nakakailasi kidamwa minana mwada bivaivau; e availa bivaiya minawena nauvaipaka, matauwena goli ikailasi.[57]

³³“Tuvaila bogwa kulagaisi ilukwaisi matausina tobubogwa, kawasi, ‘Kidamwa magim bukukwatotila mokwita e kukwaibiga, kawam, “Yaubada omatala” - e, taga kusasopa; ibodi bukuvagi wala.’

³⁴Mitaga yeigu alukwaimi, taga kukwatotilasi makawala. Gala ‘Labuma omatala’, paila baisa la takaikaia Yaubada;

³⁵gala ‘Watanawa omatala’, paila baisa kaikela kala kabosakaila; gala ‘Yerusalem omatala’, paila baisa Giyouveka la valu.

³⁶E taga kukwatotila makawala paila dabam, paila gala igagabila bukuvigaki kulum yatala bipupwakau kaina bibwabwau.

³⁷Bukulivalasi wala, kawami, ‘E’ kaina ‘Gala’; e avaka kukwebigimkulovaisi, mabigasina metoya mitugaga wala.

³⁸“Bogwa kulagaisi ikaibigasi, ‘Matila kaimapula matila, kudu kaimapula kudu.’

³⁹Mitaga yeigu alukwaimi, Taga kumapu availa eimitugagaim; mitaga kidamwa taitala biwaim okimwam pilakakata,[58] kutovila biwaiya pilakikiwama.

⁴⁰Kidamwa taitala magila yoku deli matauna bukuyakalasi e magila bikau kam kwama, kutagwala tuvaila bikau kam kwakapula.[59]

⁴¹Kidamwa taitala tokwabilia[60] biyosaim e bikaraiwogaim bukukeula la guguwa paila katupotala katupwaila keda, e kula deli matauna katupoyuwela katupwaila keda.

⁴²Availa inigadaim paila avaka kusaiki wala, e availa magila bikayabu kaina bitogu metoya baisa yoku taga kuyusi.

⁴³“Bogwa kulagaisi ikaibigasi, kawasi, ‘Bukuyebwaili som e bukukoulovi kam tilaula.’[61]

⁴⁴Mitaga yeigu alukwaimi, Bukuyebwailisi kami tilaula, e bukunigadasi paila matausina availa availa iyogagaimi,

⁴⁵e makawala bukupataisi Tamami wa labuma, paila matauna ivigaki kalasia iyuwoula baisa tomitugaga deli baisa tomitukwaibwaila, e isaiki kasi kuna matausina bubunesi duwosisia kaina doudoga.

⁴⁶Paila kidamwa kuyebwailisi matausina wala availa availa iyebwailimi, avaka kami mapu? Tokougugula pokala[62] goli leiuvagaisi makawala!

⁴⁷E kidamwa kubodaisi semia wala, baisa vavagi siligaga kaina gala? Matausina availa availa gala itapwarorusi baisa Yaubada goli leiuvagaisi makawala!

⁴⁸Mapaila yokomi ibodaimi bubunemi bwainawokuva wala, makawala Tamami wa labuma matauna bwainawokuva.